TSHITUPA TSHIA 2

Ditabuja dilelela ntshinyi?

KUIKALA ne ditabuja dilelela nkupita kuitabuja patupu ne: Nzambi udiku. Kudi bantu ba bungi badi bitabuja Nzambi, kadi benza malu mabi ku bukole. Ditabuja dia nunku didi anu bu makuta a dishima. Didi dimueneka bu dilelela, padi dikale dia patupu. Kadi ditabuja dilelela ntshinyi?

Ditabuja dilelela ndishindamene pa dimanya dijalame dia Mifundu minsantu. Mikanda mifundisha ku nyuma eyi idi ituambila bulelela pa bidi bitangila Nzambi ne ituambuluisha bua kumumanya. Idi yakula bua mikenji yende, malu adiye mulongolole ne malongesha ende. Mu malongesha au mudi:

• Nzambi udi umue. Kakuena mukuabu udi mumue nende.

• Yezu ki n’Nzambi wa Bukole Buonso to. Yeye mmuprofete wa Nzambi.

• Nzambi kena wanyisha ditendelela mpingu mu mishindu yadi yonso.

• Bantu mbindile dituku dia dilumbuluisha.

• Bafue bungi kabuyi kubala nebabishibue bua kubuela mu Mparadizu.

Ditabuja dilelela didi ditusaka bua kuenza malu mimpe. Malu a nunku adi atumbishisha Nzambi ne atuambuluisha tuetu ne bantu bakuabu kabidi. Mu malu mimpe amu mudi:

• kutendelela Nzambi.

• kuikala ne ngikadilu idi Nzambi wanyisha, nangananga dinanga.

• kulekela meji mabi ne majinga mabi.

• kushala ne ditabuja kudi Nzambi nansha mu ntatu.

• kulongesha bakuabu malu a Nzambi.

Mmunyi muudi mua kupeta ditabuja dilelela?

Lomba Nzambi akuambuluishe. Muprofete Mose wakalomba diambuluisha kudi Nzambi wamba ne: ‘undeje bienzedi biebe, bua meme kukumanya wewe, ne bua kusangana luse ku mêsu kuebe.’a Nzambi wakamuteleja, kuandamunaye disambila diende. Mose wakalua tshilejilu tshimpe menemene tshia ditabuja. Nzambi neakuambuluishe pebe bua kupeta ditabuja dilelela.

Keba dîba dia kulonga Mifundu minsantu. Tudi mua kupeta Mikanda mifundisha ku nyuma bu mudi Torah, Misambu ne Evanjeliyo mu Bible munsantu, mukanda udibu batambe kukudimuna ne kuabanya pa buloba bujima. Udi pebe ne mukanda mufundisha ku nyuma eu anyi?

Ikala utumikila mibelu ya mu Mifundu minsantu dituku dionso. Ditabuja didi anu bu miskile, idi ikolakana padibu bayibidija. Wewe wibidija ditabuja diebe nedikole padi. Neumone ne: mibelu idi Nzambi ufila idi yambuluisha. Bushuwa, mibelu mimpe idi mu Mifundu minsantu mmilengeje nsombelu wa bantu ba bungi. Tungunuka ne dibala bua kumona bimue bilejilu.

[Mêyi adi kuinshi]

[Kazubu mu dibeji 5]

Mmunyi muwandamuna?

• Ditabuja dilelela ndishindamene pa tshinyi?

• Mmalu mimpe kayi adi ditabuja dilelela disakangana bua kuenza?

• Mmunyi muudi mua kupeta ditabuja dilelela?

[Kazubu mu dibeji 4]

Nzambi udi ulama Dîyi diende

Tuikale bajadike ne: Nzambi mmulame Mifundu minsantu mu mushindu muimpe buetu tuetu lelu. Nzambi Wa Bukole Buonso udi mua kulama mukanda wende. Dîyi diende didi diamba ne: ‘Mashinde adi afubidila, tshilongo tshidi tshitutuka; kadi dîyi dia Nzambi wetu nedijalame tshiendelele.’​—⁠Yeshaya 40:⁠8.

[Tshimfuanyi mu dibeji 4]

Anu bu makuta, ditabuja didi ne bua kuikala dilelela bua kuikaladi ne mushinga

[Tshimfuanyi mu dibeji 5]

Ditabuja dilelela didi disakangana ku dienza malu mimpe

[Tshimfuanyi mu dibeji 5]

Anu bu miskile, ditabuja didi dikola padibu badibidija