TSHIENA-BUALU TSHINENE | UDI MUA KUSEMENA PABUIPI NE NZAMBI
Kakuena nsombelu mutambe buimpe mupite eu
Ntshinyi tshiudi mua kuenza bua kusemena pabuipi ne Nzambi? Tudi bakonkonone malu adi alonda aa audi mua kukumbaja bua kuikala mu malanda mimpe nende:
Kumanya dîna dia Nzambi, Yehowa ne kuditela.
Kuikala kuyukila nende mu disambila ne dilonga Bible Dîyi diende.
Kutungunuka ne kuenza malu adi asankisha Yehowa.
Semena pabuipi ne Nzambi pakutela dîna diende, kumusambila, kulonga Dîyi diende ne kuenza malu adi amusankisha
Wewe wenza malu aa, udiku mua kuamba ne: udi wenza tshidi tshikengela bua kusemena pabuipi ne Nzambi anyi? Kudiku bualu buudi umona ne: udi mua kuakaja anyi? Kakuyi mpata bidi bikengela kudienzeja, kadi tangila bipeta biudi mua kupatula.
Jennifer wa mu ditunga dia États-Unis udi wamba ne: “kudienzeja bua kukolesha malanda ne Nzambi kudi ne mushinga wa bungi. Malanda aa adi ambuluisha muntu bua kueyemena Nzambi bikole, kumanya bimpe menemene bumuntu buende ne ndekelu wa bionso, kumunanga bikole. Kakuena nsombelu mutambe buimpe mupite eu!”
Wewe musue kuikala mu malanda mimpe ne Nzambi, Bantemu ba Yehowa nebikale ne disanka dia kukuambuluisha. Badi mua kudilongolola bua kulonga nebe Bible kuyi ufuta makuta. Tudi kabidi tukubikila bua kubuela mu bisangilu bietu bia malu a mu Bible mu Nzubu wa Bukalenge wa muaba uudi, neusanke bikole bua kudisangisha ne bantu badi bangata malanda abu ne Nzambi ne mushinga.a Paudi wenza nunku, neudiumvue pebe anu bu mufundi wa misambu wakamba ne: “Kundi meme, kusemena pabuipi ne Nzambi nkuimpe buanyi meme.”—Musambu 73:28.
a Bua kulomba dilonga dia Bible anyi kumanya muaba udi Nzubu wa Bukalenge wa muaba uudi, bu wewe musue, yukila ne muntu udi mukupeshe mukanda eu anyi buele mu site wetu wa ku Enternete eu: www.jw.org. Tangila muinshi mua katshiena-bualu aka: TUPETE kadi kuinshi kua dibeji.