DILONGESHA DIA 49
Mua kuikala ne disanka mu dîku (Tshitupa 1)
Mulume ne mukaji batshidi baselelanganaku batu batekemena ne: nebatungunuke anu ne kuikala ne disanka dia buena dia dituku dia dibaka diabu adi kashidi. Mmuomu, bidi anu mua kuenzeka. Mbualu budi bena Kristo baselangane bakadi ne bidimu bia bungi mu dibaka badi badienzeje bikole bua kutumikila mibelu ya mu Bible bamanye bimpe.
1. Mmubelu kayi udi Bible upesha balume?
Yehowa mmuteke mulume ku mutu kua dîku. (Balayi Efeso 5:23.) Yehowa mmusue bua mulume ikale wangata mapangadika ambuluisha dîku dijima. Bible udi ubela balume ne: “Tungunukayi ne kunanga bakaji benu.” (Efeso 5:25) Bidi biumvuija tshinyi? Mulume muimpe udi wenzela mukajende malu malenga padibu kumbelu nansha padibu mu bantu. Udi umukuba, umutabalela bua kumukumbajila bidiye ukengela mu mubidi ne mu muoyo wende bua kuikalaye ne disanka. (1 Timote 5:8) Kadi udi nangananga umuambuluisha bua ikale mu malanda makole ne Yehowa. (Matayi 4:4) Tshilejilu, udi mua kusambila ne mukajende ne kubala nende Bible. Padi mulume utabalela mukajende ne dinanga dionso, udi ulama bulunda buende ne Yehowa.—Balayi 1 Petelo 3:7.
2. Mmubelu kayi udi Bible upesha bakaji?
Dîyi dia Nzambi didi diamba ne: ‘Mukaji udi ne bua kuikala ne kanemu kakole kudi bayende.’ (Efeso 5:33) Mmushindu kayi? Mpadiye uvuluka ngikadilu mimpe ya bayende ne mutuye uditatshisha bua bualu buende yeye ne bua bana badibu balele. Udi uleja kabidi kanemu padiye wambuluisha bayende mu mapangadika adiye wangata ne padiye wakula ne bukalanga kumpala kuende anyi bua bualu buende, nansha bayende kayi utendelela Yehowa.
3. Mmunyi mudi mulume ne mukajende mua kunangangana bikole?
Bible udi wamba bua bena dibaka ne: “Bubidi buabu nebalue mubidi umue.” (Matayi 19:5) Bualu ebu budi bumvuija ne: badi ne bua kuluisha tshintu tshionso tshidi mua kubapandulula anyi kutekesha dinanga diabu. Badi benza nanku pa kuikala ne tshibidilu tshia kusomba pamue ne kuambilangana malu abu adi mu muoyo ne mu lungenyi onso patoke ne dinanga dionso. Pa kumbusha anu Yehowa, kabena bangata tshintu anyi muntu mukuabu ne mushinga mupite wa muena dibaka nabu nansha. Yonso wa kudibu udi udienzeja nangananga bua kubenga kulamatangana bikole ne muntu mukuabu wa tshianana.
BUELA MU BUONDOKE
Mona mêyi a mu Bible adi mua kunuambuluisha bua kulengeja nsombelu wenu wa mu dibaka.
4. Wewe mulume, nanga mukajebe, wikale umutabalela bimpe
Bible udi wamba ne: “Balume badi ne bua kunanga bakaji babu bu mibidi yabu bobu bine.” (Efeso 5:28, 29) Bidi biumvuija tshinyi? Tangilayi FILME, pashishe nuandamune lukonko ludi lulonda.
Mmalu kayi adi mulume mua kuenza bua kuleja mudiye munange mukajende ne umutabalela?
Balayi Kolosayi 3:12, pashishe nuandamune lukonko elu:
Mmunyi mudi mulume mua kuleja mukajende ngikadilu eyi?
5. Wewe mukaji, nanga bayebe, wikale umunemeka
Bible udi wambila mukaji bua anemeke bayende, nansha muikale utendelela Yehowa anyi kayi umutendelela. Balayi 1 Petelo 3:1, 2, pashishe nuandamune nkonko eyi:
Bikala bayebe kayi utendelela Yehowa, dijinga diebe si ndia kumumonaku dikuabu ukadi umutendelela. Ambabi, mushindu mutambe buimpe wa kumuambuluisha ngua kuikala anu umuyisha dîba dionso anyi ngua kuikala ne bikadilu bimpe ne kanemu kumpala kuende? Bua tshinyi?
Mulume ne mukajende badi mua kuangata mapangadika mimpe popamue. Kadi kudi misangu idi dipangadika dia mulume kadiyi mua kusankisha mukaji to. Dîba adi, mbimpe mukaji aleje bayende mudiye pende wela meji, kadi ne kanemu ne dîyi dimpe dia bupole. Nansha nanku, mukaji udi ne bua kumanya ne: Yehowa mmupeshe bayende bujitu bua kuangatshila dîku mapangadika bua diakalengele dia bonso badimu. Mbimpe adienzeje bua kueleshangana diboko ne bayende mu mapangadika ende au. Padiye wenza nanku, buonso buabu mu dîku nebikale ne disanka. Balayi 1 Petelo 3:3-5, pashishe nuandamune lukonko elu:
Padi mukaji unemeka bayende, Yehowa udi umvua mushindu kayi?
6. Nudi mua kujikija bilumbu bidi bijuka mu dibaka dienu
Kakutu dibaka dipuangane to. Nanku, mbimpe mulume ne mukajende bikale beleshangana diboko bua kujikija bilumbu biabu. Tangilayi FILME, pashishe nuandamune nkonko idi ilonda.
Mbimanyinu kayi bidi bileja ne: malanda a bena dibaka ba mu filme eu akavua enda anyanguka?
Mmalu kayi avuabu benze bua kulengeja nsombelu wabu wa dibaka?
Balayi 1 Kolinto 10:24 ne Kolosayi 3:13. Panyima pa dibala mvese ne mvese yonso udi muaba eu, nuandamune lukonko elu:
Kutumikila kua mubelu eu kudi kulengeja nsombelu mu dibaka mushindu kayi?
Bible udi wamba ne: tudi ne bua kuikala tupeshangana bunême. Kupesha muntu bunême kudi kumvuija kumuleja muoyo mulenga ne kanemu. Balayi Lomo 12:10, pashishe nuandamune nkonko eyi:
Mbimpe mulume anyi mukaji ikale windila bua muena dibaka nende anji amupeshe yeye bunême anyi? Bua tshinyi?
BAMUE BATU BAMBA NE: “Mu dietu dibaka katutshiena balamatangane bu mutuvua kumpala to.”
Ntshinyi tshiudi mua kubambila bua kuleja mudi Bible mua kubambuluisha?
TSHIA KUKUATA
Mulume ne mukajende badi mua kusomba bimpe ne disanka padibu banangangane, banemekangana, ne batumikila mêyi a mu Bible.
Diambulula
Ntshinyi tshidi mulume mua kuenza bua disanka kuikaladi mu dibaka diabu?
Ntshinyi tshidi mukaji mua kuenza bua disanka kuikaladi mu dibaka diabu?
Biwikala mu dibaka, mmêyi kayi a mu Bible adi mua kunuambuluisha bua kukolesha malanda enu mu dibaka?
BIA KUTANGILA KABIDI
Mona ngenyi mikumbane yanuambuluisha bua kuikala ne disanka mu dibaka dienu.
Tangila filme wa mijiki udi uleja masanka anuapeta panuikala nutumikila mibelu ya mu Bible mu dibaka dienu.
Tangila tshidi kukokela bumfumu bua mulume kumvuija.
“Nuenu bakaji, bua tshinyi mbimpe nukokele bumfumu?” (Tshibumba tshia Nsentedi, 15/3/2010)
Mona bukole budi nabu mibelu ya mu Bible kudi badi mu mabaka.