Malu Onso Aa Adi Umvuija Tshinyi?

YEZU KRISTO wakamba ne: mvita, biyole bia nzala, masama ne bikumina bivua ne bua kuikala tshimanyinu tshia ‘nshikidilu wa tshikondo etshi.’—Matayo 24:1-8; Luka 21:10, 11.

Katshia mu tshidimu tshia 1914, nsombelu wa bantu mmunyanga kudi mvita idi itua ipela pankatshi pa matunga ne pankatshi pa bisamba (mikebesha nangananga kudi bamfumu ba bitendelelu badi babuela mu malu a tshididi) ne mpindieu kudi bena tshinyangu anyi ba teroriste badi miaba ya bungi.

Nansha mudi malu a siyanse maye kumpala bikole, pa buloba bujima bantu miliyo ne miliyo kabena ne biakudia to. Tshidimu tshionso bantu ba bungi badi bafua bualu kabena ne biakudia to.

Bipupu bia masama bidi pabi munkatshi mua tshimanyinu tshivua Yezu mufile. Kunyima kua Mvita Mibidi ya Buloba bujima tshipupu tshia gripe tshiakashipesha bantu bapite pa 21 000 000. Tshipupu etshi tshivua tshiotshi tshishilangane ne bipupu bia kale bualu tshiakatampakana buloba bujima too ne mu bidiila. Disama dia SIDA didi dikuata bantu ba bungi, ne bipupu bikuabu bu mudi disama dia tshiadi, dia malaria, bufofo bukebesha kudi tuishi tua mu misulu ne disama dia Chaga bidi bitatshisha bantu mu matunga mapele.

Badi baleja ne: ku tshidimu tshionso kudi kuenzeka bikumina bikese ne binene binunu ne binunu. Nansha mudi biamu bia kutentekela nabi bikumina ne mishindu mimpe ya kubimanyisha mikaleku, tudi tutamba kumvua anu ngumu ya bipupu bidi bifumina ku bikumina bidi binyanga bimenga bia bantu ba bungi.

Bible ukavua mumanyishe kabidi ne: ‘Umanye bualu ebu ne: palua matuku a ku nshikidilu, malu makole nealue. Bantu nebikale badisu, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, kabayi ne tshijila, kabayi banangi ba bana babu, bashipi ba bipungidi, bena bunsonge, kabayi mua kudikanda, bena luonji, kabayi basue malu mimpe, nebikale batungidianganyi, bena lukuluku, buujibue ne diambu, banangi ba masanka, kabayi banangi ba Nzambi; nebikale ne tshimuenekelu tshia buimpe bua Nzambi, kadi bamane kudiula bukole buabu; umuke biebe kudi bantu aba kabidi.’—2 Timote 3:1-5.

Kuenaku umona ne: tudi mu ‘matuku a malu makole’ anyi?

Udiku mumone ne: bantu mbadinange, banange biuma ne buule tente ne lutambishi mu mushindu mubi wa menemene anyi?

Udi mua kubenga kuitaba ne: buloba mbuule patapata ne bantu badi basue anu malu abu nkayabu, kabayi ne dianyisha, bashipi ba bipungidi ne kabayi ne lulamatu anyi?

Kuenaku umona ne: dibenga kutumikila baledi pamue ne dipanga kunangangana mbivule mu mushindu mubi, kabiyi anu mu miaba mikese, kadi pa buloba bujima anyi?

Kakuyi mpata, udi mumone ne: tudi mu buloba budi bunyanguke bikole ne dinanga dia masanka, kamuyi dinanga dia malu mimpe, ki mmuomu anyi? Ke mudi Bible umvuija nsombelu uvua ne bua kuikalaku mu “matuku a ku nshikidilu.”

Bidiku bikengela bualu bukuabu bua kumanya tshikondo tshitudi anyi? Yezu wakamanyisha kabidi ne: mu tshikondo tshine tshitudi etshi, bavua ne bua kuambila bantu ba pa buloba bujima lumu luimpe lua Bukalenge bua Nzambi. (Matayo 24:14) Muanda eu udi wenzeka anyi?

Tshibumba tshia Nsentedi, tshibejibeji tshidi ne malu mashindamene pa Bible, tshidi ne mudimu wa kumanyisha lumu luimpe lua Bukalenge bua Yehowa, ne tshitu tshipatuka mu miakulu ya bungi kupita tshibejibeji tshikuabu kayi tshionso.

Tshidimu tshionso, Bantemu ba Yehowa badi bapitshisha mêba mapite pa muliyare mujima bua kuyisha bantu malu a Bukalenge bua Nzambi.

Badi bapatula mikanda ya kulonga nayi Bible mu miakulu mitue ku 400, too ne mu miakulu idi ne bantu bakese patupu badi mu miaba ya kulekule babala. Bantemu ba Yehowa mbalenge bisamba bionso ne lumu luimpe; mbayishe kabidi mu bidiila bia bungi ne mu bitupa bikuabu bia maloba bidi bikese menemene, bidi mbulamatadi mikuabu kayiyi yangata bu matunga. Mu matunga a bungi Bantemu ba Yehowa badi ne ndongamu wa pa tshibidilu wa dilonga Bible ne bantu.

Bulelela, badi bayisha lumu luimpe lua Bukalenge bua Nzambi, ki mbua kukudimuna mitshima ya bantu bonso nkong buloba bujima, kadi mbua kubamanyisha lumu elu. Badi bapesha bantu ba miaba yonso mushindu wa kuleja bikala malu a udi mufuke diulu ne buloba mikale ne mushinga ku mêsu kuabu ne kabidi kuleja ni badi mua kunemeka mikenji yende ne kunanga bantu nabu.—Luka 10:25-27; Buakabuluibua 4:11.

Mu katupa kîpi emu, Bukalenge bua Nzambi nebumushe bantu bonso babi pa buloba ne nebuvuije buloba bujima mparadizu.—Luka 23:43.

[Kazubu mu dibeji 6]

Matuku a ku nshikidilu wa tshinyi?

Ki mmatuku a ku nshikidilu wa bantu to. Bualu Bible udi upesha aba badi benza disua dia Nzambi ditekemena dia kuikala ne muoyo wa kashidi.—Yone 3:16, 36; 1 Yone 2:17.

Ki mmatuku a ku nshikidilu wa buloba to. Dîyi dia Nzambi didi diamba ne: buloba budi bantu basombele ebu nebushalaku kashidi.—Musambu 37:29; 104:5; Yeshaya 45:18.

Kadi mmatuku a ku nshikidilu wa ndongoluelu eu wa tshikisu udi mubule dinanga ne wa bantu badi balamata bikole ku bienzedi bidimu.—Nsumuinu 2:21, 22.

[Kazubu/Tshimfuanyi mu dibeji dia 7]

Bible n’Dîyi dia Nzambi menemene anyi?

Baprofete badibu batele mu Bible bavua misangu ne misangu bafunde ne: ‘Yehowa udi wamba ne.’ (Yeshaya 43:14; Yelemiya 2:2) Nansha Yezu Kristo Muana wa Nzambi wakashindika ne: kavua ‘udiambila mêyi avuaye wamba’ to. (Yone 14:10) Bible nkayende udi wamba ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende.’—2 Timote 3:16.

Bilondeshile kumpanyi kampanda utu upatula Bible (Alliance biblique universelle), kakuena mukanda mukuabu pa kumusha Bible udibu bapatule mu miakulu ya bungi nunku mipite pa 2 200 to. Kakuena mukanda mukuabu udibu babanye bu Bible bungi bupite pa miliyare inayi mijima mpindieu nansha. Ebu ki mbualu buudiku mua kutekemena bua mukenji udi Nzambi utumina bantu ba mishindu yonso anyi?

Bua kupeta bijadiki bikuabu bidi bileja ne: Bible mmufundisha ne nyuma wa Nzambi, bala mukanda wa La Bible : Parole de Dieu ou des hommes ?, mupatula kudi Bantemu ba Yehowa.

Wewe ubala Bible ne umuitaba ne: n’Dîyi dia Nzambi menemene, bushuwa neupete disanka dia bungi menemene.

[Kazubu/Bimfuanyi mu dibeji dia 8]

Bukalenge bua Nzambi ntshinyi?

Mmbulamatadi wa mu diulu udi muenza ku bukokeshi bua Yehowa Nzambi mulelela, Mufuki wa diulu ne buloba.—Yelemiya 10:10, 12.

Bible udi wamba ne: Nzambi mmupeshe Yezu Kristo bukokeshi ebu. (Buakabuluibua 11:15) Pavua Yezu pa buloba, wakaleja ne: Nzambi ukavua mumupeshe bukokeshi bua pa buabu, bukokeshi buvua bumuambuluishe bua kukokesha mpepele ne mâyi, bua kuondopa masama a mishindu yonso ne kujula mene ne bafue. (Matayo 9:2-8; Mâko 4:37-41; Yone 11:11-44) Mulayi mufundisha ne nyuma wa Nzambi wakamanyisha ne: Nzambi uvua kabidi mua kumupesha ‘bukokeshi, butumbi ne bukalenge, bua bantu bonso, ba bisamba bionso ne ba miakulu yonso bamukuatshile mudimu.’ (Danyele 7:13, 14) Mbulamadi eu badi bamubikila ne: Bukalenge bua mu diulu; Yezu udi ukokesha musombele mu diulu mpindieu.

[Bimfuanyi mu dibeji dia 7]

Badi bayisha lumu luimpe pa buloba bujima