Ditabalela bakuabu

Tshivua Yezu muenze

FILME: Yezu ne mukaji ku tshina tshia mâyi

1. Tangila FILME, anyi bala Yone 4:6-9. Pashishe welangane meji a nkonko idi ilonda eyi:

1. Mbualu kayi buvua Yezu mumone kudi mukaji au kumpala kua kutuadija kuyukila nende?

2. Yezu wakamba ne: “Mpesha koku mâyi a kunua.” Bua tshinyi kubanga kuyukila ne muntu nanku kuvua kukumbane?

Dilongesha

2. Tudi bafuane kuyukila ne muntu bimpe tuetu batuadije ne tshiena-bualu tshidi tshimusankisha.

Idikija Yezu

3. Yisha muntu bilondeshile muudi mumusangane. Kukebi anu bua kubanga kuyukila ne muntu bualu buukavua wewe mulongolole to. Tuadija ne bualu budi bantu basamishila meji lelu. Diebeja ne:

1. ‘Ngumu kayi idi kuoku lelu?’

2. ‘Mmalu kayi adi mukana mua bena mutumba, bena mudimu netu, anyi balongi betu?’

4. Ikala utangila ne lubatshi. Diebeja ne:

1. ‘Ntshinyi tshidi muntu wenza mpindieu? Udi mua kuikala wela meji a bualu kayi?’

2. ‘Bilamba bidi muntu muvuale, tshimuenekelu tshiende, anyi nzubu wende bidi bingambila tshinyi bua malu adiye witabuja anyi bua bilele bia kuabu?’

3. ‘Ntshikondo tshimpe tshia meme kuyukila ne muntu anyi?’

5. Teleja.

1. Kuakudi bia bungi to.

2. Kankamija muntu bua apatule bidiye nabi munda. Kuoku mushindu, ela nkonko.