DILONGESHA DIA 16

Mmalu kayi akenza Yezu pavuaye pa buloba?

Bia pa mabeji

Bantu ba bungi batu bamona Yezu bu muana wa katoto anyi muprofete wa meji peshi bu muntu uvua upunga ne lufu. Kadi tudi mua kumanya malu ende a bungi tuetu bakonkonone nsombelu wende wa pa buloba anyi? Mu dilongesha edi, netumone malu makese adi ne mushinga wa bungi menemene akenza Yezu pavuaye pa buloba ne mudiwu mua kukuambuluisha.

1. Mmudimu kayi munene uvua nawu Yezu?

Mudimu munene uvua nawu Yezu uvua wa “kumanyisha lumu luimpe lua Bukalenge bua Nzambi.” (Balayi Luka 4:43.) Uvua uyisha lumu luimpe lua ne: Nzambi neajadike bukalenge, anyi mbulamatadi wajikija ntatu ya bantu.a Yezu wakamanyisha lumu luimpe elu ne muende muonso munkatshi mua bidimu bisatu ne tshitupa.—Matayi 9:35.

2. Bishima bia Yezu biakaleja tshinyi?

Bible udi wakula bua ‘midimu ya bungi ya bukole ne malu a kukema ne bimanyinu bivua Nzambi muenze ku butuangaji bua Yezu.’ (Bienzedi 2:22) Nzambi wakapesha Yezu bukokeshi pa bintu bia mu bufuki, kumupeshaye bukole bua kudiisha bantu binunu bia bungi, kuondapa babedi, ne bua kujula too ne bantu ku lufu. (Matayi 8:23-27; 14:15-21; Mâko 6:56; Luka 7:11-17) Bishima bia Yezu biakaleja patoke ne: Nzambi ke uvua mumutume. Biakaleja kabidi ne: Yehowa udi ne bukole bua kujikija ntatu yetu yonso.

3. Nsombelu wa Yezu udi utulongesha tshinyi?

Yezu wakatumikila Yehowa mu malu onso. (Balayi Yone 8:29.) Nansha muvuabu bamuluisha, wakenza tshivua Tatuende mumulombe ne lulamatu luonso too ne muakafuaye. Malu akenzaye adi atujadikila ne: muntu udi mua kuenzela Nzambi mudimu, nansha yeye mu ntatu. Nunku, Yezu mmutushile “tshilejilu bua [tuetu] kulonda mu makasa ende bimpe menemene.”—1 Petelo 2:21.

BUELA MU BUONDOKE

Mona muvua Yezu muyishe lumu luimpe ne muenze bishima.

4. Yezu uvua uyisha lumu luimpe

Yezu wakenda kilometre nkama ya bungi mu njila ya mpuishi bua kuyisha bantu ba bungi lumu luimpe. Balayi Luka 8:1, pashishe nuandamune nkonko eyi:

Yezu uvua uyisha anu bantu bavua bunguila bua kumuteleja anyi?
Mmunyi muvua Yezu udienzeja bua kupeta bantu ba kuyisha?

Nzambi ukavua mulaye ne: Masiya neayishe lumu luimpe. Balayi Yeshaya 61:1, 2, pashishe nuandamune nkonko eyi:

Yezu wakakumbaja dîyi dia buprofete edi mushindu kayi?
Buebe wewe, bantu badi dijinga ne kumvua lumu luimpe elu lelu anyi?

Yezu ubuela mu musoko ne bamue bayidi bende.

5. Yezu uvua ulongesha malu malelela a mushinga

Nansha muvua Yezu uyisha lumu luimpe lua Bukalenge bua Nzambi, uvua kabidi ulongesha malu a mushinga. Mona amue a kudiwu mu muyuki wende wa pa mukuna udi mumanyike bikole. Balayi Matayi 6:14, 34 ne 7:12, pashishe nuandamune nkonko eyi:

Mmibelu mimpe kayi ivua Yezu mufile mu mvese eyi?
Udi wela meji ne: mibelu ayi itshidi anu ne mushinga lelu anyi?

Yezu ulongesha musumba wa bantu balume, bakaji, ne bana pa mukuna.

6. Yezu wakenza bishima

Yehowa wakapesha Yezu bukole bua kuenza bishima bia bungi. Bua kumona tshimue tshia kudibi, balayi Mâko 5:25-34 anyi tangilayi FILME. Pashishe nuandamune nkonko idi ilonda.

FILME: Mamu udi usama mmuondopibue (5:10)

Mu filme eu, mamu uvua usama au uvua ne dishindika kayi?
Tshishima etshi ntshikusankishe ku tshinyi?

Balayi Yone 5:36, pashishe nuandamune lukonko elu:

Bishima bia Yezu bivua ‘bijadika’ tshinyi?

Yezu mutue binu uyukila ne mukaji uvua ne buôwa, diakamue yeye mumane kuondopibua mu tshishima ku disama diende dia mashi.

Udi mumanye anyi?

Mikanda inayi ya mu Bible idibu babikila ne: Evanjeliyo eyi: Matayi, Mâko, Luka, ne Yone, ke idi ne malu a bungi a Yezu atudi bamanye. Evanjeliyo yonso udi ne amue malu a Yezu adi kaayi mu mikuabu to. Kadi patudi tuyibala yonso tudi tumona nsombelu wa Yezu mu kabujima kende.

MATAYI

wakafunda Evanjeliyo wende kumpala. Mu Evanjeliyo au mudi malu a bungi avua Yezu mulongeshe, nangananga adi atangila Bukalenge bua Nzambi.
MÂKO

wakafunda Evanjeliyo muîpi ku yonso. Udi ne malu mimpe a bungi.
LUKA

udi utuambila muvua Yezu wangata disambila ne mushinga, ne muvua Yezu wenzela bantu bakaji malu.
YONE

udi uleja malu a bungi avua Yezu muyukile ne balunda bende ba pa muoyo ne bantu bakuabu. Bualu ebu budi butuambuluisha bua kumanya bikadilu bia Yezu.

BAMUE BATU BAMBA NE: “Yezu uvua anu muntu muimpe patupu, kavua Masiya to.”

Wewe udi wamba tshinyi?

TSHIA KUKUATA

Yezu wakayisha Bukalenge bua Nzambi, kuenzaye bishima, ne kutumikilaye Yehowa mu malu onso.

Diambulula

Mmudimu kayi munene uvua nawu Yezu pavuaye pa buloba?
Bishima bia Yezu bivua bijadika tshinyi?
Mmalu kayi a mushinga avua Yezu mulongeshe?

Tudi bajikije dilongesha edi mu dia:

Tshipatshila

Tangila filme wa ‘Bushuwa, Nzambi wakamuvuija Mukalenge ne Kristo’ (Tshitupa II) anyi bala Matayi nshapita 5 too ne wa 7 bua umanye malu makuabu adi atangila mudimu wa Yezu wa kuyisha.

Tshikuabu:

Tshipatshila tshiebe tshikuabu

BIA KUTANGILA KABIDI

Ntshinyi tshivua Yezu utamba kuakuila?

“Bukalenge bua Nzambi—Budi ne mushinga kayi kudi Yezu?” (Tshibumba tshia Nsentedi 1/10/2014)

Mona tshidi tshitujadikila ne: Yezu uvua bushuwa muenze bishima.

“Bishima bia Yezu bidi mua kukulongesha tshinyi?” (Tshibumba tshia Nsentedi 15/7/2004)

Bala bualu bua tatu kampanda uvua mushintulule nsombelu wende pakalongaye muvua Yezu utabalela bantu bikole.

“Mvua ne nsombelu wa budinangi” (Tshibumba tshia Nsentedi 1/10/2014)

Mona dilondangana dia malu manene avua Yezu muenze pavuaye uyisha.

“Malu manene a mu nsombelu wa Yezu pa buloba” (Bible—Nkudimuinu wa bulongolodi bupiabupia, Tshisakidila tshia A7)

a Dilongesha dia 31 too ne dia 33 nealeje malu a bungi enza Bukalenge bua Nzambi.