Badi benza mutshipu kudi Yehowa

Ngondo mitue ku ibidi bena Isalele bamane kupatuka mu Ejipitu, bakafika ku mukuna wa Sinai, kuasabu tshitudilu. Yehowa wakabikila Mose uvua mubande ku mukuna eu, kumuambilaye ne: ‘Ngakapandisha bena Isalele. Bobu bantumikile ne balonde mikenji yanyi, nebalue tshisamba tshianyi tshia pa buatshi.’ Mose wakapueka, kuambilaye bena Isalele malu avua Yehowa mumuambile. Bakenza tshinyi? Bakandamuna ne: ‘Netuenze malu onso adi Yehowa utuambila bua kuenza.’

Mose wakabanda kabidi ku mukuna. Kuoku eku, Yehowa wakamuambila ne: ‘Nengakule nebe mu matuku asatu emu. Udimuije bantu bua kabatetshi bua kulua ku mukuna wa Sinai to.’ Mose wakapueka, kuambilaye bena Isalele bua badilongolole bua kumvuabu malu a kudi Yehowa.

Matuku asatu pashishe, bena Isalele bakamona mipenyi ne ditutu difiike pa mukuna. Bakumvua kabidi dikubakuba dikole ne muadi wa mpungi. Pashishe Yehowa wakapueka mu kapia pa mukuna eu. Bena Isalele bakumvua buôwa bua bungi kutuadijabu too ne kuzakala. Mukuna wonso wakakanka bikole ne uvua mubuikila kudi muishi. Muadi wa mpungi uvua wenda anu ubanda bikole. Pashishe Nzambi wakamba ne: ‘Meme ndi Yehowa. Kanuena ne bua kutendelela nzambi mikuabu nansha.’

Mose wakapingana ku mukuna, mpindieu Yehowa kumupesha mikenji ya muvua bena Isalele ne bua kumutendelela ne muvuabu ne bua kuenza malu. Mose wakafunda mikenji ayi ne pashishe kuyibadilaye bena Isalele. Bakalaya ne: ‘Netuenze malu onso adi Yehowa utuambila bua kuenza.’ Bushuwa, bakaditshipa kudi Nzambi. Kadi bavua mua kukumbaja mutshipu wabu anyi?