DILONGA DIA 8

Bilejilu bidi bilongesha

Matayi 13:34, 35

TSHIA KUENZA: Lengeja dilongesha diebe ne bilejilu bipepele bidi bikoka ntema ya bateleji, bilongesha kabidi malu a mushinga.

Sungula bilejilu bipepele. Anu bu Yezu, umvuija malu manene ku diambuluisha dia malu makese, ne malu makole ku diambuluisha dia malu mapepele. Kusakididi malu makuabu adi kaayi ne mushinga adi mua kukutakaja tshilejilu tshiudi ufila to. Enza bua malu adi mu tshilejilu tshiebe apetangane bimpe ne bualu buudi ulongesha bua kubenga kubueja bateleji mu ditanaji ne malu adimu adi kaayi apetangana ne tshiena-bualu.

Ikala utabalela malu adi enzeka. Ikala utangila malu adi enzeka muaba uudi, ubala mikanda yetu ya bena Kristo, ne uteleja balongeshi bapiluke. Paudi wenza malu aa, ikala ufunda bilejilu biudi upeta biudi mua kulengeja nabi dilongesha diebe. Bilama kaba kamue.
Ikala ne bateleji mu lungenyi. Sungula bilejilu bidi bipetangana ne malu atu bateleji bebe benza ne malu atu abasankisha. Ikala mudimuke bua bilejilu biebe kabibafuishi bundu anyi kabibafikishi munda.
Longesha bualu bunene. Fila bilejilu bidi bimanyina pa malu manene, kadi ki mpa tumalu tukese to. Enza bua bateleji bebe kabavuluki anu tshilejilu patupu to, kadi bavuluke kabidi ne dilongesha didibu bapetamu.