Yelushalema ntshimfuanyi tshia bukua buena Kristo anyi?

Ku kale, mikanda yetu ivua yamba ne: bena mu Yelushalema batontolodi bavua tshimfuanyi tshia bena mu bukua buena Kristo. Malu avua enzeka mu Yelushalema, bu mudi ditendelela dia mpingu ne dikosangana dia mishiku divua ditue mpokomba, mmafuanangane ne adi enzeka mu bitendelelu bia bukua buena Kristo lelu. Nansha nanku, matuku adi panshi aa, katuena bakule mu mikanda yetu, too ne uudi ubala eu, bua milayi ya kale bu tshimfuanyi tshia bualu bulelela to, anu Bible yeye mutuanyishile bua kuenza nanku. Bible udiku uleja ne: Yelushalema uvua tshimfuanyi tshia bitendelelu bia bukua buena Kristo anyi? Tòo.

Mona bua tshinyi tudi tuamba nanku: Kuvua musangu uvua Yelushalema muikale muaba munene wa ntendelelu mukezuke; kadi benamu kuluabu batontolodi. Kadi bitendelelu bia bukua buena Kristo kabituku bianji kulua muaba wa ntendelelu mukezuke to. Katshia anu bitendelelu ebi biatuadija mu bidimu bia 500 P.Y., bitu anu ne malongesha a dishima.

Bualu bukuabu, bena Babilona bamane kubutula Yelushalema, Yehowa wakalua kuanyisha tshimenga atshi, kutshivuijaye kabidi muaba wa ntendelelu mulelela. Kadi katshia Nzambi katu muanji kuanyisha bitendelelu bia bukua buena Kristo to. Pabibutulabu mu dikenga dinene, kabiakujuka kabidi nansha kakese.

Mpindieu tudi mua kukuata tshinyi mu lungenyi? Patudi tubala mêyi a buprofete a mu Bible avua makumbanyine bena mu Yelushalema bavua kabayi ne lulamatu, tudi mua kudiambila ne: ‘Bualu ebu mbufuanangane ne bitu bienzeka mu bukua buena Kristo lelu.’ Kadi Mifundu kayena yamba muaba nansha umue ne: Yelushalema uvua tshimfuanyi tshia bitendelelu bia bukua buena Kristo to.