Udi udisha bantu binunu ne mampa makese ne mishipa mikese

Bapostolo 12 bavua bafuma mu mudimu wa kuyisha mu Galela mujima, ne bakalondela Yezu “malu onso avuabu benze ne balongeshe.” Bimueneka ne: bavua batshioke. Kadi kabavua nansha ne dîba dia kudia to, bualu bantu ba bungi bavua balua, baya. Nunku Yezu wakamba ne: “Luayi, nuenu nkayenu, ku luseke muaba udi kawuyi bantu, nuikishe ndambu.”​—Mâko 6:30, 31.

Badi babuela mu buatu, pamuapa pabuipi ne Kapênuma, ne baya muaba wa kule ku est kua musulu wa Yadene dia muamua dia Betesaida. Kadi bantu ba bungi bakabamona baya, ne bakuabu bakamanya bualu ebu. Buonso buabu bakanyemena lua ku muelelu wa mâyi ne buatu buakabasangana muaba au.

Padi Yezu upatuka mu buatu udi umona musumba wa bantu ne ubumvuila luse, bualu bavua bu mikoko idi kayiyi ne mulami. Nunku wakatuadija “kubalongesha malu a bungi” bua Bukalenge. (Mâko 6:34) Wakondopa kabidi “bavua dijinga ne luondapu.” (Luka 9:11) Padi dîba dipita bayidi badi bamuambila ne: “Muaba eu udi kule ne bantu ne dîba dikadi diye; pingaja misumba ya bantu bua baye mu misoko, badisumbile biakudia.”​—Matayi 14:15.

Yezu wakabandamuna ne: “Kabena ne bua kuya to; nuenu bapeshayi tshia kudia.” (Matayi 14:16) Nansha mukavua Yezu mumanye tshivuaye ne bua kuenza, wakateta Filipo ne lukonko elu: “Nkuepi kutuasumba mampa bua bantu aba kudia?” Filipo ke uvua ne bua kuandamuna bualu yeye ke uvua wa pabuipi ne Betesaida. Kadi kusumba mampa ki nkujikija tshilumbu to. Bantu balume bavua muaba au bavua batue ku 5 000. Bungi busanga buvua mua kuikala binunu dikumi bobu babale bakaji ne bana! Filipo wakandamuna ne: “Mampa a ndenaliyo [ndenaliyo umue uvua difutu dia dituku dimue] nkama ibidi kaakukumbana bua muntu yonso wa kudibu kupetaye kapese to.”​—Yone 6:5-7.

Pamuapa bua kuleja muvuabi kabiyi bikumbana bua kudisha bantu bonso aba, Andele udi usakidila ne: “Muana wa balume udi muaba eu ne mampa atanu a orje ne mishipa ya mikese ibidi. Kadi bintu ebi bidi mua kuenzela bantu bungi nunku tshinyi?”​—Yone 6:9.

Tudi mu tshikondo tshia mashika kumpala kua Pasaka wa mu 32 B.B., ne mashinde avua matoloke ku mpenga kua mukuna. Yezu udi wambila bayidi bende bua bambile bantu bua basombe mu mashinde mu tusumbu tua bantu 50 ne tua bantu 100. Udi wangata mampa atanu ne mishipa ibidi ne usambila Nzambi. Pashishe udi ukosolola mampa ne mishipa. Yezu udi upesha bayidi bende bintu ebi bua kuabanyina bantu. Tshidi tshikemesha ntshia ne: bantu bonso bakadia too ne pakukutabu!

Pashishe Yezu wakambila bayidi bende ne: “Sangishayi bipese bidi bishale, bua tshintu nansha tshimue katshijiminyi to.” (Yone 6:12) Bakuwuja bisaka 12 ne bintu bivua bishale!