Udi ne bua kutungunuka ne kulonga malu a Yehowa bua tshinyi?

1. Kutungunuka ne kulonga malu a mu Bible kudi mua kukuambuluisha mushindu kayi?

Kakuyi mpata, dilonga dia malu a mu Bible ndikoleshe dinanga diebe bua Yehowa. Tudi ne bua kutungunuka ne kukolesha dinanga edi. (1 Petelo 2:2) Bua wewe kupeta muoyo wa tshiendelele, udi ne bua kulonga Dîyi dia Nzambi bua utungunuke ne kushemeja bulunda buebe ne Nzambi.​—Bala Yone 17:3; Yuda 21.

Paudi uvudija dimanya dia Nzambi, ditabuja diebe didi dikola. Ditabuja nedikuambuluishe bua kusankisha Nzambi. (Ebelu 11:1, 6) Nedikusake bua kunyingalala ne kuenza mashintuluka akuambuluisha mu nsombelu webe.​—Bala Bienzedi 3:19.

2. Dimanya diebe dia Nzambi didi mua kuambuluisha bantu bakuabu mushindu kayi?

Bulelela, dijinga diebe ndia kuambila bantu bakuabu malu audi mulonge, bualu tuetu bonso tutu tuzuka bua kuyikila ne bakuabu patudi ne bualu buimpe. Wewe utungunuka ne kulonga Bible, neumanye mua kuenza nende mudimu bua kuambila bantu malu a Yehowa ne lumu luimpe luudi muitabuje.​—Bala Lomo 10:13-15.

Bantu ba bungi batu batuadija kuambila balela babu ne balunda babu lumu luimpe. Kadi wikale ne mêyi mimpe. Mbimpe kubambila malu adi Nzambi mulaye, pamutu pa kubaleja malongesha a dishima a mu nzambi yabu. Wavuluka kabidi ne: misangu ya bungi, tshitu tshikoka bantu, mbienzedi bietu bilenga, ki mmalu atudi tubambila to.​—Bala 2 Timote 2:24, 25.

3. Mmalanda a mushindu kayi audi mua kudia ne Nzambi?

Kulonga Dîyi dia Nzambi nekukuambuluishe bua kukolesha malanda ebe ne Nzambi. Neulue kudia malanda makole ne Yehowa, bualu neulue muena mu dîku diende.​—Bala 2 Kolinto 6:18.

4. Udi mua kuenza tshinyi bua kuya kumpala?

Udi mua kukolesha malanda ebe ne Nzambi, wewe utungunuka ne kulonga Dîyi diende. (Ebelu 5:13, 14) Keba Ntemu wa Yehowa bua nulonge nende Bible ku diambuluisha dia mukanda wa Mmalu kayi adi Bible utulongesha? Wewe utungunuka ne kulonga Dîyi dia Nzambi bikole, newikale ne diakalengele mu nsombelu webe.​—Bala Musambu wa 1:1-3; 73:27, 28.

Lumu luimpe ludi lufuma kudi Yehowa, Nzambi wa disanka. Wewe udisangisha ne batendeledi bende, neukoleshe bulunda buebe nende. (Ebelu 10:24, 25) Wewe udienzeja bua kusankisha Yehowa, neupete muoyo wa tshiendelele, ke muoyo wa bushuwa au! Kusemena pabuipi ne Nzambi ke bualu butambe buimpe buudi ne bua kuenza.​—Bala 1 Timote 1:11; 6:19.