Dilongesha dia Bukalenge​—Dilongesha bena mudimu ba Mukalenge

UDI utua mimuemue idi ikankamija ngamba-malu padiye wenza muyuki kumpala. Ngamba-malu eu mmuanetu wa balume utshidi nsonga mu tshisumbu tshienu, udi wenza muyuki wende bua musangu wa kumpala mu mpuilu. Paudi uteleja muyuki wende, udi wanyisha dilongesha didibu bapeshe bantu ba Nzambi. Udi uvuluka miyuki ikadiye muenzenze ne umona mudiye mpindieu mulubuluke. Wakaya kumpala bikole panyima pa yeye mumane kubuela mu Kalasa ka mudimu wa Nzambi ne pashishe mu Kalasa ka bampanda-njila. Matuku mashale aa, yeye ne mukajende bavua babuele mu Kalasa ka bamanyishi ba Bukalenge. Padi bantu batuta bikashi bua muyuki mulenga wa muanetu eu, udi utangila bantu ne wela meji bua dilongesha didi bantu ba Nzambi bonso bapete.

Bible ukavua mudianjile kumanyisha bua tshikondo tshivua bantu ba Nzambi bonso ne bua kuikala “bayidi ba Yehowa.” (Yesh. 54:13) Tudi mu tshikondo atshi. Tudi tulongeshibua ku diambuluisha dia mikanda yetu, dia bisangilu bietu, dia mpuilu, dia mpungilu ne dia tulasa tushilashilangane tudibu benze bua kutulongolola bua midimu kampanda mu bulongolodi bua Yehowa. Mu tshitupa etshi, netumone mudi tulasa tuonso etu tufila tshijadiki tshia ne: Bukalenge bua Nzambi budi bukokesha lelu.