Muana wa bakaji udi kabidi ne muoyo!

Yailo wakamona muvua Yezu muondope mukaji uvua ne disama dia mashi apueka. Bushuwa, Yezu uvua mua kuambuluisha kabidi muanende wa bakaji, nansha muvuaye wela meji ne: ‘muanende wa bakaji udi ne bua kuikala ukadi mufue dîba edi.’ (Matayi 9:18) Kutshivuaku mushindu wa kuambuluisha muana eu anyi?

Patshivua Yezu wakula ne mukaji uvuaye muondope eu, bamue bantu bakalua bafumina kua Yailo, bamuambila ne: “Muanebe wa bakaji ukadi mufue!” Bakamuambila kabidi ne: “Bua tshinyi kutatshisha kabidi Mulongeshi?”​—Mâko 5:35.

Elu ndumu lubi lutambe! Muntu eu uvuabu banemeka bikole muaba uvuaye musombele, wakadimona mushikile. Muanende wa bakaji mulela umue wafu. Kadi Yezu mmumvue mukenji eu, udi ukudimuka kudi Yailo ne umukankamija ne: “Kutshinyi to, leja anu ditabuja.”​—Mâko 5:36.

Pashishe Yezu wakaya ne Yailo kuende. Pakafikabu, bakasangana mutoyi wa bungi. Bantu bavua bunguile muaba eu bavua badila, bela kabobo ka muadi, ne badikuma bua kanyinganyinga. Yezu wakabuela mu nzubu ne kuambaye mêyi adi akemesha aa: “Muana ki mmufue to, kadi mmulale.” (Mâko 5:39) Padi bantu bumvua mêyi aa, bakaseka Yezu. Mbamanye ne: muana wa bakaji eu mmufue bulelela. Kadi, Yezu nealeje ku diambuluisha dia bukole buvua Nzambi mumupeshe ne: bantu badi mua kubishibua ku lufu anu bu mudibu mua kubabisha ku tulu tukole.

Mpindieu Yezu udi upatula bantu bonso pambelu, ushala anu ne: Petelo, Yakobo ne Yone, ne baledi ba muana wa bakaji udi mufue. Yezu udi uya ne bantu batanu aba muaba udibu baladike muana. Udi umukuata ku tshianza, wamba ne: “‘Talita kumi,’ padibu bakudimuna miaku eyi, idi yumvuija ne: ‘Muana wa bakaji, ndi nkuambila ne: “juka!”’” (Mâko 5:41) Diakamue, udi ujuka ne utuadija kuenda. Elabi meji bungi bua disanka divua Yailo ne mukajende nadi padibu bamona bualu ebu! Bua kujadika kabidi ne: muana wa bakaji eu udi bushuwa ne muoyo, Yezu wakatuma dîyi bua bamupeshe tshiakudia.

Misangu mikuabu ivua Yezu muenze bishima, wakatumina bantu bavuaye muondope dîyi bua kubenga kutangalaja malu avuaye mubenzele, ne ke tshidiye wambila kabidi baledi aba. Nansha nanku, baledi badi ne disanka dia bungi aba ne bantu bakuabu badi batangalaja lumu elu “mu tshitupa atshi tshijima.” (Matayi 9:26) Bu wewe mumone mulela webe mubishibue ku lufu, kuvuaku mua kuambila bantu bualu ebu ne disanka dionso anyi? Eu mmuyuki muibidi udibu bafunde wa mudi Yezu ubisha muntu ku lufu.