Diyukidilangana dia ndekelu ne bantu badi basue kubatijibua

Pa tshibidilu, batu babatiza bantu mu mpuilu ne mu mpungilu ya Bantemu ba Yehowa. Ku ndekelu kua muyuki wa batismo, ngamba-malu nealombe badi basue kubatijibua bua kuimana kuulu ne kuandamuna nkonko ibidi idi ilonda eyi ne dîyi dikole:

1. Ukadi munyingalale bua mpekatu yebe ne muyilekele, mudilambule kudi Yehowa, ne muitabe njila wende wa lupandu ludiye ufidila mu Yezu Kristo anyi?

2. Udi mumvue ne: paudi ubatijibua udi ulua Ntemu wa Yehowa udi wenda pamue ne bulongolodi buende anyi?

Padi bantu badi basue kubatijibua bandamuna nkonko eyi ne: eyowa, badi ‘bajikula patoke’ mudibu ne ditabuja mu tshia kupikulangana natshi, ne mudibu badilambule kudi Yehowa ne muoyo mujima. (Lomo 10:9, 10) Mbimpe bantu badi basue kubatijibua belele nkonko eyi meji ne basambile kumpala kua dîba bua pandamunabu, mandamuna abu afumine mu muoyo wabu.

Ukadi mudilambule kudi Yehowa mu disambila, mumulaye bua kumutendelele anu yeye nkayende ne kuvuija kuenza disua diende bualu bua mushinga mukole mu nsombelu webe anyi?

Udi mushindike mpindieu ne muoyo mujima ne: udi mudiakaje bua kubatijibua anyi?

Mbilamba kayi bidi bikumbane bua muntu kuvuala padibu bamubatiza? (1 Tim. 2:9, 10; Yone 15:19; Filip. 1:10)

Tudi ne bua kuvuala ne “bupuekele ne meji majalame” bua kuleja mutudi “balamate Nzambi.” Nunku bantu badi babatijibua kabena ne bua kuvuala bilamba bia kuowa nabi mâyi bidi bileja mubidi anyi kuvuala bilamba bifunda mêna to. Badi ne bua kuvuala bilamba bimpe, bidi biakanyine, bidi ne mankenda, ne bidi bileja kanemu bua batismo.

Muntu udibu babatiza udi ne bua kuenza malu mushindu kayi? (Luka 3:21, 22)

Tshilejilu tshia batismo wa Yezu ke tshidi bena Kristo ne bua kulonda lelu eu. Uvua mumanye ne: batismo mbualu bua mushinga mukole, kumuenekelabi mu malu avuaye muenze. Nunku, muaba udi batismo wenzekela ki mmuaba wa kuelela bilele bibi, kunayila, kuowela mu mâyi, anyi kuenza malu makuabu adi mua kunyanga bunême bua batismo to. Muena Kristo mupiamupia kena kabidi mua kuenza malu bu muntu udi mutshimune mvita mikole to. Bu mudi batismo bualu bua disanka, tudi ne bua kuleja disanka adi mu mushindu udi uleja kanemu.

Mmunyi muikala kubuela mu bisangilu pa tshibidilu ne kudia bulunda ne bana betu mua kukuambuluisha bua kukumbaja mutshipu uudi muenze kudi Yehowa?

Wewe mumane kubatijibua, bua tshinyi mbimpe wikale anu ne programe muimpe wa didilongela ne wikale ne tshibidilu tshia kuyisha lumu luimpe?

MALU ADI BAKULU NE BUA KULONDA

Padi mumanyishi udi kayi muanji kubatijibua uleja dijinga diende dia kubatijibua, badi ne bua kumukankamija bua kukonkonona bimpe tshiena-bualu tshia “Nkonko ya kuela badi basue kubatijibua,” tshidi mu dibeji dia 185-207 mu mukanda eu. Nebamuambile bua kubala tshiena-bualu tshia “Dimanyisha kudi mumanyishi udi kayi muanji kubatijibua,” tshidi tshibangishila mu dibeji dia 182, tshidi tshileja mudiye mua kudilongolola bua kuyukidilangana ne bakulu. Anu mudibu balejamu, muntu udi musue kubatijibua udi mua kulua ne tumalu tuvuaye mufunde pa dibeji dikuabu ne udi mua kuikala ne mukanda wende mubulula padibu bayukidilangana. Kadi muntu nansha umue kena mua kuambulula nende nkonko eyi kumpala kua yeye kupetangana ne bakulu to.

Muntu udi musue kubatijibua udi ne bua kumanyisha mutangidi wa malu a kasumbu ka bakulu. Muntu udi ukeba kubatijibua yeye mumane kubala “Nkonko ya kuela badi basue kubatijibua”, mutangidi wa malu a kasumbu ka bakulu neamuebeje bikalaye ukadi mudilambule kudi Yehowa mu disambila bua kuenza disua dia Nzambi. Bikalaye ukadi mudilambule, mutangidi wa malu a kasumbu ka bakulu nealongolole bua bakulu babidi bakonkonone nende “Nkonko ya kuela badi basue kubatijibua.” Nebapeshe mukulu yonso tshitupa tshimue bua kuyikila nende. Kabiena bikengela kuindila anu padibu bamanyisha dituku dia mpuilu anyi mpungilu bua kushisha kukonkonona ne bantu to.

Pa tshibidilu, batu benza dikonkonona edi mu bitupa bibidi, benza pamuapa dîba dimue bua tshitupa tshionso; kadi ki mbibi bua kupitshisha pa dîba dimue padibi bikengedibua to. Mbimpe kutuadija tshitupa tshionso ne disambila ne kutshijikija ne disambila. Mukulu ne muntu udi musue kubatijibua kabena ne bua kuya lubilu lubilu padibu bakonkonona nkonko eyi to. Bakulu badibu basungule bua kukonkonona ne bantu badi basue kubatijibua badi ne bua kuteka dikonkonona edi kumpala kua malu abu makuabu.

Bitu bimpe kukonkonona nkonko eyi ne muntu umue pa nkayende, kabayi ba bungi to. Padi bakulu bumvua mudi muntu wandamuna lukonko luonso, nebamone dimanya didiye nadi, ne nebamanye bimpe bikalaye mukumbane bua kubatijibua. Kabidi, nuenu nukonkonona muntu pa nkayende, neakule mudilekelele. Badi mua kukonkonona bitupa ebi ne mulume ne mukajende pamue.

Muntu udi musue kubatijibua yeye muikale muntu mukaji, diyukidilangana nedienzeke muaba udi bantu mua kubamona kadi kabayi mua kumvua bidibu bakula to. Biobi bikengela kuangata muntu mukuabu, muntu au udi ne bua kuikala mukulu anyi musadidi wa mudimu, bilondeshile tshitupa tshidibu bakonkonona, anu mudi tshikoso tshidi tshilonda tshileja.

Mu bisumbu bidi ne bakulu bakese, basadidi ba mudimu badi bakumbane ne badi baleja busunguluji ne dijingulula dia malu badi mua kukonkonona nkonko ya kuela badi basue kubatijibua idi mu “Tshitupa tshia 1: Malongesha a buena Kristo.” Anu bakulu ke badi ne bua kuela bantu nkonko ya mu “Tshitupa 2: Nsombelu wa buena Kristo.” Mu bisumbu mudi kamuyi bana betu ba balume bakumbane ba bungi, badi mua kubikila mutangidi wa tshijengu bua kumanya bikala bakulu ba mu tshisumbu tshidi pabuipi ni badi mua kuambuluisha.

Padi muntu udi ujinga kubatijibua muikale muana mutekete, baledi bende bena Kristo badi ne bua kuikalaku padibu bakonkonona nende. Baledi bobu kabayi ne mushindu wa kuikalaku, dîba adi bakulu babidi (anyi mukulu umue ne musadidi wa mudimu, bilondeshile tshitupa tshidibu bakonkonona) ke bikala ne bua kukonkonona tshitupa tshionso.

Bakulu nebadienzeje bua kumanya bikala muntu udi ujinga kubatijibua au ne dimanya dikumbane dia malongesha a nshindamenu a mu Bible. Nebenze kabidi bua kujadika bikalaye wanyisha bulelela bikole ne unemeka bulongolodi bua Yehowa mudibi bikengela. Muntu au yeye kayi mumvue malongesha a nshindamenu a mu Bible bimpe, bakulu nebalongolole mushindu wa kumuambuluisha bua kuluaye kubatijibua musangu mukuabu. Bua bakuabu, bidi bikengela kubashila dîba bua banji kuleja mudibu banange mudimu wa buambi anyi mudibu bakokela malu adi bulongolodi bua Nzambi bulongolole. Bakulu badi ne bua kuikala ne busunguluji bua kumanya mutantshi udibu mua kuenza bua kukonkonona tshitupa tshionso bua kujingulula bikala muntu udi usua kubatijibua mukumbane bua kubatijibua. Nansha mudi imue nkonko mua kuangata minite ya bungi kupita mikuabu, badi ne bua kukonkonona nkonko yonso.

Bakulu badibu bapeshe mudimu wa kukonkonona ne muntu udi musue kubatijibua nebapetangane padibu bajikija kukonkonona nende tshitupa tshibidi bua kumonabu bikalaye mukumbane bua kubatijibua anyi kayi mukumbane. Bakulu nebatangile mushindu udi muntu ne muntu mukole, lungenyi luende, ne nsombelu mikuabu idi imutangila. Tudi tukeba bantu badi badifile kudi Yehowa ne muoyo wabu mujima ne bumvue bimpe malongesha a nshindamenu a mu Bible. Nuenu bambuluishe bantu badi bajinga kubatijibua bimpe, nebikale bakumbane bua kukumbaja mudimu wabu wa mushinga wa diyisha lumu luimpe.

Pashishe, mukulu umue anyi bonso babidi bavua bayukile ne muntu au nebamonangane nende bua kumuambila bikalaye mukumbane anyi kayi mukumbane bua kubatijibua. Bikalaye mukumbane bua kubatijibua, bakulu nebakonkonone nende tshiena-bualu tshia “Diyukidilangana dia ndekelu ne bantu badi basue kubatijibua” tshidi mu dibeji dia 206-207. Bikala muntu udi ujinga kubatijibua kayi muanji kujikija kulonga mukanda wa Shala ne muoyo kashidi!, bakulu badi ne bua kumukankamija bua ajikije kuwulonga yeye mumane kubatijibua. Numanyishe muntu udi ubatijibua ne: nebafunde dituku diende dia batismo mu Fishi wa mumanyishi wa tshisumbu udibu bamuenzele. Numuvuluije ne: bakulu badi bamulomba amue malu adi amutangila bua bulongolodi buetu bumone mua kulombola midimu ya Bantemu ba Yehowa pa buloba bujima, kabidi bua ikale wenza midimu ya mu nyuma, ne upeta diambuluisha dia mu nyuma. Bualu bukuabu, bakulu badi bambila bamanyishi bapiabapia ne: badi bakonkonona malu adi abatangila bilondeshile mikenji ya Bantemu ba Yehowa ya buloba bujima ya mua kukuba malu abu, idi mu site wa jw.org. Diyukidilangana edi didi ne bua kuenzeka anu mu minite dikumi anyi mikese.

Tshidimu tshijima mumanyishi mumane kubatijibua, bakulu babidi badi mua kumonangana nende bua kumukankamija ne mibelu mimpe. Umue wa ku bakulu abu udi ne bua kuikala mutangidi wa kasumbu kabu ka buambi. Bikala udi mubatijibue au mmuana mutekete, baledi bende bena Kristo badi ne bua kuikalapu. Bakulu abu badi ne bua kuenza bua muyuki wabu wenzeke bimpe, mu mushindu udi ukoleshangana. Bakulu nebayukile nende bua mudi malu ende a mu nyuma enda ne nebamupeshe mibelu mimpe ya mudiye mua kutungunuka ne kudilongela Bible ne kumubala dituku dionso, mua kuenza ntendelelu wa mu dîku, mua kulongolola bisangilu, kubuelamu ne kuandamunamu, ne bua programe wende wa buambi wa ku lumingu. (Ef. 5:15, 16) Yeye kayi muanji kujikija dilonga dia mukanda wa Shala ne muoyo kashidi!, bakulu badi ne bua kumukebela muntu bua amulongeshawu ne awujikije. Bakulu badi ne bua kumuela kalumbandi ne muoyo mujima. Pa tshibidilu, mbimpe kupesha muntu mibelu ne kumuleja tshia kuenza bua bualu bumue anyi abidi patupu.