DILONGA 4

Mua kufila mvese bimpe

Matayi 22:41-45

TSHIA KUENZA: Longolola meji a bateleji kumpala kua kubala mvese.

Manya tshiudi ubadila mvese au. Fila mvese yonso mu mushindu wa kutuma ntema ya bateleji ku bualu bunene buudi ujinga kushindika mu mvese au.

Tangila mvese idi kuulu ne idi ilonda. Wewe mufile mvese, ujinga kutela dîna dia uvua muambe mêyi adimu anyi uvua mufunde mukanda au, enza bua malu audi wamba ikale majalame.
Tela Bible bu mukanda utu bantu beyemena. Wewe wakula ne batendeledi ba Nzambi, koka ntema yabu ku Bible bua kuleja ne: “n’Dîyi dia Nzambi”; dîba adi neuleje ne: udi weyemena Bible bu muaba mutambe buimpe wa kupetela meji.
Jula nyota ya bantu bua mvese au. Ela lukonko luikala mvese mua kuandamuna, jula bualu buikala mvese mua kuambuluisha bua kujikija, anyi amba dîyi dinene dikala bualu budi mu mvese au mua kuambuluisha bateleji bua kumvua.

Ikala mumanye malu akadi bateleji bamanye pa tshiena-bualu atshi ne pa mvese au. Fila nansha mvese udi mumanyike bikole mu mushindu udi usankisha, ne ambuluisha bateleji bebe bua bamumvue mu mushindu mukuabu mupiamupia.