Udi ulongesha Nikodemo butuku

Patshivua Yezu mu Yelushalema bua Pasaka wa mu tshidimu tshia 30 B.B., wakenza bimanyinu anyi bishima bia dikema. Bua bualu ebu, bantu ba bungi bakamuitabuja. Bivua bikemesha kabidi Nikodemo uvua Mufalese ne umue wa mu bena ku kabadi kanene ka bena Yuda kavuabu babikila ne: Tshilumbuluidi Tshinene. Bu muvuaye musue kumanya malu a bungi, wakaya kudi Yezu butuku bumane kuila, pamuapa bualu uvua utshina bua lumu luende kalunyanguki kudi balombodi bakuabu bena Yuda bobu mua kumumona.

Nikodemo wakamba ne: “Labi, tudi bamanye ne: udi mulongeshi udi mufume kudi Nzambi, bualu muntu kena mua kuenza bimanyinu biudi wenza ebi padi Nzambi kayi nende to.” Yezu wakandamuna Nikodemo ne: bua muntu kubuela mu Bukalenge bua Nzambi, anu yeye “muledibue tshiakabidi.”​—Yone 3:2, 3.

Kadi mmunyi mudi muntu mua kuledibua tshiakabidi? Nikodemo wakamuebeja ne: muntu “kena mua kubuela munda mua mamuende musangu muibidi bua kuledibua to, ki mmuomu?”​—Yone 3:4.

Tòo, atshi ki ntshidi kuledibua tshiakabidi kumvuija to. Yezu wakamumvuija ne: “Muntu yeye kayi muledibue kudi mâyi ne kudi nyuma, kena mua kubuela mu Bukalenge bua Nzambi to.” (Yone 3:5) Pavua Yezu mubatijibue, ne nyuma muimpe mumupuekele, ke pavuaye muledibue “kudi mâyi ne kudi nyuma.” Dîba adi, kuvua kabidi dîyi difumina mu diulu diamba ne: “Eu udi Muananyi, munanga, undi muanyishe.” (Matayi 3:16, 17) Mu mushindu eu, Nzambi wakaleja ne: uvua muvuije Yezu muana wa mu nyuma muikale ne ditekemena dia kubuela mu Bukalenge bua mu diulu. Pashishe mu Pentekoste wa mu tshidimu tshia 33 B.B., bavua ne bua kuitshikijila bantu bakuabu bavua babatijibua nyuma muimpe, nunku bavua baledibua tshiakabidi bu bana ba Nzambi balela ku nyuma.​—Bienzedi 2:1-4.

Mbikole bua Nikodemo kumvua tshivua Yezu umulongesha bua Bukalenge. Nunku Yezu wakamuambila bualu bukuabu budi butangila mudimu wende wa pa buawu bua mudiye muana wa Nzambi muikale ne mubidi wa buntu. Yezu udi umuambila ne: “Anu bu muvua Mose mubandishe nyoka kuulu mu tshipela, ke mudibu ne bua kubandisha Muana wa muntu kuulu, bua muntu yonso udi umuitabuja amone mua kupeta muoyo wa tshiendelele.”​—Yone 3:14, 15.

Bena Isalele bavuabu basume kudi nyoka ya lulengu ku kale abu bavua ne bua kutangila nyoka wa tshiamu tshia mitaku bua kupandukabu. (Nomba 21:9) Bia muomumue, bantu bonso badi ne bua kuleja ditabuja mu Muana wa Nzambi bua kupanduka ku nsombelu wabu wa lufu ne kupeta muoyo wa tshiendelele. Bua kuleja tshidi Yehowa muenze ne dinanga dionso mu bualu ebu, Yezu wakambila kabidi Nikodemo ne: “Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.” (Yone 3:16) Nanku, ngondo mitue ku isambombo Yezu mumane kutuadija mudimu wende mu Yelushalema, wakaleja patoke ne: yeye ke njila udi ufikisha bukua bantu ku lupandu.

Yezu udi wambila Nikodemo ne: “Nzambi kavua mutume Muanende pa buloba bua yeye kulumbuluisha ba pa buloba to.” Bidi biumvuija ne: kavua mumutume bua kulumbuluisha ba pa buloba bibi, ubafundila kabutu to. Kadi, anu mudi Yezu wamba, uvua mutumibue “bua ba pa buloba bapandishibue ku butuangaji buende.”​—Yone 3:17.

Bua buôwa, Nikodemo uvua mulue kudi Yezu mu mîdima. Nunku mushindu udi Yezu ujikija muyuki wabu nende udi ukoka ntema, udi umuambila ne: “Mpindieu dilumbuluisha ndimanyine pa bualu ebu ne: butoke [budi buleja Yezu ku nsombelu wende ne malongesha ende] mbulue pa buloba, kadi bantu mbanange mîdima pamutu pa butoke, bualu midimu yabu ivua mibi. Bualu muntu yonso udi wenza malu mabi mmukine butoke ne kena ulua ku butoke, bua midimu yende kayedibu patoke to. Kadi muntu yonso udi wenza malu malelela udi ulua ku butoke, bua midimu yende imueneshibue patoke mudiyi mienza mu diumvuangana ne Nzambi.”​—Yone 3:19-21.

Mpindieu tshilumbu tshivua kudi Nikodemo, Mufalese ne mulongeshi wa mu Isalele eu, bua kuelanganaye meji bua malu avuaye ufuma ku diteleja avua atangila mudimu udi nawu Yezu mu malu adi Nzambi mulongolole.