Yehowa kêna upetula mutshima munyingalale
“Milambu ya kulambula Nzambi, mmuoyo mubungame; mutshima munyingalale ne musunsuke, Ô Nzambi, kuakuwupetula nansha.”—MUSAMBU WA 51:17.
1. Mmunyi mudi Yehowa wangata bamusadidi bende badi benze mpekatu kadi banyingalala?
YEHOWA udi mua ‘kujika disemena dionso kudiye, bienze bu udi muteke divuba, bua disambila kadipitshimu.’ (Muadi 3:44) Kadi, mmusue bua bantu bende basemene kudiye. Nansha bienza umue wa ku bamutendeledi bende tshilema tshinene, bianyingalalaye, Tatu wetu wa mu diulu neavuluke bimpe bivua muntu eu muenze. Ke bua tshinyi mupostolo Paulo wakafundila bena nkristo nende bua se: “Nzambi ki mmupange buakane bua kupuaye mudimu wenu muoyo ne dinanga dinuakaleja bua dîna diende.”—Ebelu 6:10.
2, 3. Ntshinyi tshidi bakulu bena nkristo ne bua kuangata ne mushinga padibo bakonkonona bilema bia bena kuitabuja nabo?
2 Bakulu bena nkristo badi ne bua kuangata ne mushinga bungi bua bidimu bia mudimu wa lulamatu muenzela Nzambi kudi bena kuitabuja nabo. Ke tshidi tshikengela bua mudimu munsantu muenza kudi banyingaladi badi benze tshilema anyi badi benze mpekatu munene. Tshidi balami bena nkristo bakeba ndiakalenga dia mu nyuma dia buonso badi mu tshisumbu tshia mikoko tshia Nzambi.—Galatia 6:1, 2.
3 Mushipi wa mikenji munyingaladi udi ukengela dilekelela dia Nzambi. Kadi, bilondeshile mêyi a Davidi adi mu Musambu wa 51:10-19, bidi bikengela tshikuabo tshintu kupita apu.
Bidi bikengela mutshima mukezuke
4. Bua tshinyi Davidi wakalomba bua kupeta mutshima mukezuke ne tshieledi tshia lungenyi tshipiatshipia?
4 Pikala muena nkristo muditshipe usanganyibua mu nsombelu mubi wa mu nyuma bua mpekatu, udi mua kuikala ukengela tshinyi pa kumbusha luse ne dilekelela bia Yehowa? Eyowa, Davidi wakalomba ne: “Ufuke munda muanyi mutshima mukezuke, Ô Nzambi, ne uteke munda muanyi tshieledi tshia lungenyi tshipiatshipia, tshishindame.” (Musambu wa 51:10) Mbimueneke se: Davidi wakenza dilomba edi bualu uvua mumone se: mu mutshima wende mutshivua dijinga dikole dia kuenza mpekatu munene. Imue misangu, katuena babuelakane mu mishindu ya mpekatu wa buena wakakuata Davidi mu buteyi mu tshilumbu tshia Bath-Sheba ne Uriya, kadi, tudi tukengela diambuluisha dia Yehowa bua katuponyi mu ditetshibua dia kulonda nsombelu wonso wa difika ku mpekatu munene. Bua bualu ebu, tudi mua kuikala dijinga ne diambuluisha dia Nzambi bua kumusha mu mutshima wetu bikadilu bia mpekatu, bu mudi dialakana ne lukinu—mpekatu idi mifuanangane ne buivi ne kushipangana.—Kolosai 3:5, 6; 1 Yone 3:15.
5. (a) Kuikala ne mutshima mukezuke kudi kumvuija tshinyi? (b) Ntshinyi tshivua Davidi ujinga pakalombaye tshieledi tshia lungenyi tshipiatshipia?
5 Yehowa udi ulomba bua basadidi bende kuikalabo ne “mutshima mukezuke,” mbuena kuamba ne: butoke bua kipatshila anyi bua dijinga. Pa kumona se: kavua muleje butoke bua mushindu’eu, Davidi wakasambila bua Nzambi kutokeshaye mutshima wende ne kuwulongolola bua kuikalawu mu diumvuangana ne mikenji yende. Mufundi wa misambu uvua kabidi ukeba tshieledi tshia lungenyi tshipiatshipia, peshi dinyikibua dia lungenyi. Uvua ukengela tshieledi tshia lungenyi tshivua mua kumuambuluisha bua kutantamena matetshibua ne bua kulamata bikole ku mikenji ne mêyi-maludiki bia Yehowa.
Diambuluisha dinene dia spiritu munsantu
6. Bua tshinyi Davidi wakalomba bua Yehowa kamumushi spiritu munsantu wende?
6 Patudi bapange ditekemena bua bilema bietu anyi bua mpekatu yetu, tudi mua kudiumvua se: Nzambi udi pa kutuumusha spiritu wende munsantu, peshi bukole buenzeji. Davidi, wakadiumvua mushindu’eu, bualu wakasengelela Yehowa ne: “Kungimanshi kumpala kuebe; ne spiritu munsantu webe, ô kumungumushi.” (Musambu wa 51:11) Davidi, munyingalale ne mudipuekeshe bua mpekatu yende wakadiumvua bu kavua kabidi mukumbanyine bua kusadila Yehowa. Kuimanshibua ku mpala kua Nzambi kudi kumvuija kujimija dianyishibua, dikoleshibua ne dibenesha biende. Bua Davidi kupetaye tshiakabidi makanda a mu nyuma, uvua ukengela spiritu munsantu wa Yehowa. Bu spiritu munsantu muikale pa mutu pende, mukalenge uvua mua kukeba bulombodi bua Nzambi mu masambila bua kumona mua kulengelela Yehowa, kuepuka mpekatu, ne kukokesha ne meji. Bu muvuaye mumanye mpekatu yende ivuaye muenzele Mufidi wa spiritu munsantu, bivua bikumbanyine bua Davidi kulomba Yehowa bua kumbushi spiritu eu kudiye.
7. Bua tshinyi tudi ne bua kulomba spiritu munsantu ne kudilama bua katumunyingalaji?
7 Apo, bidi munyi buetu tuetu? Tudi ne bua kulomba spiritu munsantu ne kuepuka bua kumunyingalaja pa kupanga kulonda bulombodi buende. (Luka 11:13; Efeso 4:30) Tshianana, tudi mua kujimija spiritu ne kupanga kuleja mamuma ende a dinanga, disanka, ditalala, muoyo-mule, bulenga-bunangi, buimpe, ditabuja, bupole-malu, ne didikanda. Yehowa Nzambi udi mua kumbusha spiritu munsantu wende kutudi bituikala batungunuke ne kumuenzela mpekatu katuyi tunyingalala.
Ditshionkomoka dia lupandu
8. Bituikala benze mpekatu kadi tujinga bua kuikala ne disanka dia lupandu, tudi ne bua kuenza tshinyi?
8 Muenji wa mpekatu munyingaladi údí upetulula makanda a mu nyuma udi mua kusanka tshiakabidi mu ndongoluelu muangata kudi Yehowa bua kufila lupandu. Bu muvuaye ne dijinga dikole dia kulabula disanka edi, Davidi wakalomba Nzambi ne: “Umpingajile ditshionkomoka dia lupandu luebe, ne ungambuluishe ne bukole bua disua dimpe.” (Musambu wa 51:12) Mbualu bua dikema bushuwa bua kutshionkomoka mu ditekemena dilelela dia lupandu lua kudi Yehowa Nzambi! (Musambu wa 3:8) Kunyima kua yeye mumane kuenzela Nzambi mpekatu, Davidi wakakeba mua kupeta tshiakabidi nsombelu wa disanka dia lupandu dia kudiye. Pashishe, Yehowa wakafila lupandu ku diambuluisha dia mulambu wa tshia-bupikudi wa muanende Yezu Kristo. Bu mutudi basadidi baditshipe kudi Nzambi, tuetu benze mpekatu munene, kadi tujinga kupeta tshiakabidi disanka dia lupandu, tudi tukengela ngikadilu wa dinyingalala ne kuepuka bua kufika ne mpekatu wetu eu mu tshitupa tshia kuenzela spiritu munsantu mpekatu.—Matayi 12:31, 32; Ebelu 6:4-6.
9. Davidi uvua ujinga tshinyi pakalombaye Nzambi bua kumuambuluisha ne “bukole bua disua dimpe”?
9 Davidi wakalomba Yehowa bua kumuambuluisha “ne disua dimpe.” Mbimueneke patoke se: kêna wakula bua disua dia Nzambi dia kumuambuluisha anyi bua spiritu munsantu, kadi bua bukole bua mu tshieledi tshia lungenyi tshia Davidi budi bumusaka bua kuikala ne dijinga kampanda. Davidi uvua ujinga bua Nzambi kumushindikaye pa kumupesha bukole bua disua dia kuenza tshidi tshiakane ne kuepuka dipona mu mpekatu tshiakabidi. Yehowa Nzambi udi anu utungunuka ne kuambuluisha bamusadidi bende ne ujula aba badi bakobame bua mateta a mishindu mishilangane. (Musambu wa 145:14) Ndikolesha ku muoyo kayipu biakumbana bualu bu nunku, nangananga bituikala benze mpekatu kadi bikale tunyingalala ne tujinga mua kusadila Yehowa ne lulamatu bua kashidi!
Bia kulongesha bashipi ba mikenji mbinganyi?
10, 11. (a) Ntshinyi tshivua Davidi mua kulongesha bashipi ba mikenji bena Izalele? (b) Bua Davidi kumona mua kulongesha benji ba mpekatu, yeye muine uvua ne bua kuanji kuikala muenze tshinyi diambedi?
10 Bu Nzambi mua kuanyisha, ne didipidia dionso, Davidi uvua ujinga kuenza tshintu tshivua ne bua kuleja dianyisha diende bua dilekelela dia Yehowa ne tshivua mua kuambuluisha bakuabo. Ne masambila a mundamunda kudi Yehowa, mukalenge munyingaladi wakamba ne: “Nendongeshe bashipi ba mikenji njila yebe, bua bena mpekatu bobo bine batshinguluke diakamue bua kutangila kûdi.” (Musambu wa 51:13) Mmunyi muvua Davidi, yeye muine muenji wa mpekatu, mua kulongesha Mikenji ya Nzambi kudi bashipi ba mikenji? Ntshinyi tshivuaye mua kubambila? Ne bivua mua kupatula bipeta kayi bimpe?
11 Pakuleja bena Izalele bashipi ba mikenji njila ya Yehowa ne ditekemena dia kubatshingulula ku njila mubi, Davidi uvua mua kubaleja mudi mpekatu mutambe bubi, tshidi diumvuija dia dinyingalala, ne mushindu wa kupeta dilekelela dia Nzambi. Bu muvuaye mumane kumvua dikenga dia dibengibua kudi Yehowa ne kondo ka muoyo kapiile, kabiyi mpata, Davidi uvua mua kuikala mulongeshi wa luse wa benji ba mpekatu banyingaladi, bavua ne mutshima musunsuke. Bushuwa, uvua mua kulongesha bakuabo ku tshilejilu tshiende anu kunyima kua yeye mumane kuanyisha mêyi-maludiki a Yehowa ne mupete dilekelela diende, bualu aba badi babenga kuleja butumike ku mêyi-matuma a Nzambi kabena ne dianyisha dia ‘kutela mikenji ya Nzambi.’—Musambu wa 50:16, 17.
12. Mmunyi muvua Davidi mua kubabidila muanda wa se: Nzambi wakamusungila ku dibanza dia mashi?
12 Pa kuambulula majinga ende mu mêyi mashilangane, Davidi wakamba ne: “Unsungile ku dibanza dia mashi, ô Nzambi, Nzambi wa lupandu luanyi, bua ludimi luanyi kuambalu ne disanka buakane buebe.” (Musambu wa 51:14) Dibanza dia mashi divua dituala tshibawu tshia lufu. (Genese 9:5, 6) Nenku, dimanya dia se: Nzambi wa lupandu luende wakamupandisha ku dibanza dia mashi mu tshilumbu tshia kushipa kua Uriya, Davidi uvua mua kupeta ditalala dia mu mutshima ne mu lungenyi. Nenku, ludimi luende luvua mua kuimba ne disanka bua buakane bua Nzambi, apo ki mbuende yeye muine. (Muambi 7:20; Lomo 3:10) Davidi kavua mua kukupula buendenda buende bua masandi peshi kupatula Uriya mu lukita, anu mudi bantu ba lelu kabayi mua kupingaja bu-kamama kudi muntu uvuabo banyange anyi kubiisha ku lufu muntu uvuabo bashipe. Katuena mua kuela meji pa muanda eu patudi tutetshibua anyi? Ne ndianyisha kayipu ditudi mua kuikala nadi bua dilekelela dia Yehowa didiye utuleja mu buakane! Eyowa, dianyisha didi ne bua kutusaka bua kulombola bakuabo ku Mpokolo eu wa buakane ne wa dilekelela.
13. Ntshinyi tshidi tshikengedibua bua muenji wa mpekatu kufikaye ku dibuulula mishiku bua kutumbisha Yehowa?
13 Muenji wa mpekatu nansha umue kêna mua kubuulula mishiku yende bua kutumbisha Yehowa anu pikala Nzambi wa luse muyibuulule, bua kuakula pa malelela ende. Nenku Davidi uvua mua kuimba ne: “O Yehowa, ubuulule mishiku yanyi, bua mukana muanyi mumanyishe lumu luebe.” (Musambu wa 51:15) Ne kondo kende ka muoyo kasulakaja bua dilekelela dia Nzambi, Davidi uvua mua kudiumvua musakibue ku dilongesha bashipi ba mikenji njila ya Yehowa, ne uvua mua kumutumbisha ne muoyo umue. Aba buonso bakalekeledibua mpekatu yabo bu Davidi badi ne bua kuangata ne mushinga buimpe bukena-butuakanyine bua Yehowa, ne badi ne bua kubabidila mishindu yonso ya kumanyisha bulelela bua Nzambi ne ‘kumuangalaja lumu luende.’—Musambu wa 43:3.
Milambu idi Nzambi mua kuanyisha
14. (a) Mmilambu kayi ivua ikengedibua bilondeshile tshiovo tshia Mikenji? (b) Bua tshinyi bidi mua kuikala tshilema bua kuela meji se: tudi mua kufuta tshintu bua kujibikila mpekatu itudi batungunuke ne kuenza pa kukumbaja amue malu mimpe?
14 Davidi wakapeta bujinguludi buondoke buakamufikisha ku diamba ne: “Bualu wewe [Yehowa] kuena usanka bua mulambu—bu biobi nanku, mvua mua kuufila; kuena usanka bua mulambu wa kuosha.” (Musambu wa 51:16) Tshiovo tshia Mikenji tshivua tshikengela bua kulambula milambu ya nyama kudi Nzambi. Kadi, mpekatu ya Davidi ya masandi ne dishipangana, ivua ne bua kupeta dinyokibua dia lufu, ne kayivua mua kulekeledibua ne milambu ya mushindu’eu. Tshianana, kavua mua kupanga kufila milambu ya nyama kudi Yehowa. Padiku kakuyi dinyingalala dia mu mutshima dilelela, milambu kayena ne mushinga nansha mukese. Nenku, katuedi meji se: tudi mua kufuta tshintu bua kujibikila mpekatu itudi batungunuke ne kuenza pa kukumbaja amue malu mimpe, nunku kuikale diakanangana pankatshi pa bibi ne bimpe.
15. Ngikadilu wa muntu muditshipe udi ne mutshima mubungame udi munyi?
15 Davidi wakasakidila ne: “Milambu ya kulambula Nzambi, mmuoyo mubungame; mutshima munyingalale ne musunsuke, ô Nzambi, kuakuwupetula.” (Musambu wa 51:17) Bua muenji wa mpekatu munyingaladi, “milambu ya kulambula Nzambi,” idiye mua kuanyisha, “mmuoyo mubungame.” Muntu wa mushindu’eu kêna ne ngikadilu wa diluishangana. Mutshima wa muntu muditshipe udi ne dibungama udi unyingalala bikole bua mpekatu wende, udi udipuekesha bua dibengibua diende kudi Nzambi, ne udi ujinga kuenza tshionso tshidiye mua kuenza bua kuanyishibua tshiakabidi kudi Nzambi. Katuena mua kulambula Nzambi tshintu tshia mushinga nansha tshimue patudi katuyi banji kunyingalala bua mpekatu yetu ne katuyi banji kumupesha mitshima yetu bua kumutendelela anu yeye nkayende ne lulamatu lukole.—Nahuma 1:2.
16. Mmunyi mudi Nzambi utangila muntu udi munyingalale bua mpekatu wende?
16 Nzambi kêna ubenga mulambu bu mudi mutshima munyingalale ne musunsuke. Nansha tuetu mua kupeta ntatu kayi bu mutudi tshisamba tshiende, katudilekeledi bua kupanga ditekemena. Bituikala batetuke mu njila wa muoyo mushindu udi mutshima wetu ne bua kulomba dilekelela dia Nzambi, katuena banji kujimija ditekemena dionso nansha. Nansha tuetu benze mpekatu munene, kadi bituanyingalala bushuwa, Yehowa kakupetula mutshima wetu munyingalale. Neatufuile luse pa kushindamena pa mulambu wa tshia-bupikudi wa Kristo ne neatupingaje mu nsombelu wa dianyishibua kudiye. (Yeshayi 57:15; Ebelu 4:16; 1 Yone 2:1) Kadi, anu bu Davidi, masambila etu adi ne bua kuikala ne tshipatshila tshia kulomba dipetulula dianyishibua kudi Nzambi, kadi ki ntshia kuepuka dinyoka anyi mibelu bitudi tukengela. Nzambi wakafuila Davidi luse, kadi wakamunyoka kabidi.—2 Samuele 12:11-14.
Diditatshisha bua ntendelelu mukezuke
17. Pa kulekela dilomba dia luse lua Nzambi, ntshinyi tshidi benji ba mpekatu ne bua kuenza?
17 Bituikala benze mpekatu munene, kabiyi mpata, ebi bidi mua kunema bujitu bikole mu tshieledi tshietu tshia lungenyi, ne mutshima mubungame neutusake ku dilomba dilekelela dia Nzambi. Kadi, tusambile kabidi bua bakuabo. Nansha muvua Davidi ukeba ne muoyo mujima bua kutendelela tshiakabidi Nzambi mu mushindu udiye mua kuanyisha, musambu wende kawakapua bakuabo muoyo. Wakenza dilomba edi kudi Yehowa: “Bilondeshile bulenga-bunangi buebe, wenzele Siyona malu mempe; udiku mua kuibaka lumbu lua Yeruzaleme.”—Musambu wa 51:18.
18. Bua tshinyi munyingaladi Davidi wakasambila bua Siyona?
18 Eyowa, Davidi uvua musue bushuwa kupeta tshiakabidi dianyishibua dia Nzambi. Kadi, mufundi wa misambu Davidi wakalomba kabidi ne bupuekele se: ‘bilondeshile bulenga-bunangi buende, Nzambi enzele Siyona malu mempe,’ tshimuamuende wa bukalenge bua Izalele, Yeruzaleme, muakatekemena Davidi bua kuibakila Nzambi ntempelo. Mpekatu minene ya Davidi yakamba kubutuisha ditunga dijima, bualu tshisamba tshijima tshivua mua kukenga bua buenzavi bua mukalenge. (Fuanyikija ne 2 Samuele, nshapita wa 24.) Bushuwa, mpekatu yende yakatekenkeja “lumbu lua Yeruzaleme,” ke bualu kayi bivua mpindieu bikengela kuibakulula.
19. Bituikala benze mpekatu kadi banyingalale, bidi mua kuikala biakane bua kulomba tshinyi mu masambila?
19 Bituikala benze mpekatu munene kadi bamane kupeta dilekelela dia Nzambi, mbikumbanyine bua kusambila bua yeye kulongolola bibi bionso bidi mpekatu wetu mupatule. Tudi mua kuikala bapendeshishe ne bafuishe dîna diende dinsantu bundu, banyange tshisumbu, ne bakebele dîku dietu dikenga. Tatu wetu wa mu diulu wa dinanga udi mua kumbusha bundu buonso buvua bujingile dîna diende, kuibaka tshisumbu ku diambuluisha dia spiritu wende munsantu, ne kukolesha mitshima ya bananga betu badi bamunange ne bamusadila. Bushuwa, nansha koku mpekatu anyi kakuyi mpekatu, tudi anu ne bua kuikala tuditashisha bua ditumbishibua dia dîna dia Yehowa ne disanka dia tshisamba tshiende.—Matayi 6:9.
20. Bua Yehowa kuanyisha milambu ne mapa bia Izalele, bivua bikengela tshinyi?
20 Bu Yehowa mua kuibakulula lumbu lua Siyona, ntshinyi tshikuabo tshivua ne bua kuenzeka? Davidi wakimba ne: “Nanku, wewe [Yehowa] newanyishe milambu ya buakane, ne mulambu muosha ne dipa dijima; apu, nebalambule ngombe milume pa tshilambuilu tshiebe.” (Musambu wa 51:19) Davidi wakajinga ne muoyo umue bua yeye ne ditunga dijima kupetabo dianyishibua dia Yehowa bua kumonabo mua kumutendelela mu mushindu udiye mua kuanyisha. Apo, Nzambi neanyishe milambu yabo miosha ne mapa abo majima. Bivua mua kuikala nanku, bualu milambu eyi ya buakane, mifila kudi tshisamba tshiditshipe, tshiena bululame, ne tshinyingaladi, tshivua tshikeba dianyisha dia Nzambi. Bua kuleja dianyisha diabo patoke bua dilekelela dia Nzambi, bavua ne bua kulambula pa tshilambuilu tshiende ngombe milume—milambu mipite buimpe ne ya mushinga mukole. Lelu’eu, tudi tutumbisha Yehowa pa kumutuadila tshintu tshipite mushinga mukole tshia ku bionso bitudi nabi. Ne ku mapa etu kudi “bana ba ngombe milume ba mishiku yetu,” milambu ya kutumbisha Nzambi wetu mulekeledianganyi wa bilema, Yehowa.—Hoshea 14:2; Ebelu 13:15.
Yehowa udi uteleja miadi yetu
21, 22. Musambu wa 51 udi ne malongesha kayi atudi mua kubabidila bua diakalenga dietu?
21 Disambila dia Davidi dia muoyo mujima difunda mu Musambu wa 51 didi dituleja ne: bituenza mpekatu, tudi ne bua kuditatshisha pa kuikala ne mmuenenu mulelela wa dinyingalala. Musambu eu udi utupesha malongesha masunguluke atudi ne bua kubabidila bua diakalenga dietu. Tshilejilu, bituenza mpekatu, kadi bituanyingalala bushuwa, tudi mua kutekemena dilekelela dia Nzambi. Kadi, diambedi, tuanji kuditatshisha bua tshipendu ne bundu bitudi mua kuikala bafikishe pa dîna dia Yehowa. (Mvese 1-4) Anu bu Davidi, tudi mua kulomba Tatu wetu wa mu diulu dilekelela bilondeshile bumuntu bua mpekatu butudi bapiane. (Mvese 5) Tudi ne bua kuamba bulelela ne kukeba meji kudi Nzambi. (Mvese 6) Bituikala benze mpekatu, tudi ne bua kusengelela Yehowa bua kutukezula, kutupesha mutshima mukezula, ne tshieledi tshia lungenyi tshishindame.—Mvese wa 7 too ne wa 10.
22 Musambu wa 51 udi kabidi utuambuluisha bua kujingulula se: katuena ne bua kudilekelela bua kulua bapape mu mpekatu. Bituenza nunku, Yehowa udi mua kutumbusha spiritu munsantu wende anyi bukole buenzeji. Kadi, patuikala ne spiritu munsantu wa Nzambi pa mutu petu, tudi mua kulongesha bakuabo njila yende biakane. (Mvese 11-13) Bituenza mpekatu, kadi kunyingalala, Yehowa neatulekelele bua kutungunuka ne kumutumbisha bualu katu upepeja mutshima munyingalale ne musunsuke. (Mvese 14-17) Musambu eu udi kabidi uleja se: masambila etu kaena ne bua kuakula anu buetu nkayetu. Kadi, tudi ne bua kusambila bua se: aba buonso badi bakumbaja ntendelelu mukezuke wa Yehowa babeneshibue ne bikale ne makanda a mu nyuma.—Mvese 18, 19.
23. Bua tshinyi Musambu wa 51 udi ne bua kutusaka bua kuikala ne dikima ne ditekemena?
23 Musambu eu wa majiya wa Davidi udi utukankamija bua kuikala ne dikima ne ditekemena. Udi utuambuluisha bua kujingulula se: katuena banji kujimija bionso nansha tuetu mua kutetuka ne kupona mu mpekatu. Mbua tshinyi? Bualu, bituanyingalala bushuwa, dilekelela dia Yehowa didi mua kutupandisha ku dipanga ditekemena. Bituikala babungame ne baditshipe bajima kudi Tatu wetu wa dinanga wa mu diulu, udi uteleja muadi wetu wa dimulomba dilekelela. Ne ndikolesha ku muoyo dia mushindu kayipu pa kumanya se: Yehowa kêna upepeja mutshima munyingalale.
Mmunyi mûdi mua kuandamuna?
◻ Bua tshinyi bena nkristo badi bakengela mutshima mukezuke ne spiritu munsantu wa Nzambi?
◻ Ntshinyi tshidi munyingaladi mua kulongesha bashipi ba mikenji ya Yehowa?
◻ Mmunyi mudi Yehowa wangata mutshima munyingalale ne musunsuke?
◻ Mmalongesha kayi adi asanganyibua mu Musambu wa 51?
[Tshimfuanyi mu dibeji 15]
Utu usambila bua kulomba spiritu munsantu ne wepuka bua kumunyingalaja anyi?
[Tshimfuanyi mu dibeji 17]
Leja dianyisha bua buimpe bua Yehowa bukena-butuakanyine pa kumanyisha bulelela buende