Tshishima ku Mbuu Mukunze

Diakamue pakumvua Palô ne: bena Isalele mbumbuke mu Ejipitu, wakashintulula dipangadika diende dia kubalekela bua baye. Wakambila bena mvita bende ne: ‘Longololayi matempu anyi a mvita onso, tubalondakajayi! Katuena ne bua kubalekela baya to.’ Yeye ne bantu bende bakatuadija kulondakaja bena Isalele.

Yehowa uvua ulombola bantu bende ku diambuluisha dia ditutu mu munya, ne dia kapia butuku. Wakabalombola ku Mbuu Mukunze, ne kubambilaye bua kuasa tshitudilu.

Pashishe bena Isalele bakamona Palô ne tshiluilu tshiende benda babalondakaja. Bakadimona pankatshi pa mbuu ne tshiluilu tshia bena Ejipitu. Bakadidila Mose ne: ‘Tudi tufua mpindieu! Uvua mua kutulekela mu Ejipitu.’ Kadi Mose wakamba ne: ‘Kanutshinyi to. Imanayi numone mudi Yehowa utupandisha.’ Mose uvua bushuwa mueyemene Yehowa, ki mmuomu anyi?

Yehowa wakambila bena Isalele bua kuasabu luendu. Butuku abu, Yehowa wakateka ditutu pankatshi pa bena Ejipitu ne bena Isalele. Ku luseke luvua bena Ejipitu kuvua mîdima. Kadi ku luseke luvua bena Isalele kuvua butoke.

Yehowa wakambila Mose bua olole tshianza tshiende pa mutu pa mbuu. Pashishe Yehowa wakatuma lupepele lukole butuku bujima. Mbuu wakakosoloka bitupa bibidi, ne njila wakashala munkatshinkatshi mua mbuu. Bena Isalele miliyo ya bungi bakendela pa buloba bume, mâyi menze tshimanu ku dia balume ne ku dia bakaji diabu.

Tshiluilu tshia Palô tshiakalonda bena Isalele mu mbuu pa buloba bume. Pashishe Yehowa wakabueja tshiluilu etshi mu kayumbayumba. Nkata yakatuadija kutuka ku matempu abu a mvita. Basalayi bakela dîyi ne: ‘Tupatukayi muaba eu! Yehowa udi ubaluila mvita.’

Yehowa wakambila Mose ne: ‘Olola tshianza tshiebe pa mutu pa mbuu.’ Diakamue bimanu bia mâyi biakakulukila tshiluilu tshia bena Ejipitu. Palô ne bantu bende bonso bakafua. Nansha umue wa kudibu kakapanduka to.

Dia muamua dia mbuu, tshisumbu tshinene tshia bantu tshivua tshimba musambu tshitumbisha Nzambi ne: “Imbilayi Yehowa, bualu mmutumbishibue bikole. Kabalu ne uvua mukabande, yeye mmubiele mu mbuu.” Pavua bantu bimba misambu, bantu bakaji bavua baja maja ne bimba ngoma. Muntu yonso uvua ne disanka bua muvuabu mpindieu bapikudibue menemene.