MUA KUBANGA KUYUKILA NE MUNTU
DILONGESHA 5
Bukalanga
Dîyi dia kulonda: “Mêyi enu ikale mashême misangu yonso.”—Kolos. 4:6.
Tshivua Paulo muenze
1. Tangila FILME, anyi bala Bienzedi 17:22, 23. Pashishe welangane meji a nkonko idi ilonda eyi:
Mmunyi muvua Paulo mumvue pavuaye mumone bilele bia ntendelelu wa dishima ku Atena?—Tangila Bienzedi 17:16.
Pamutu pa Paulo kubipisha bena Atena, mmunyi muvuaye mubuelele pa malongesha abu bua kubayisha lumu luimpe ne bukalanga buonso?
Dilongesha
2. Tuetu tusungula tshia kuamba, mushindu wa kutshiamba, ne dîba dia kutshiamba ne lungenyi luonso, bantu badi pamuapa mua kututeleja bimpe.
Idikija Paulo
3. Sungula mêyi mimpe. Tshilejilu, wewe uyukila ne muntu udi kayi muena Kristo, misangu mikuabu udi mua kushintulula mushindu wa kumuambila malu a mu Bible anyi wa kuakula bua Yezu.
4. Kuikadi lukasa bua kupingaja muntu mu njila to. Mulekela akule mudilekelele. Yeye muambe bualu budi bubengangana ne malongesha a mu Bible, kuzuki bua kujula nende milandu to. (Yak. 1:19) Wewe mumuteleje, neujingulule malongesha abu bimpe menemene.—Nsu. 20:5.
5. Umvuangana ne muntu, umuele kalumbandi padibi bikengela. Udi mua kuikala yeye mutuishibue mu muoyo wende ne: malongesha a mu tshitendelelu tshiabu mmalelela. Anji yukila nende pa dilongesha didiye witaba pende, pashishe ubanga kuenda kumumvuija ku kakese ku kakese tshidi Bible ulongesha.