Nshapita Wa Muanda-mukulu
‘Diluangana ne nyuma mibi’
1. Bua tshinyi malu adi nyuma mibi yenza adi atamba kukoka ntema yetu?
BANTU ba bungi batu baseka padibu bumvua bamba ne: nyuma mibi ituku. Kadi ebu ki mbualu bua bilele to. Nansha bantu bitaba peshi kabayi bitaba, tshidibi nyuma mibi ituku, ne itu ikeba bua kusesuisha bantu bonso, ikeba bua kupambuisha nansha batendeledi ba Yehowa. Buobu mene ke badiyi nangananga mitambe kuasa mutu, ke badiyi ikeba bua kuluisha. Bua bualu ebu, mupostolo Paulo udi utudimuija wamba ne: ‘Bualu bua diluangana dietu dia bibula kadiena dia kufuilangana ne munyinyi ne mashi, kadi ndia kufuilangana ne makalenge [adi kaayi amueneka] ne makokeshi ne bamfumu ba mîdima ba buloba ebu, ne bisumbu bia nyuma mibi bidi mu miaba ya mu diulu.’ (Efeso 6:12) Lelu’eu buluishi bua kudi nyuma mibi mbulue kukola kupita ne muvuabi mu bikondo bikuabu bionso bualu bakadi bipate Satana mu diulu ne udi ne tshiji tshikole, mumanye se: tshikondo tshidi tshimushadile ntshîpi menemene.—Buakabuluibua 12:12.
2. Ntshinyi tshidi mua kutuambuluisha bua kutshimuna mu mvita yetu ne nyuma idi mitambe bantu bukole?
2 Kudiku mushindu wa kutshimuna mu mvita eyi itudi tuluangana ne nyuma mibi idi ne bukole butambe bua bantu anyi? Eyowa, tudi mua kutshimuna tuetu beyemene Yehowa ne muoyo mujima. Mbimpe kumuteleja ne kutumikila Dîyi diende. Tuetu benze nunku, tudi mua kuepuka njiwu yetu miena dîna eyi, idi mua kunyangisha bikadilu bietu ne lungenyi luetu anu muakenzekelabi bantu bavua ku bukokeshi bua Satana.—Yakobo 4:7.
Bakokeshi badi mu miaba ya mu diulu
3.Mbanganyi badi Satana uluisha ne tshikisu tshionso, ne mmushindu kayi?
3 Yehowa udi utumvuija bimpe mushindu udi nsombelu wa panu bilondeshile mudiye umumuenena mu diulu. Wakamuenesha mupostolo Yone tshikena-kumona tshivua tshileja Satana muikale “[dragon] munene mukunze bu kapia.” Uvua mushale muindile bua padi anu mushindu umueneka, abutule Bukalenge bua Nzambi (bulombola kudi Masiya) anu dîba dine diakaledibuabu mu diulu mu 1914. Bu muakapangila Satana bua kububutula, wakajula mvita ya mishindu mishilashilangane bua kuluisha baleji-mpala ba Bukalenge abu badi pa buloba. (Buakabuluibua 12:3, 4, 13, 17, MMM) Kadi mmunyi muvua Satana mua kuluangana mvita eyi? Uvua mua kuyiluangana ku diambuluisha dia bantu bende.
4. Bukole budi nabu mbulamatadi ya bantu budi bufumina kudi nganyi, ne ntshinyi tshidi tshileja nanku?
4 Pashishe Yone wakamona nyama wa luonji muikale ne mitu muanda-mutekete ne nsengu dikumi, nyama eu uvua ne bukokeshi pa mutu pa “tshisamba tshionso, bantu bonso, muaku wonso ne ditunga dionso.” Nyama eu udi tshimfuanyi tshia bena malu a tshididi ba buloba bujima. Bakambila Yone ne: ‘Nyoka munene [anyi Satana Diabolo] wakapesha nyama wa luonji bukole buende, nkuasa wende wa bukalenge ne bumfumu buende buonso.’ (Buakabuluibua 13:1, 2, 7, MMM) Bushuwa, bukole budi nabu mbulamatadi ya bantu budi bufumina kudi Satana. Nunku, anu muakafunda mupostolo Paulo, ‘bamfumu ba buloba ebu’ menemene “mbisumbu bia nyuma mibi bidi mu miaba ya mu diulu,” biobi ke bidi bilombola mbulamatadi ya bantu. Muntu yonso udi ujinga kutendelela Yehowa udi ne bua kumanya bimpe tshidi malu onso aa umvuija.—Luka 4:5, 6.
5. Badi mpindieu benda basangisha bamfumu bena tshididi ba pa buloba ku tshinyi?
5 Nansha mudi bamfumu bena tshididi ba bungi bamba mudibu bena Nzambi, kakuena tshisamba nansha tshimue tshidi tshikokela bukokeshi bua Yehowa peshi Yezu Kristo, Mukalenge udiye muteke to. Bonso badi baluangana ne tshikisu tshionso bua kulama bukokeshi buabu. Lelu’eu, anu mudibu baleja mu mukanda wa Buakabuluibua, “nyuma ya bademon” idi yenda isangisha bakalenge ba pa buloba bua ‘mvita ya dituku dinene dia Nzambi wa Bukole Buonso’ ku Armagedone.—Buakabuluibua 16:13, 14, 16; 19:17-19.
6. Bua tshinyi tudi ne bua kuikala badimuke bua kabatufikishi ku ditua bulongolodi bua Satana nyama ku mikolo?
6 Dituku dionso edi, bantu badi batuilangana ne ndululu mikebesha kudi malu a tshididi, malu a mu nsombelu wa bantu, a mpetu ne a bitendelelu bidi bitapulula bantu. Mu ndululu eyi, bantu batu pa tshibidilu bakuata ku tshia tshisamba ne tshisa tshiabu, ku tshia bantu badi bakula muakulu wabu anyi ku tshia ba kampanda badibu nabu bulanda. Nansha ndululu eyi kayiyi mibatangile, misangu ya bungi batu badimona bakadi bakuate ku luseke lumue bashiye lukuabu. Kadi, pa kumbusha muntu anyi luseke kampanda ludiye mua kuikala mulamate, nnganyi menemene udibu batua nyama ku mikolo? Bible udi wamba patoke ne: “Buloba bujima budi mu bukokeshi bua Mubi.” (1 Yone 5:19, MML) Kadi ntshinyi tshidi muntu mua kuenza bua bantu bakuabu kabamupambuishi? Udi ne bua kutua Bukalenge bua Nzambi nyama ku mikolo ne muoyo mujima, ne kubenga kubuelakana mu malu a tshididi a mishindu yonso bu mudi mvita anyi ndululu ya bena panu.—Yone 17:15, 16.
Malu a budimu adi nawu Mubi
7. Mmunyi mudi malu a budimu a Satana amuenekela mu mudimu udiye ukuata ne bitendelelu bia dishima?
7 Katshia ku kale, Satana mmukengeshe bantu ne mêyi a mukana anyi dibakengesha dietu dia bushuwa edi bua kubumbushisha mu ntendelelu mulelela. Wakakuata kabidi mudimu mu mushindu musokome, wa mayele ne wa budimu. Ne budimu buonso, udi ukuata mudimu ne bitendelelu bia dishima, ubueja bantu ba bungi mu mîdima, ubafikisha too ne ku diela meji ne: udibu benzela mudimu n’Nzambi. Bu mudibu kabayi ne dimanya dijalame dia Nzambi ne kabayi banange bulelela, malu a mîdima a mu bitendelelu bia dishima adi mua kubakoka dikoka dia dikema anyi bishima bidibu benzamu bidi mua kubakemesha bikole. (2 Tesalonike 2:9, 10) Kadi badi batudimuija ne: nansha munkatshi mua aba bavua anyi badi mu ntendelelu mulelela, ‘bantu bakuabu nebalekele ditabuja diabu, balamata ku nyuma idi ipambuisha ne ku mayisha a bademon.’ (1 Timote 4:1) Mmunyi muvuabi mua kuenzeka?
8. Mmunyi mudi Satana mua kutubueja mu ntendelelu wa dishima nansha bituikale tuvua tutendelela Yehowa kumpala?
8 Ne budimu buonso, Diabolo udi ulambakena pa mateketa etu. Tshilejilu, tutshidiku ne tshilele tshia kutshina bantu anyi? Biobi bikale nanku, badi mua kutusaka kudi balela betu ta bena mutumba bua kulonda bilele bia ntendelelu wa dishima. Tutu bena maditambishi anyi? Biobi nanku, tudi mua kufika munda padibu batubela anyi padi bakuabu kabayi bitaba bitudi tuamba. (Nsumuinu 15:10; 29:25; 1 Timote 6:3, 4) Pamutu pa tuetu kulengeja mmuenenu wetu wa malu bua kumvuanganaye ne tshilejilu tshia Kristo, tudi mua kubanga kulonda ngenyi ya badi ‘batuafunya ku matshi’ tuamba ne: dibala dia Bible ne dienza patupu malu adi mimpe ke tshidi tshikumbane. (2 Timote 4:3, MMM) Nansha tuetu babuele mu tshitendelelu tshikuabu ta bashale anu mu tshietu atshi, abu ki mbualu bukole kudi Satana to, tshidi ne bualu mpatudi katuyi tutendelela Yehowa mushindu udiye utuleja mu Dîyi diende ne kabiyi ku butuangaji bua bulongolodi buende.
9. Mmunyi mudi Satana wenza mudimu ne budimu ne dijinga ditu nadi bantu dia kusangila ne mulume anyi ne mukaji?
9 Satana udi kabidi usaka bantu ne budimu buonso bua kukumbajabu majinga abu mu mishindu mibi. Udi wenza nunku ne dijinga ditu nadi bantu dia kusangila ne mulume anyi ne mukaji. Bantu ba bungi badi kabayi benza tshidi Bible ulomba, batu bangata disangila dia mulume ne mukaji badi kabayi baselangane bu disankisha patupu dia mubidi didi dianyishibue anyi bangata bualu ebu bu mushindu wa kuleja ne: bakadi bantu bakole. Kadi tuambe tshinyi bua badi baselangane? Ba bungi badi benda bundumba. Nansha mu dibaka kamuyi bualu bua muntu muende, ba bungi badi bakeba bua kushipa mabaka ta kushiyangana ne bena mabaka nabu bua kupeta mushindu wa kusomba ne bakuabu. Meji mabi adi nawu Satana ng’a kusaka bantu bua kukebabu masanka a mpindieu mpindeu, wenza bua kabafiki nansha ku diela meji ku bipeta bibi bivulavulayi bidibu mua kupeta buobu ne bakuabu, ubapangisha kabidi nangananga bua kumanya mudibi mua kunyanga malanda abu ne Yehowa ne Muanende.—1 Kolinto 6:9, 10; Galatia 6:7, 8.
10. Mmu mishindu kayi mudi Satana ukeba bua kunyanga mushindu utudi tuangata tshiendenda ne tshikisu?
10 Dijinga dikuabu didi nadi bantu nkujikija lutetuku. Dijikija lutetuku diodi dikale dimpe, didi mua kusangaluja mubidi, lungenyi ne meji a muntu. Kadi tutu tuenza tshinyi padi Satana ukeba ne mayele onso bua kumbusha lungenyi luetu kudi Nzambi patudi tujikija lutetuku? Tshilejilu, tudi bamanye bimpe ne: Yehowa udi ukina tshiendenda ne tshikisu. Padibu baleja malu a nunku ku televizion ta mu bindidimbi bikuabu, peshi kabidi mu manaya atu bantu benza, tutu tushala basombe tubitangila anyi? Ikala mumanye kabidi ne: Satana udi wenza muende muonso bua malu aa ikale enda abipa anu kubipa bikole padi tshikondo tshiende tshia kumuelabu mu dijimba tshienda tshisemena pabuipi, bualu “benji ba bibi ne bena didinga, nebatungunuke ne dienza dia bibi bipite, eku badingangana, eku babadinga pabo.” (2 Timote 3:13, MMM; Buakabuluibua 20:1-3, Mukenji Mulenga [MM]) Nunku misangu yonso tudimukilayi malu adi Satana wipatshila.—Genese 6:13; Musambu 11:5; Lomo 1:24-32.
11. Mmushindu kayi udi nansha muntu udi mumanye bulelela pa malu a bakishi mua kumata mu buteyi bikalaye kayi mudimuke?
11 Tudi bamanye kabidi ne: Yehowa mmukine bantu badi badibuejakaja mu malu a bakishi a mishindu yonso bu mudi: mbuku, mupongo ne manga nansha diyikila ne bafue. (Dutelonome 18:10-12) Bu mutudi bamanye bualu ebu bimpe, nanku katudidingi bua kuya kudi bena mbuku ne katuanyishi nansha kakese bua kuenzelabu malu abu a ba-demon aa mu nzubu muetu nansha. Kadi bidi bishi padibu babaleja ku televizion ta ku Internet, tudi mua kushala basombe bua kubatangila peshi kubateleja anyi? Nansha mutudi katuyi mua kuitaba bua mpaka-manga kutuondapaye, kadi tudi mua kuitaba bua kuvuadika muana mutoke utudi balele kanshinga ku diboko ne meji a se: bumue kadi mua kumukuba anyi? Bu mutudi bamanye ne: Bible udi upisha ngenzelu eu, tudiku mua kuitaba bua muntu udi ne meji a nunku kunyangaye lungenyi luetu anyi?—Galatia 5:19-21.
12. (a) Mmushindu kayi udi mijiki mua kutufikisha ku dibanga kuela meji ku malu atudi bamanye bimpe ne: mmabi? (b) Mmushindu kayi udi mvuadilu wa muntu, nkoselu anyi ndengejilu wende wa nsuki ne ngakuilu wende mua kuleja ne: udi wanyisha bantu badi ne nsombelu udi Yehowa kayi muanyishe? (c) Ntshinyi tshitudi ne bua kuenza bituikala katuyi basue kumata mu mateyi a Satana?
12 Bible udi wamba ne: tshiendenda ne malu a bundu a mishindu yonso (ne meji a mabi) kabiena nansha ne bua kutedibua munkatshi muetu to. (Efeso 5:3-5) Kadi tudi mua kuamba munyi padibu bimba malu a nunku mu misambu idi mijiki yayi mikale isankisha ne yumvuika mishême ku matshi? Tudi mua kutuadija kuambulula mêyi a mu misambu eyi adi atumbisha balume ne bakaji badi bashala pamue pabu kabayi baselangane, atumbisha kunua kua diamba bua kumvua bilenga ne kabidi atumbisha malu mabi makuabu anyi? Peshi nansha mutudi bamanye ne: katuena ne bua kuidikija nsombelu wa bantu badi benza malu aa, tudi tujinga kuidikija bua kubafuana pa kulonda mvuadilu wabu, nkoselu anyi ndengejilu wabu wa nsuki ta mushindu udibu bakula anyi? Bushuwa mishindu idi Satana wenza nayi mudimu bua kufikisha bantu ku dilonda lungenyi luende lubi mmisokome ya menemene! (2 Kolinto 4:3, 4) Bua tuetu kubenga kumata mu mateyi ende, tuepukayi dibuelakana mu malu a bena panu. Tudi ne bua kumanya bimpe tshidi ‘bamfumu ba mîdima’ ne kuluisha ne muoyo mujima malu mabi adibu bakeba bua tuetu kuenza.—1 Petelo 5:8.
Balongolola bua kutshimuna
13. Nansha mutudi bapange bupuangane, mmunyi mudi yonso wa kutudi mua kutshimuna bena panu badi Satana ulombola aba?
13 Bangabanga ne kufuaye, Yezu wakambila bapostolo bende ne: “Nukoleshe muoyo! Nkadi mutshimune bena panu.” (Yone 16:33, MMM) Bayidi bende bavua pabu mua kutshimuna. Kunyima kua bidimu 60 bimane kupita, mupostolo Yone wakafunda ne: ‘[Mmuntu kayi] udi upita malu a pa buloba bukole? Anu yeye udi witabuja ne: Yezu udi muana wa Nzambi.’ (1 Yone 5:5) Tudi tuleja ditabuja dia nunku patudi tutumikila mêyi a Yezu ne tueyemena Dîyi dia Nzambi anu bu muakenza Yezu. Ntshinyi tshikuabu tshidibu batulomba? Badi batulomba bua kushala balamate anu tshisumbu tshidibu bateke Yezu Mfumu. Tuetu benze mpekatu, tudi ne bua kunyingalala ne muoyo mujima ne kulomba Yehowa luse ku diambuluisha dia mulambu wa Yezu. Patudi tuenza malu nunku, nansha mutudi bapange bupuangane ne bikale tuenza bilema, tuetu petu tudi mua kutshimuna.—Musambu 130:3, 4.
14. Bala Efeso 6:13-17, ku diambuluisha dia nkonko ne mvese idibu bafile mu tshikoso etshi, konkonona dikuatshisha didi nadi tshiamu ne tshiamu tshionso tshia ku bia mvita bia mu nyuma ebi.
14 Bua kutshimuna, tudi ne bua kuvuala ‘bia mvita bionso bia Nzambi,’ katuyi tushiya kantu nansha kamue. Bulula Bible webe mu Efeso 6:13-17, ne umone mudibu batela bia mvita abi. Pashishe, paudi wenda wandamuna nkonko idi ilonda eyi, keba mushindu udi tshia ku bia mvita bionso ebi mua kukukuba.
‘Kusuika bulelela mu bifuka bu mukaba’
Nansha tuetu bikale bamanye bulelela, mmunyi mudi dilonga dia pa tshibidilu, dielangana meji pa bulelela bua mu Bible ne dibuela mu bisangilu mua kutukuba? (1 Kolinto 10:12, 13; 2 Kolinto 13:5; Filipoi 4:8, 9)
‘Kuteka buakane bu tshibuikilu tshia pa tshiadi’
Mêyi a buakane aa ng’a nganyi? (Buakabuluibua 15:3)
Fila tshilejilu tshia mushindu udi dipanga kulonda mêyi makane a Yehowa dibueja muntu mu njiwu ya mu nyuma. (Dutelonome 7:3, 4; 1 Samuele 15:22, 23)
‘Kubueja makasa mu bisabata bia lumu luimpe lua ditalala’
Bua tshinyi tudi tukubibua padi makasa etu enza mudimu wa diya kuyikila ne bantu malu adi Nzambi mulongolole bua ditalala? (Musambu 73:2, 3; Lomo 10:15; 1 Timote 5:13)
‘Ngabu [munene] wa ditabuja’
Ditabuja dietu diodi dikale dishindame bikole, netuenze tshinyi padi bantu bakeba bua tuikale ne dielakana anyi buôwa? (2 Bakelenge 6:15-17; 2 Timote 1:12)
‘Tshifulu tshia lupandu’
Mmunyi mudi ditekemena dia lupandu mua kuambuluisha muntu bua kafiki ku dimata mu buteyi bua kuikala ukeba bubanji ne muoyo mukunze? (1 Timote 6:7-10, 19)
‘Muele wa nyuma’
Ntshinyi tshitudi ne bua kueyemena misangu yonso padibu baluisha makanda etu a mu nyuma peshi a bakuetu bakuabu? (Musambu 119:98; Nsumuinu 3:5, 6; Matayo 4:3, 4)
Ntshinyi tshikuabu tshidi ne mushinga bua kutshimuna mu mvita ya mu nyuma? Mmisangu bungi kayi itudi ne bua kuenza natshi mudimu? Bua banganyi? (Efeso 6:18, 19)
15. Mmunyi mutudi mua kutua mikolo panshi kushala bashindame mu mvita ya mu nyuma eyi?
15 Bu mutudi basalayi ba Kristo, tudi tshiluilu tshinene tshidi mu mvita ya mu nyuma. Bituikala ne budimu eku tuenza mudimu bimpe ne bia mvita bionso bidi Nzambi mutupeshe, katuakufua mu mvita eyi to. Kadi netukankamije ne netuambuluishe bana betu badi basadila Nzambi bu tuetu. Netuikale badiakaje ne muoyo mujima bua kuluangana, tumanyisha lumu luimpe lua Bukalenge bua Nzambi, Bukalenge bua Masiya wa Nzambi, mbulamatadi wa mu diulu udi Satana uluisha ne tshikisu tshionso.
Diambulula
• Bua tshinyi batendeledi ba Yehowa kabena babuelakana nansha kakese mu bimvundu bia bena panu?
• Ng’amue mateyi kayi adi Satana ukuata nawu mudimu bua kufikisha bena Kristo ku kabutu ka mu nyuma?
• Mmushindu kayi udi bia mvita bia mu nyuma bidi Nzambi mufile bitukuba mu mvita yetu ya mu nyuma eyi?
[Bimfuanyi mu dibeji 76]
Badi benda basangisha bisamba bua mvita ya Armagedone