Tshisakidila

Dimanyisha kudi baledi bena Kristo:

Bu muudi muledi, udi musue kuambuluisha bana bebe bua banange Yehowa ne badilambule kudiye. Ntshinyi tshiudi mua kuenza bua kubafikisha ku batismo? Ndîba kayi diakumbanabu bua kuenza bualu bua mushinga ebu?

Yezu wakatumina bayidi bende dîyi ne: “Nuvuije bantu ba mu bisamba bionso bayidi, nubabatiza.” (Mat. 28:19) Bilondeshile dîyi dituma edi, bualu bua kumpala budi bukengedibua bua kufika ku batismo nkuikala muyidi, mmumue ne: kumvua malongesha a Kristo, kuitabuja, ne kuatumikila kabidi bimpe menemene. Ebu mbualu budibu mua kukumbaja nansha kudi bana batshidi bapuekele.

Ikala tshilejilu tshimpe kudi bana bebe, ubueje malongesha a Yehowa mu mioyo yabu. (Dut. 6:6-9) Abi bidi biumvuija kubalongesha malu adi mu mukanda wa Shala ne muoyo kashidi! bua kubumvuija malongesha a nshindamenu a mu Bible ne kubalongolola bua kuikalabu batumikila mêyi manene a mu Bible. Ubambuluishe bua bamanye mua kumvuija malongesha adibu bitabuja mu mêyi abu nkayabu. (1 Pet. 3:15) Dimanya ne dikankamija bidibu bapetela kuudi, mu didilongela diabu, mu ntendelelu wa mu dîku, mu bisangilu bia tshisumbu ne kudi balunda bimpe nebibambuluishe bua kuya too ne ku batismo, nansha kabidi ne panyima pa batismo. Baleja bipatshila bia mu nyuma bidibu mua kudifundila.

Nsumuinu 20:11 udi wamba ne: “Nansha muana badi bamumanyina ku malu adiye wenza, bikala bienzedi biende bikezuke ne biakane.” Ngamue malu kayi adi mua kuleja ne: muana wa balume anyi wa bakaji mmulue muyidi wa Yezu Kristo ne mmukumbane bua kubatijibua?

Muana udi uya kumpala bua kubatijibua udi ne bua kuikala utumikila baledi bende. (Bien. 5:29; Kolos. 3:20) Bible udi wamba bua Yezu pavuaye ne bidimu 12 ne: ‘Wakatungunuka ne kukokela baledi bende.’ (Luka 2:51) Bushuwa, kutekemenyi bua muanebe ikale wenza malu bu muntu mupuangane to. Kadi muana udi ujinga kubatijibua neadienzeje bikole bua kulonda tshilejilu tshia Yezu ne kumanyika bu muana udi ukokela baledi bende.

Nealeje kabidi mudiye ne dijinga dia kulonga malu malelela a mu Bible. (Luka 2:46) Muanebe utu munange kubuela mu bisangilu ne kufilamu mandamuna anyi? (Mis. 122:1) Utu ne nyota ya kubala Bible misangu yonso ne kudilongela pa tshibidilu anyi?​—Mat. 4:4.

Muana udi uya mutangile ku batismo udi udienzeja bua kuteka malu a Bukalenge pa muaba wa kumpala. (Mat. 6:33) Mmumanye bujitu budiye nabu bua kuambila bakuabu malu adiye witabuja. Udi uyisha mu mishindu mishilashilangane, kayi umvua bundu bua kudimanyisha kudi balongeshi babu ne balongi babu bua mudiye Ntemu wa Yehowa. Udi udifila ku midimu idibu bamupesha mu Tshisangilu tshia Nsombelu ne mudimu wetu, uyenza ne muoyo mujima.

Udi kabidi udienzeja bikole bua kuepuka balunda babi bua kushala mukezuke mu bikadilu. (Nsu. 13:20; 1 Kol. 15:33) Abi nebimuenekele mu malu atuye musue bu mudi mijiki, filme, programe ya ku TV, manaya a video, ne bituye wenza ku Enternete.

Bana ba bungi mbaye kumpala bua didienzeja dikole dia baledi babu, bafike ku dinanga bulelela, ne ku dikumbaja malu malomba bua kubatijibua batshidi bapuekele. Yehowa anubeneshe panudi nuambuluisha bana benu bua kukumbaja bualu ebu budi ne mushinga mu malanda abu ne Yehowa.

Dimanyisha kudi mumanyishi udi kayi muanji kubatijibua:

Kuenzela Nzambi mudimu pamue ne tshisumbu bu mumanyishi udi kayi muanji kubatijibua ndiakalenga dinene. Tudi tukuela kalumbandi bua mushindu uudi muye kumpala mu nyuma. Dilonga diebe dia Dîyi dia Nzambi ndikuambuluishe bua kumumanya ne kuitabuja malu adiye mulaye.​—Yone 17:3; Eb. 11:6.

Kumpala kua wewe kutuadija kulonga ne Bantemu ba Yehowa, uvua mua kuikala mu tshitendelelu tshikuabu anyi mene kuyi mu tshitendelelu nansha tshimue to. Pamuapa uvua wenza mudimu kampanda uvua kawuyi umvuangana ne mêyi manene a mu Bible. Kadi mpindieu udi muleje ditabuja diebe paudi munyingalale, mmumue ne: mumvue bibi menemene bua malu mabi auvua muenze kale, udi kabidi muleje ditabuja diebe paudi mukudimune mutshima, mmumue ne: mulekele malu mabi onso ne mudisuike bua kuenza malu adi makane ku mêsu kua Nzambi.​—Bien. 3:19.

Bualu bukuabu, pamuapa “katshia ku buana buebe” udi mumanye mifundu ya tshijila. Kuvua muenze malu adi bena Kristo kabayi benza anyi malu mabi manene to. (2 Tim. 3:15) Udi mulonge mua kukandamena bena mulongo nebe badi bakusaka bua kuenza malu mabi ne mukandamene malu makuabu adi afikishangana ku dienza malu adi mabi ku mêsu kua Yehowa. Udi muleje ditabuja bualu udi mulamate ntendelelu mulelela ne umanyisha bakuabu malu audi muitabuje. Udi mulonge mua kuyisha. Mpindieu udi muangate dipangadika dia kuenzela Yehowa mudimu bu mumanyishi udi kayi muanji kubatijibua.

Nansha wewe mulue kumanya Yehowa ku bukulumpe anyi mulonge mikenji yende katshia ku buana, mpindieu udi mua kuikala wela meji a kuenza malu abidi aa bua kuya kumpala mu nyuma: didilambula ne batismo. Udi udilambula kudi Yehowa paudi wenza disambila ne umuleja dipangadika diudi muangate dia kumulamata anu yeye bua kashidi. (Mat. 16:24) Bua kuleja muudi mudilambule, udi ubatijibua padibu bakuina mu mâyi. (Mat. 28:19, 20) Paudi udilambula ne ubatijibua, udi ulua pebe muena mudimu wa Yehowa Nzambi. Edi ndiakalenga dinene be!

Kadi anu bu muuvua mulonge mu Bible, udi mua kupeta ntatu mishilashilangane. Vuluka ne: “nyuma wakalombola Yezu mu tshipela bua Diabolo kumuteta” panyima pa dibatijibua diende. (Mat. 4:1) Paudi ubatijibua ne ulua muyidi wa Kristo, udi mua kupeta mateta makuabu. (Yone 15:20) Mateta au nealue mu mishindu ya bungi. Bena mu dîku dienu badi mua kutuadija kukuluisha. (Mat. 10:36) Badi mua kukuseka kudi balongi benu, bena mudimu nebe, anyi balunda bebe ba kale. Kadi wikale anu uvuluka mêyi a Yezu adi mu Mâko 10:29, 30 aa: “Bulelela ndi nnuambila ne: Kakuena muntu udi mushiye nzubu anyi bana babu ba balume anyi bana babu ba bakaji anyi mamuende anyi tatuende anyi bana anyi madimi bua bualu buanyi ne bua bualu bua lumu luimpe wapanga kupeta misangu lukama kupita, mpindieu mu tshikondo etshi, nzubu, bana babu ba balume, bana babu ba bakaji, bamamu, bana ne madimi, pamue ne makenga, ne mu ndongoluelu wa malu udi ulua, muoyo wa tshiendelele.” Nunku tungunuka ne kuenza muebe muonso bua kushala pabuipi ne Yehowa ne kutumikila mikenji yende miakane.

Paudi ujinga kubatijibua, wambile mutangidi wa malu a kasumbu ka bakulu. Bakulu nebakonkonone nebe nkonko idi ilonda panyima pa dimanyisha edi bua kumanyabu ni udi mukumbane bua kubatijibua. Udi mua kutuadija kuyikonkonona wewe nkayebe mu programe webe wa didilongela diebe dia pa tshibidilu.

Paudi wenda udilongolola, wikale ubala mvese idibu batele mêyi ayi tshianana ne welangane meji bua mêyi au. Udi mua kufunda tumue tumalu mu mukanda eu anyi muaba mukuabu. Udi mua kutapamu dîsu ne kuikala ne mukanda eu mubulula padi bakulu bakonkonona nebe. Wewe kuyi mumvue lukonko kampanda bimpe, udi mua kuebeja mulongeshi webe wa Bible anyi bakulu.

Padi bakulu bakonkonona nebe, kuedi meji ne: bidi bikengela kufila mandamuna male anyi makole mua kuumvua to. Diandamuna dipepele diudi ufila buludiludi ku lukonko mu mêyi ebe nedikale ditambe buimpe. Nkonko ya bungi idi mua kukulomba bua kufila anu mvese umue anyi ibidi bua kushindika diandamuna diebe.

Wewe kuyi muanji kupeta dimanya dikumbane dia malongesha a nshindamenu a mu Bible, bakulu nebalongolole mushindu wa kukuambuluisha bua umanye mua kumvuija malu a mu Bible mu mêyi ebe ne ukumbane bua kubatijibua tshikondo tshikuabu.

[Dimanyisha kudi bakulu: Mbaleje mushindu wa nuenu kuyukidilangana ne bantu badi basue kubatijibua mu dibeji dia 208-212.]