MUA KUBANGA KUYUKILA NE MUNTU
DILONGESHA 4
Didipuekesha
Dîyi dia kulonda: “Ne didipuekesha, numone bakuabu bu banupite nuenu.”—Filip. 2:3.
Tshivua Paulo muenze
1. Tangila FILME, anyi bala Bienzedi 26:2, 3. Pashishe welangane meji a nkonko idi ilonda eyi:
Mmunyi muvua Paulo mudipuekeshe pavuaye uyukila ne mukalenge Agipa?
Mmunyi muvuaye mutume ntema ya mukalenge au kudi Yehowa ne ku malu a mu Bible pamutu pa kuyikoka kudiye yeye muine?—Tangila Bienzedi 26:22.
Dilongesha
2. Mukenji wetu udi mua kusankisha bantu bikole tuetu tubambilawu ne budipuekeshi ne kanemu.
Idikija Paulo
3. Akula ne kanemu. Kuenji bu ne: wewe ke udi mumanye bionso, muntu uudi uyukila nende ki mmumanye tshintu to. Akula nende ne kanemu.
4. Leja patoke ne: malu audi ulongesha nga mu Bible. Dîyi dia Nzambi didi ne ngenyi idi ilenga mioyo ya bantu. Patudi tudilongesha bantu, tudi tuashila ditabuja diabu pa tshishimikidi tshimpe.
5. Ikala anu ne bupole. Kutambi kusunsuma bua kuleja ne: anu wewe ke udi ne dimanya to. Katuena basue kukokangana ne muntu to. Ikala ne budipuekeshi pa kushala anu mutukije, umanye dîba diudi mua kumbuka. (Nsu. 17:14; Tito 3:2) Diandamuna dia bupole didi mua kushiya muntu ne lungenyi lua kuyukila netu bimpe musangu mukuabu.