Yezu udi wenza bishima bia bungi

Yezu uvua mulue pa buloba bua kumanyisha lumu luimpe lua Bukalenge bua Nzambi. Bua kuleja tshienza Yezu pikalaye Mukalenge, Yehowa uvua mumupeshe nyuma muimpe bua kuenzaye bishima. Uvua wondopa masama onso. Babedi bavua bamulonda muaba wonso uvuaye uya bua abambuluishe, ne uvua ubondopa bonso. Bampofo bavua bamona, bampudi matshi bumvua, bantu bavua batekete mubidi benda, ne bavua ne demon, ivua ipatuka. Bavua bumvua bimpe nansha bobu balenge ku luzembe lua tshilamba tshiende. Bantu bavua balonda Yezu muaba wonso uvuaye uya. Nansha pavua Yezu musue kuikala muaba wa nkayende, kavua wipata bantu to.

Musangu kampanda, bantu bakalua ne muntu uvua mutekete mubidi ku nzubu kuvua Yezu mutudile. Kadi mu nzubu amu muvua bantu ba bungi kakuyi mushindu wa kubuelamu to. Nunku bakatubula disoso mu musaka, kupuekeshabu muntu au kudi Yezu. Ke Yezu kuambila muntu au ne: ‘Juka, wende.’ Pakajukaye, yeye kuenda, bantu bakakema bikole.

Musangu mukuabu kabidi, pavua Yezu ubuela mu musoko kampanda, bena nsudi dikumi bakimanyina pa bule, kumuelabu dîyi ne: ‘Yezu, tuambuluisha koku!’ Tshikondo atshi, bavua bakandike bena nsudi bua kusemenabu pabuipi ne bantu bakuabu. Yezu wakambila bena nsudi abu bua kuyabu ku ntempelo anu bu muvua mikenji ya Nzambi ilomba bena nsudi bua kuenza bobu bamane kubondopa. Pavuabu mu njila benda baya, bakondopibua. Pavua umue wa kudibu mumone ne: uvua mondopibue, wakapingana bua kuela Yezu tuasakidila ne kutumbisha Nzambi. Ku bonso buabu, anu umuepele ke uvua muele Yezu tuasakidila.

Mamu mukuabu uvua musame bidimu 12 kavua kabidi mumanye ne: uvua mua kumvua bimpe to. Wakaluila panyima pa Yezu mu musumba wa bantu, kulengaye luzemba lua tshilamba tshiende tshia pa mutu. Yeye kumvua bimpe musangu umue. Pavua bualu abu buenzeke, Yezu wakakonka ne: “Nnganyi udi mundenge?” Mamu au wakumvua buôwa, kadi wakasemena, kumuambilaye bulelela. Yezu wakamukolesha wamba ne: ‘Muananyi wa bakaji, ndaku mu ditalala.’

Mutangidi kampanda wa nsunagoga diende Yailo wakasengelela Yezu wamba ne: ‘Luaku koku kuanyi! Kana kanyi ka bakaji kadi kasama bikole.’ Kadi kumpala kua Yezu kufikaye kua Yailo, kana ka bakaji aku kakafua. Pavua Yezu mufike, wakamona ne: bantu ba bungi bavua balue kudila ne dîku dia Yailo. Yezu wakabambila ne: ‘Lekelayi kudila; mmulale tshianana.’ Pashishe wakakuata nsongakaji ku tshianza, kuambaye ne: “Muana, juka!” Muana kusomba musangu umue; Yezu kuambila baledi ba muana bua kumupesha tshiakudia. Anji elabi meji muvua baledi ba muana au mua kuikala bumvue!