Dilumbuluishibua dia balongeshi ba dishima kudi Yehowa
“Ndi mumone malu a muendi kudi baprofete ba ku Yeruzaleme: kuenda masandi ne kuendela mu dishima . . . Buonso buabo mbalue bu Sodomo ku mêsu kuanyi, ne bantu badi bâsemu mbalue bu Gomore.”—YELEMIYA 23:14.
1. Bua tshinyi muntu udi mudifile mu mudimu wa kulongesha dilongesha dia Nzambi mmudiomekele bujitu butambe bunene?
MUNTU yonso udi mudifile mu dilongesha mukuabu dilongesha dia Nzambi mmuambule bujitu butambe bunene. Mu Yakobo 3:1, tudi tusangana didimuija edi: “Bana betu, bavule munkatshi muenu kabadienji balongeshi, bualu nudi bamanye se: netupete dilumbuluishibua dipite bukole.” Eyowa, balongeshi ba Dîyi dia Nzambi mbuomekela bujitu bua kufila dimanyisha dia kueyemena, kupita bena nkristo bakuabo buonso. Abi bidi biumvuija tshinyi bua aba badi badisokolola se: mbalongeshi ba dishima? Bua kuandamuna ku lukonko elu, tukonkononayi nsombelu uvuaku mu tshikondo tshia Yelemiya ne tumone malu avua bu tshimfuanyi tshia bidi bienzeka mu matuku etu aa.
2, 3. Ndilumbuluisha kayi diakafundila Yehowa Yeruzaleme ku butuangaji bua Yelemiya?
2 Mu 647 K.B.B., mu tshidimu tshia 13 tshia bukokeshi bua mukalenge Joziase, Yelemiya wakatekibua bu muprofete wa Yehowa. Yehowa uvua tshilumbu ne Yuda, nanku wakatuma Yelemiya bua kumumanyishatshi. Baprofete ba dishima, peshi balongeshi ba dishima, ba mu Yeruzaleme bavua benza malu a bundu ku mêsu kua Nzambi. Bubi buabu buvua butambe bunene, e kufikisha Nzambi too ne ku difuanyikija Yeruzaleme pamue ne Yuda bu Sodomo ne Gomore. Yelemiya nshapita wa 23 udi utulondela bualu ebu. Mvese wa 14 udi wamba ne:
3 “Ndi mumone malu a muendi kudi baprofete ba mu Yeruzaleme: kuenda kua masandi ne kuendela mu dishima; ne mbakoleshishe bianza bia benji ba malu mabi bua kabumuki muntu ne muntu ku malu ende mabi. Buonso buabu mbavue ku mêsu kuanyi bu Sodomo, ne bantu badi basombemu [mbavue pabo] bu Gomore.”
4. Mmunyi mudi tshilejilu tshibi tshia balongeshi ba Yeruzaleme mu muanda wa ditumikila mikenji ya nsombelu mulenga wa tshitembu tshifuanangane ne bienzedi bia bukua-buena-nkristo lelu?
4 Bushuwa, baprofete aba, peshi balongeshi, bavua bafila tshilejilu tshipite bubi mu muanda wa ditumikila mikenji ya nsombelu wa tshitembu, ne kabidi, bavua bakankamija bantu bua kuidikija bienzedi biabu. Monayi nsombelu udi mu bukua-buena-nkristo bua matuku etu aa! Kabuena buenza pabu mushindu wa muomumue bu bena mu tshikondo tshia Yelemiya anyi? Mu matuku etu aa, bamfumu ba bitendelelu bena kulengulula badi banyisha mu milongo yabu bendi ba masandi ne bakaji badi benda masandi ne bakaji nabu pamue ne balume badi benda masandi ne balume nabu, ne mbabalekele bend’amu balongesha ne balombola bibilu bia malu a Nzambi. Bidi mua kukemesha padi bena mu ekleziya bavule bikale pabo ne nsombelu mubi anyi?
5. Bua tshinyi bidi mua kuambibua ne: nsombelu munyanguke udi mu bukua-buena-nkristo mmubi kupita eu uvua mu Sodome ne Gomore?
5 Yehowa wakafuanyikija bantu bavua bâse mu Yeruzaleme ne aba ba mu Sodomo ne Gomore. Kadi, nsombelu wa bukua-buena-nkristo mmubi kupita mene ne wa Sodomo ne Gomore. Eyowa, kudi bivule bidi Yehowa mua kubabadila ne kubapiisha nabi. Balongeshi babu mbabiipishe mikenji ya bena nkristo ya nsombelu mulenga. Bu tshipeta, nkumueneke nsombelu wa dishipa mikenji udi usaka ku bubi bua mishindu yonso. Nsombelu eu munyanguke udi mumuangalake mu matuku etu aa mudi malu mabi angatshibua bu makumbanyine kueenza.
“Kuendela mu dishima”
6. Ntshinyi tshiakamba Yelemiya pa bidi bitangila bubi bua baprofete ba Yeruzaleme?
6 Tutangilayi mpindieu tshidi mvese wa 14 wamba bua baprofete ba mu Yeruzaleme. Bavua ‘benda mu dishima.’ Tshitupa tshia ndekelu tshia mvese wa 15 tshidi tshijadika ne: “Butontolodi buvua bufuma kudi baprofete ba ku Yeruzaleme mbumuangalake mu ditunga dijima.” Pashishe, mu mvese wa 16, tudi tubala ne: “Etshi ke tshidi Yehowa wa biluilu wamba: ‘Kanuteleji mêyi a baprofete badi banumanyisha milayi. Badi banuvuija patupu. Tshikena-kumona tshia mu mitshima yabu nkayabu ke tshidibo bamba—ki ntshifume mukana mua Yehowa nansha.’”
7, 8. Bua tshinyi bamfumu ba bitendelelu bia bukua-buena-nkristo mbafuanangane ne baprofete ba dishima bavua mu Yeruzaleme, ne mbuenzeji kayi budibu nabu kudi bena kuitabuja nabu?
7 Anu bu baprofete ba dishima ba mu Yeruzaleme, bamfumu ba bukua-buena-nkristo badi benda pabo mu dishima pa kumuangalaja malongesha a butontolodi, malongesha adi kaayi asanganyibua mu Dîyi dia Nzambi. Bu amue a ku malongesha aa, tutele dibenga kufua dia anyima, Busatu-Bunsantu, mpurgatoriyo ne inferno wa kapia muakengeshibua bantu babi kashidi. Bamfumu ba bitendelelu badi bafunya matshi a bantu badi basue kubateleja pa kubalongesha anu malu atu bantu banange bua kuteleja. Badi bamba bambulula ne: tshipupu nansha tshimue katshiena mua kukuata bukua-buena-nkristo bualu badi ne ditalala dia Nzambi. Kadi, “ntshikena-kumona tshia mu mitshima yabu nkayabo” tshidi bamfumu ba bitendelelu bumvuija. Tshikena-kumona etshi ntshia dishima. Aba badi bitabuja mashimi mushindu’eu badi bapeshibua lulengu lua mu nyuma. Badi bapambushibua bua kubutudibua kuabu nkayabo!
8 Tukonkononayi tshidi Yehowa wamba bua balongeshi aba ba dishima mu mvese wa 21: “Tshiena mutume baprofete, kadi monayi, mbaye bâse lubilu. Tshiena mubambile bualu nansha bumue, kadi monayi mbadifidile nkayabo milayi.” Nenku, lelu’eu, bamfumu ba bitendelelu ki mbatumibue kudi Nzambi to, anu bu mudibo kabayi balongesha malu ende malelela. Tshipeta tshidi tshinyi? Dipanga dimanya dia mu Bible didi dikuatshisha buôwa kudi bena kuitabuja, dipanga didi difuma ku muanda eu: ba-ministre babu ba malu a Nzambi badi babukutshisha ne filozofi ya mu bulongolodi ebu.
9, 10. (a) Mbilota bia mushindu kayi bivua balongeshi ba dishima ba Yeruzaleme bapeta? (b) Bia muomumue, mmunyi mudi bamfumu ba bitendelelu balongesha pabu “bilota bia dishima”?
9 Kabidi, bamfumu ba bitendelelu badi bamanyisha matekemena a dishima lelu’eu. Monayi tshidi mvese wa 25 wamba: “Ndi mumvue tshidibo bambe kudi baprofete badi bamanyisha milayi ya dishima mu dîna dianyi, bamba ne: ‘Ndi mupete tshilota! Ndi mupete tshilota!’” Mbilota bia mushindu kayi abi? Mvese wa 32 udi wandamuna ne: “‘Monayi ndi mubenge baprofete ba bilota bia dishima,’ aa mmêyi a Yehowa, ‘badi babilonda ne bapambuisha tshisamba tshianyi anu bua mashimi abo ne bua lutambishi luabu. Pabi, meme tshivua mubatume, ne tshivua mubatumine dîyi. Nunku, kabakuikala ne dikuatshisha nansha dikese bua tshisamba etshi,’ aa mmêyi a Yehowa.”
10 Mbilota, peshi mmatekemena kayi a dishima adi bamfumu ba bitendelelu balongesha? Badi bamba ne: ditekemena dimuepele dia kumona ditalala ne bukubi bijadikibua mu tshikondo tshietu etshi m’Bulongolodi bua Matunga Masanga (O.N.U.). Mu bidimu biashadi ebi, bena-mpala babu bakabikila bulongolodi ebu bu “ditekemena dia ndekelu bua diumvuangana ne ditalala,” bu “kabadi katamba tukuabu ka ditalala ne kulumbuluisha kuakane,” bu “ditekemena dia kumpala bua ditalala dia pa buloba bujima.” Ntshilema kayipu bunene! Ditekemena dimuepele bua bukua-bantu m’Bukalenge bua Nzambi. Kadi bamfumu ba bitendelelu kabena bamanyisha nansha kabena balongesha bulelela budi butangila mbulamatadi eu wa mu diulu, mbulamatadi uvua mene tshiena-bualu tshinene tshia dilongesha dia Yezu.
11. (a) Mbuenzeji kayi bubi buvua nabu balongeshi ba dishima ba ku Yeruzaleme pa dîna dia Nzambi? (b) Bishilangane ne biakenza kasumbu ka Yelemiya, ntshinyi tshidi balongeshi ba dishima ba bitendelelu benze pa bidi bitangila dîna dia Nzambi lelu’eu?
11 Mvese wa 27 udi utuambila bivule: “Badi bela meji a kufikisha tshisamba tshianyi ku dipua dîna dianyi muoyo, ku diambuluisha dia bilota biabo bidibo batungunuke ne kulondelangana umue kudi mukuabo, anu bu muvua ba-tatuabo bapue dîna dianyi muoyo ku diambuluisha dia Baala.” Baprofete ba dishima ba ku Yeruzaleme bavua bafikisha tshisamba ku dipua dîna dia Nzambi muoyo. Mu tshikondo tshietu etshi, balongeshi ba dishima bena malu a Nzambi kabena pabo benza bia muomumue anyi? Kupita apu mene, badi basokoka dîna dia Nzambi, Yehowa. Badi balongesha se: kabiena ne dikuatshisha bua kutumika nadi, ne [bakuabu] mbafike ne ku didiumbusha mu nkudimuinu yabu ya Bible. Kabidi, badi baluisha ne tshikisu tshionso muntu yonso udi ulongesha ne: dîna dia Nzambi n’Yehowa. Bishilangane nabu, kasumbu ka Yelemiya ka bashadile ba ku bena nkristo bela manyi a mu nyuma, pamue ne benzejanganyi nabo ba mudimu, mbenze anu muvua Yezu muenze. Mbamanyishe dîna dia Nzambi kudi bantu miliyo mivule.—Yone 17:6.
Ditandudibua dia tshibawu tshiabu
12. (a) Bua tshinyi dibanza dia mashi didi nadi balongeshi ba malu a Nzambi ba dishima ndinenanenayi? (b) Ntshitupa kayi tshivua bamfumu ba bitendelelu natshi mu mvita yonso ibidi ya buloba bujima?
12 Kasumbu ka Yelemiya nkatandule misangu mivule bamfumu ba bitendelelu pa kumanyisha ne: bine aba mbalongeshi ba dishima badi balombola bena kuitabuja babo mu njila mualabale udi ufikisha ku kabutu. Eyowa, bashadile [ba ku bela manyi a mu nyuma] mbaleje patoke bua tshinyi bena bilota aba mbakumbanyine tshibawu tshia kudi Yehowa. Tshilejilu, basadidi ba Yehowa batu batela misangu mivule Buakabuluibua 18:24, mutudi tubala ne: munkatshi mua Babilone Munene mbasanganamu mashi a “aba buonso bakakoshibua muminu pa buloba.” Anjayibi kuvuluka mvita yonso itu mibudike anu bua bilumbu pankatshi pa bitendelelu. Balongeshi ba dishima bena malu a Nzambi mbena dibanza dia bantu bungi kabuyi kubala batu bashipibue! Malongesha abo mmakebeshe matapuluka ne mmasonsole nkuna pankatshi pa bantu bena mitabuja ne matunga bishilangane. Pa bidi bitangila Mvita ya Kumpala ya buloba bujima, mukanda wa Bamanyishi badi baleja bingoma (angl.) udi wamba ne: “Bamfumu ba bitendelelu bakasuikakaja mvita ku malu a mu nyuma ne kuyipesha bukole bua kulubulukayi. . . . Nunku, ekleziya uvua mutambe kudiina mu mvita.” Bivua bia muomumue bua Mvita Mibidi ya buloba bujima. Bamfumu ba bitendelelu bavua menemene batua matunga avua aluishangana nyama ku mikolo ne babenesha biluilu biawu. Mu matunga mudi bukua-buena-nkristo bujame ke muakatuadijila mvita ibidi ya buloba bujima, ivua bena kuitabuja ba ekleziya imue imue mu matunga mashilangane bashipangana buobo nkayabo. Nansha lelu’eu kabidi, kudi bisumbu bia bena ditunga patupu ne bia bena kuitabuja mu bukua-bena-nkristo bitshidi bitungunuke ne kumuangalaja mashi munda muabi. Mbipeta kayipu bipite bubi bia malongesha abu a dishima!
13. Mmunyi mudi Yelemiya 23:22 ujadika ne: bamfumu ba bitendelelu bia bukua-buena-nkristo kabena ne malanda masheme ne Yehowa?
13 Bu nuenu mua kusua, monayi tshitudi mua kubala mu Yelemiya, nshapita wa 23, mvese wa 22: “Pabi, bu buobo bikale mu kasumbu kanyi ka pa muoyo, nenku bavua mua kumvuija tshisamba tshianyi mêyi anyi, ne bavua mua kuikala babapingaje bua kulekelabo njila wabo mubi ne bienzedi biabo bibi bidibo benza.” Bu baprofete bena malu a Nzambi bena mu bukua-buena-nkristo basanganyibua mu kasumbu ka Yehowa ka pa muoyo, bashemeje nende bulunda, anu bu mudi musadidi wa lulamatu ne wa budimu mua kuenza, nunku bavua mua kuikala banemeke mikenji ya Yehowa. Buobo pabo bavua mua kuikala bambile bena mu bukua-buena-nkristo mêyi a Nzambi. Kadi, pamutu pa kuenza nanku, balongeshi ba dishima ba mu tshikondo tshietu etshi mbavuije bena kuitabuja babo basadidi bafofo ba Muluishi wa Nzambi, Satana Diabolo.
14. Nditandudibua dia bubi dia mushindu kayi diakenzeka mu 1958 pa bidi bitangila bamfumu ba bitendelelu?
14 Kasumbu ka Yelemiya nkatandule bamfumu ba bitendelelu ne bukole buonso. Tshilejilu, mu Mpuilu wa Bantemu wa bukua-matunga wa “Disua dia Nzambi” wakenzeka mu 1958 mu tshimenga tshia New York, muludiki-tshindondi wa Société Watch Tower wakamanyisha dipangadika diena mêyi makese adi alonda aa: “Kakuyi mpata anyi dielakana nansha dikese, tudi tuamba ne: tshiledi tshia bibawu bionso, buenzavi, lukuna, mvita, bibandabanda, . . . ne bimvundu tshidi’anu bitendelelu bia dishima, bidi muluishi ukena-umueneka, Satana Diabolo, muimane munyima muabi. Bantu badi ne dibanza dinene mu nsombelu udiku pa buloba bujima mbantunga-mulongo ne balongeshi ba malu a Nzambi, kadi bena tshibawu tshipite bunene munkatshi muabu mbamfumu ba bukua-buena-nkristo. . . . Kunyima kua bidimu bionso bidi bipite katshia ku Mvita ya Kumpala ya buloba bujima, bukua-buena-nkristo budi mu nsombelu wa muomumue ku mêsu kua Nzambi anu bu muvua Izalele mu tshikondo tshia Yelemiya. Bushuwa, bukua-buena-nkristo budi buya butangile ku kabutu kakuate buôwa ne kanene kapite kavua Yelemiya mumone kadituta pa Yeruzaleme.”
Dilumbuluishibua dia balongeshi ba dishima
15. Mmilayi kayi ya ditalala yakenza bamfumu ba bitendelelu? Neyikumbane anyi?
15 Nansha muvua didimuija edi difidibue, mmunyi mudi bamfumu ba bitendelelu bandamune katshia ku tshikondo atshi? Anu bu mudi mvese wa 17 ubileja menemene: “Badi bambila aba badi babule kanemu kundi ne bambulula ne: ‘Yehowa udi wamba ne: “Ditalala ke dinuapeta.”’ Ne aba buonso badi benda mu bupape bua mitshima yabo, mbabambile ne: ‘Tshipupu nansha tshimue katshiakunukuata.’” Mmêyi aa mmalelela anyi? Nansha kakese! Yehowa neatandule dishima dia milayi eyi ya bamfumu ba bitendelelu. Kakukumbaja bidibo bamba mu dîna diende to. Kadi, dimanyisha dia dishima dia bamfumu ba bitendelelu didi dishindikila bamue ne: badi mu ditalala ne Nzambi ndia dishima menemene!
16. (a) Nsombelu mulenga wa mu bulongolodi ebu udi munyi, ne nnganyi udi muambule bujitu bua bionso abi? (b) Ntshinyi tshidi kasumbu ka Yelemiya kenza pa bidi bitangila mmuenenu mibi eyi?
16 Pamu’apa, udi wela meji se: ‘Kuena mua kushimibua kudi malongesha a dishima a bamfumu ba bitendelelu to. Kadi, kutambi kudikokola pa tshiadi nansha!’ Uvuluke bua se: malongesha a dishima a bamfumu ba bitendelelu mmafikishe ku dilengulula dia nsombelu mukuate muendi muwule tente ne mateyi udiku lelu’eu. Malongesha abu a dilengulula bubi adi abingisha nsombelu kayi wonso, nansha yeye mubi wa mushindu kayi. Nsombelu eu mubipe mmumuangalake mu mishindu kayi yonso ya dijikija lutetuku: bindidimbi, programme mibi idi ilejibua ku televizion, bikandakanda ne mijiki. Nunku, bidi bikengela bua tuetu kuikala badimuke bikole bua kuepuka buenzeji bua masanka aa mabipe, kadi bidi bilobesha muinshi-muinshi bushuwa. Bitu bienzeka bua bansonga kudifila mu mijiki mibi ne kutangila bindidimbi bipange bukezuke ku video. Kanupu muoyo bua se: dilengulula dia bintu bia mushindu’eu kudi bena mu tshikondo tshietu etshi ntshipeta tshia malongesha a dishima a bamfumu ba bitendelelu, badi kabayi banemekija mêyi-maludiki makane a Nzambi. Kasumbu ka Yelemiya kadi kenza madikolela bua kutshimuna mmuenenu eyi mibi ne kadi kambuluisha basadidi ba Yehowa bua kuimansha ngenyi eyi mipange bukezuke mudi bukua-buena-nkristo buinangana.
17. (a) Bilondeshile Yelemiya, ndilumbuluisha kayi divua difundila Yeruzaleme mubule lulamatu? (b) Mu tshitupa tshîpi emu, ntshinyi tshienzekela bukua-buena-nkristo?
17 Ndilumbuluisha kayi dikala Yehowa, Mulumbuluishi munene, ne bua kufundila balongeshi ba dishima ba bukua-buena-nkristo? Mvese wa 19, 20, 39 ne wa 40 idi yandamuna ne: “Monayi, tshipepele tshikole tshia Yehowa, tshiji tshikole, netshipatuke bushuwa, eyowa, tshipepele tshikole tshidi tshivuanduluke. Netshivue kuvuanduluka pa mitu ya bantu babi. Tshiji tshia Yehowa katshiakupingana kudiye, too ne pakumbajaye dilumbuluisha diende, too ne pakumbajaye ngenyi ya mu mutshima wende. . . . Nengenze bua banupue muoyo, kashidi menemene, ne nennulekele, pamue ne tshimenga tshingakanupesha, nuenu ne ba-kakuenu—ku mpala kuanyi. Nennutentekejile tshipendu bua bikondo kabiyi bijadika, ne bundu bua bikondo kabiyi bijadika, bidibo kabayi mua kupua muoyo.” Malu aa wonso akenzekela Yeruzaleme muena bubi ne ntempelo wende popamue. Ne mu tshitupa tshîpi emu, tshipupu tshia muomumue netshiditute pa bena bukua-buena-nkristo bena muoyo mubi.
Dimanyisha “bujitu bua Yehowa”
18, 19. Yelemiya wakadianjila kumanyisha Yuda “bujitu” kayi “bua Yehowa,” pashishe mbipeta kayi biakalonda?
18 Mmudimu kayi udi nawu kasumbu ka Yelemiya ne binende? Mvese wa 33 udi utuambila mêyi aa: “Pakukonka tshisamba etshi, peshi muprofete, anyi muakuidi, pa kuamba ne: ‘Bujitu bua Yehowa budi tshinyi?’ apu wewe neubambile ne: ‘“Ng’wewe tshisamba mene—ekelekelee! udi bujitu kayipu! Ne, bushuwa nennulekele,” aa mmêyi a Yehowa.’”
19 Muaku wa tshiena-Ebelu mukudimuna ne: “bujitu” udi ne ngumvuilu ibidi. Udi mua kufunkuna dimanyisha dia Nzambi dineme ne njiwu mikole peshi tshintu kampanda tshidi tshizengeja muntu ne tshimupungija. Apa, tshiambilu “bujitu bua Yehowa” tshidi tshileja mulayi muneme—dimanyisha didi ne miaku ya se: Yeruzaleme uvua mufundila kabutu. Kadi, bena Izalele bakananga bua kuteleja mamanyisha a mushindu’eu a buprofete maneme a kudi Yehowa avua Yelemiya mutungunuke ne kubambila anyi? Nansha kakese, bena tshisamba bakaseka Yelemiya pa kumuambila ne: ‘Mmulayi (peshi bujitu) kayi uwapetshi? Tudi bashindike se: mulayi webe newikale bujitu budi bupungija kabidi!’ Kadi, Yehowa wakabambila tshinyi? Wakabambila ne: “Wewe tshisamba mene—ekelekelee! udi bujitu kayipu! Ne, bushuwa nennulekele.” Bushuwa, tshisamba etshi tshivua bujitu kudi Yehowa, nunku, uvua ne bua kutshijimija bua kudiumbusha bujitu buvuatshi tshimomekele.
20. Lelu’eu “bujitu bua Yehowa” ntshinyi?
20 “Bujitu bua Yehowa” mu matuku etu aa budi tshinyi? Mmukenji wa buprofete muneme ne njiwu mikole mupatula mu Dîyi dia Nzambi. Mmuneme ne makenga, bualu udi umanyisha kubutuka kukadi pabuipi kua bukua-buena-nkristo. Tuetu bena tshisamba tshia Yehowa, tudi ne mudimu munene wa kumanyisha “bujitu bua Yehowa” ebu. Bu mudi nshikidilu wenda usemena, tudi ne bua kuambila bantu buonso bua se: bena mu bukua-buena-nkristo bena tshitshiu badi “bujitu,” “ekelekelee! udi bujitu kayipu!” bua Yehowa Nzambi, ne neadiumbushe “bujitu” ebu mu tshitupa tshîpi emu pa kubueja bukua-buena-nkristo mu tshipupu.
21. (a) Bua tshinyi Yeruzaleme wakabutudibua mu 607 K.B.B? (b) Kunyima kua kabutu ka Yeruzaleme, ntshinyi tshiakenzekela baprofete ba dishima ne muprofete mulelela wa Yehowa, ne ebi bidi bitupetesha dishindika kayi lelu’eu?
21 Mu matuku a Yelemiya, dilumbuluisha dia Yehowa diakakumbajibua pakabutudibua Yeruzaleme kudi bena Babilone mu 607 K.B.B. Amu bu muvuabi bimane kulayibua, kabutu aka kavua tshipendu ne difuishibua bundu dia bena Izalele bena tshitshiu ne babule lulamatu. (Yelemiya 23:39, 40) Bakabaleja patoke se: bua dipanga kuleja Yehowa kanemu misangu mivule, ndekelu wa bionso, wakabalekela bu bipeta bia buenzavi buabu. Baprofete babu ba dishima bena lutambishi bakapuwa. Bishilangane, Yelemiya wakatungunuka yeye ne kufila milayi. Yehowa kakamulekela to. Mu diumvuangana ne tshilejilu etshi tshia kale, Yehowa kakulekela kasumbu ka Yelemiya palua dipangadika diende dikole dia bulumbuluishi dia kujimija muoyo wa bamfumu ba bukua-buena-nkristo ne aba badi bitaba mashimi abo nansha.
22. Dilumbuluisha dia kudi Yehowa nedivuije nsombelu kayi kudi bukua-buena-nkristo?
22 Bukua-buena-nkristo nebufuanangane bushuwa ne Yeruzaleme muatula ne kayi muasa kudi bantu, wa mu 607 K.B.B., eyowa, pamupawulabo bubanji buende ne pamushiyabo butaka, bua bundu bunene bumukuate. Edi ke dilumbuluishibua dikumbanyine didi Yehowa mufundile balongeshi ba dishima. Dilumbuluishibua edi nedikumbajibue kabiyi mpata. Anu bu muvua mikenji yonso ya didimuija mifila ku spiritu wa Nzambi ne mimanyisha kudi Yelemiya midisokolole kale muvuaye milelela, ke muamuenekayi kabidi milelela pakumbanayi bua tshikondo tshietu etshi. Bu mudibi nanku, tuidikijayi Yelemiya. Tumanyishayi bantu buonso katuyi tutshina bujitu ebu bua Yehowa, mbuena-kuamba ne: mikenji idiye umanyisha. Tubamanyishayi bua tshinyi dilumbuluisha diende diakane nediditute ne bukole menemene pa balongeshi buonso ba dishima ba malu a Nzambi!
Nkonko ya diambulula
◻ Bilondeshile mmuenenu wa Yehowa, bubi bua Yeruzaleme buvua bua mushindu kayi?
◻ Mmu nguvuilu kayi mudi bukua-buena-nkristo ‘buendela mu dishima’?
◻ Mmunyi mudi mashimi a bamfumu ba bitendelelu ba lelu’eu matandudibue?
◻ Mu tshitupa tshîpi emu “mbujitu kayi bua Yehowa” buamanyishibua?
[Tshimfuanyi mu dibeji 8]
Baprofete ba ku Yeruzaleme bakenza “malu a muendi”
[Tshimfuanyi mu dibeji 9]
“Tshikena-kumona tshia mu mitshima yabu ke tshidibo banumanyisha”
[Tshimfuanyi mu dibeji 10]
Nsombelu wa Yeruzaleme kunyima kua dimubutula udi uleja mu tshimfuanyi mushindu washikila bukua-buena-nkristo