Wambuluishe muntu unudi nuyisha nende
1. Mmushindu kayi utudi mua kuidikija mupostolo Paulo patudi tuyisha ne bamanyishi bakuabu?
1 Mupostolo Paulo uvua umona tshikondo tshivuaye upitshisha ne bena Kristo nende bu mushindu wa ‘kukankamijangana munkatshi muabu.’ (Lomo 1:12) Paudi uyisha ne mumanyishi mukuabu, utuku umukankamija ne umuambuluisha anyi? Pamutu pa kushala anu mupuwe patupu, kuenaku mua kumuambila malu adi makuambuluishe bua kuikala mumanyishi muimpe anyi?
2. Tudi mua kuenza tshinyi bua kuambuluisha muntu utudi tuyisha nende bua kuikala ne dikima? Bua tshinyi bidi ne mushinga bua kuenza nanku?
2 Umuambuluishe bua ikale ne dikima: Bamue bamanyishi batu ne bûowa; bûowa ebu butu bumuenekela kuisu kuabu ne padibu bakula. Tuikale tubela kalumbandi ne muoyo mujima bua kubambuluisha bua bikale ne dikima dia bungi. Ntshinyi tshikuabu tshitudi mua kuenza? Mutangidi wa tshijengu kampanda utu wambila muntu udiye uyisha nende ne muoyo mujima bua mutuye pende ne bûowa ne mutuye usambila misangu yonso, ulomba Nzambi bua amuambuluishe bua kikadi umvua bûowa. Muanetu mukuabu wa balume udi wamba yeye bua tshidi tshimuambuluishe bua kuikala ne dikima ne: “bitu bikengela kufukisha mimuemue. Imue misangu ntu nsambila, ndomba Nzambi bua binteketele bua kuikala kufukisha mimuemue.” Kudiku bualu kampanda budi bukuambuluishe bua kutamba kuikala ne dikima paudi uyisha anyi? Ubuambile unudi nuyisha nende.
3. Mmalu kayi atudi mua kuambila muntu utudi tuyisha nende adi mua kumuambuluisha bua kuikalaye uyisha bimpe?
3 Umuleje tshiutu wenza: Udiku ne mêyi mimpe anyi lukonko lua kuasa nalu muyuki, pamuapa bualu kampanda buimpe budi buenzeke muaba unudi bua kutuadija nabu muyuki anyi? Udiku mupete malu mimpe pauvua mukumbaje kabualu kampanda ku tshilejilu tshia mua kubanga muyuki anyi? Kambila unudi nuyisha nende. (Nsu. 27:17) Paudi upinganyina muntu, udi mua kuambila unudi nuyisha nende tshipatshila tshiebe ne muudi mudilongolole bua kutshikumbaja. Panudi nujikija kulonga Bible ne muntu, udi mua kumvuija unudi nuyisha nende tshivua tshikusake bua kusungula bualu kampanda, mvese anyi mushindu kansanga wa kulongesha bua kukumbaja dijinga dia mulongi.
4. Bua tshinyi tudi ne bua kudifila bua kuambuluisha bana betu batudi tuyisha nabu?
4 Bamanyishi ba mu bidimu lukama bia kumpala bavua bambuluisha bantu bavua kabayi bena Kristo. Kadi bavua kabidi bamona ne: kukankamijangana ne kukoleshangana kuvua ne mushinga munkatshi muabu. (Bien. 11:23; 15:32) Mupostolo Paulo wakalongesha Timote utshivua nsonga, pashishe kumusengelelaye bua kulongesha pende bakuabu malu avuaye mulonge. (2 Tim. 2:2) Patudi katuyi tupua muoyo bua kuenzela bena Kristo batudi tuyisha nabu malu mimpe, katuena anu tubambuluisha bua kuyisha bimpe ne kuikala ne disanka dia bungi patupu to. Tudi kabidi tusankisha Tatu wetu wa mu diulu.—Eb. 13:15, 16.