Yezu udi udisha bantu binunu ne binunu

Matuku makese kumpala kua Pasaka wa mu tshidimu tshia 32 panyima pa Yezu, bapostolo bakafuma ku luendu luvuabu baye bua kuyisha. Bu muvuabu batshioke, Yezu wakabanda nabu mu buatu kuyaye nabu ku Betesaida, muaba uvuabu mua kuikishila. Kadi pakavua buatu pa kutua ku mukuna, Yezu wakamona ne: bantu binunu ne binunu bavua babalonde kuntu aku. Nansha muvua Yezu ujinga bua ikale ne bayidi bende muaba wa nkayabu, wakakidila bantu abu anu bimpe. Yeye kuondopa babedi bavuabu balue nabu, kubangaye kubalongesha. Dituku adi dijima Yezu wakabalongesha anu bua Bukalenge bua Nzambi. Ku dilolo, bapostolo bende bakalua kudiye, kumuambilabu ne: ‘Bantu aba badi ne bua kuikala ne nzala. Bapingaja bua bakakebe bia kudiabu.’

Yezu wakabambila ne: ‘Kabena ne bua kuya to. Bapeshayi biakudia muaba eu.’ Bapostolo kumukonka ne: ‘Udi musue tuye kubasumbila mampa anyi?’ Filipo, umue wa ku bapostolo bende, wakamba ne: ‘Nansha tuetu bikale ne makuta a bungi, katuena mua kusumba mampa adi mua kukumbana musumba wa bantu eu to.’

Yezu kubakonka ne: ‘Nudi ne biakudia bungi kayi?’ Andele kuandamuna ne: ‘Tudi ne mampa atanu ne tumishipa tubidi. Mbikese be!’ Ke Yezu kuamba ne: ‘Luayi ne mampa ne mishipa ayi.’ Kuambilaye bantu bua kusomba mu mashinde mu bisumbu bia bantu 50 ne bia bantu 100. Yezu wakangata mampa ne mishipa ayi, kutangilaye mu diulu, kusambilaye. Pashishe wakapesha bapostolo biakudia abi, bobu kubipesha bantu. Bantu balume 5 000 ne bakaji ne bana bonso bakadia, bobu kukuta. Pashishe bapostolo bakasangisha bivua bishale bua tshintu nansha tshimue katshijiminyi to. Kuakashala bisaka 12 biuwule tente! Atshi si tshivua tshishima tshia dikema, ki mmuomu?

Bantu bakakema bikole, kujingabu too ne bua kuteka Yezu bua ikale mukalenge wabu. Kadi Yezu uvua mumanye ne: tshikondo tshivua Yehowa musue bua ikale mukalenge katshivua tshianji kukumbana to. Ke yeye kupingaja misumba ya bantu, kuambilaye bapostolo bende bua kusabuka dia muamua dia Mbuu wa Galela. Bakabuela mu buatu, kadi Yezu yeye wakabanda ku mukuna nkayende. Bua tshinyi? Bualu uvua dijinga ne dîba dia kusambila tatuende. Nansha muvua Yezu ne malu a bungi a kuenza, uvua anu ukeba dîba dia kusambila.