Utshidi muvuluke anyi?

Uvuaku mueleele meji menemene pa nimero ya ndekelu ya Tshibumba tshia Nsentedi anyi? Bikalabi nanku, kabiyi mpata, neusanke bua kuandamuna ku nkonko idi ilonda eyi:

▫ “Tshimanyinu tshidi tshileja buimpe” budi Yehowa uleja kudi aba badi balonda dikasa dia Yezu ntshimanyinu kayi? (Musambu wa 86:17)

Tshidi “disanka dia spiritu munsantu” diakakolesha bena nkristo ba kumpala, e kubapetesha mushindu wa kunanukila mu makengeshibua a mishindu mishilangane avuabo bapetangane nawu. (1 Tesalonike 1:6) Bidi bia muomumue lelu’eu, Yehowa, Mufidi wa “dipa dilenga dionso ne tshintu tshipuangane tshionso,” udi ne disanka dia kufila “spiritu munsantu kudi aba badi bamulombaye.” (Yakobo 1:17; Luka 11:13) Nenku, disanka dia spiritu munsantu ke didi dienzela balongi ba Yezu “tshimanyinu tshidi tshileja buimpe.”​—12/15, mabeji 23, 24.

▫ Bua tshinyi bidi ne mushinga bua tuetu kuanyisha mmuenenu wa Nzambi pa dishima?

Tudi tubala mu Musambu 5:6 ne: Nzambi ‘neabutule aba badi bamba dishima.’ Buakabuluibua 21:8 udi usakidila kabidi ne: tshiavua kufikila bena mashimi buonso tshidi “lufu luibidi.” Nanku, kuanyisha kuetu kua mmuenenu wa Nzambi pa dishima kudi kutupetesha kambidila kakole ka bulelela, bua kupeta nenku dipa dia muoyo.​—12/15, dibeji dia 28.

▫ Nntendelelu wa mushindu kayi uvua nende bena Samariya? (Yone 4:20)

Mu ntendelelu wabu eu, mututakaja ne mikuabo mivule, bena Samariya bavua banyisha bu Mifundu anu mikanda ya kumpala itanu ya Mozese, mbuena kuamba ne: Pentateke. Pabuipi ne siekele 4 K.B.B., bakiibaka ntempelo pa mukuna wa Gerizime, bua kuakananganaye ne kuluijakaja wa Nzambi uvua ku Yeruzaleme. Nansha muvua ntempelo wabo muvue kubutudibua, mu matuku etu aa kabidi, bena Samariya batu benza difesto dia ku tshidimu ne ku tshidimu dia Pasaka ku Gerizime.​—1/1, dibeji dia 25.

▫ Bena nkristo badi ne bua kutumika bua kukankamija mishindu milenga ya kuepuka dinyanguka dia buloba, mâyi ne kapepa peshi bua mankenda a bintu bidi bitunyunguluke anyi?

Patshivuaye pa Buloba, Yezu kavua ukeba bua kujikija ntatu yonso ivua bantu bapetangana nayi mu tshikondo tshiende. Palua Yehowa, ku butuangaji bua Bukalenge bua Masiya, kunemekejija mêyi-maludiki ende a buakane pa buloba bujima, nsombelu mibi ya miaba itudi basombele neijike bua kashidi. Nenku, Bantemu ba Yehowa badi bangata mmuenenu wa pankatshikatshi. Dinanga dia bantu nabo didi dibasaka bua kuleja kanemu bua diakalenga dia bakuabo, apo, badi ne kabingila bua kuteka dimanyisha dia mukenji wa Bukalenge bua Nzambi pa muaba wa kumpala. (Matayi 6:33)​—1/1, dibeji dia 31.

▫ Mmu mishindu kayi muvua Yezu muikale mutuadi wa butoke? (Yone 8:12)

Yezu wakadifila mu diamba dia lumu luimpe lua Bukalenge bua Nzambi. (Luka 4:43; Yone 18:37) Uvua kabidi muleje patoke mashimi a mu malu a Nzambi ne ke mushindu wakatuadilaye aba bavua bakuatshibue ku bupika bua bitendelelu budikadidi bua mu nyuma. (Matayi 15:3-9) Kutamba bionso, wakadileja se: uvua butoke bua bukua-matunga pa kulambula muoyo wende wa muntu mupuangane bu tshia-bupikudi. (Matayi 20:28; Yone 3:16)​—15/1, mabeji 10, 11.

▫ Ng’amue mabingila kayi atudi nawu bua kukokela Yehowa Nzambi?

Yehowa udi Mfumu wa bukua-bifukibua, nanku, bua kabingila aka, tshietu nkumukokela. Kabidi, bu mudi Yehowa muikale wa-bukole-buonso, kakuena muntu udi mua kumutshimuna, nenku, katuena mua kulengulula dikengedibua dia kumukokela. Bifukibua bionso bia lungenyi biakafukibua bua kusadila dilongolola dia Mubifuki wabi, nenku, bua bualu ebu, mbenzejibue bua kukokela Nzambi mu malu wonso.​—1/2, mabeji 10, 11.

▫ Ntshinyi tshiakambuluisha Yozefe bua kutantamena ditetshibua dia kuenda masandi ne mukaji wa Potifare?

Bukole bua bungi buvua bukokesha tshieledi tshia lungenyi tshia Yozefe. Malanda ende ne Yehowa avua ne mushinga buende yeye, kabidi uvua mumanye ne: kuenda masandi, kakuvu’anu mpekatu muenzela Potifare, kadi, kupita apu, mmuenzela Nzambi.​—15/2, dibeji dia 21.

▫ Miaku ya Yezu ya ne: “Ndi . . . bulelela,” idi ne diumvuija kayi? (Yone 14:6)

Yezu kavu’anu wakula ne ulongesha bulelela; uvua ubutumikila ne ubufuanyikija. Nenku, buena-nkristo bulelela kabuena anu bualu bua mu lungenyi; kadi budi mushindu wa nsombelu.​—1/3, dibeji dia 15.

▫ Musambu wa 51 udi ne dilongesha kayi dia dikankamija?

Musambu eu udi utuambuluisha bua kujingulula se: bituapona mu mpekatu, eku tunyingalala bushuwa, Tatu wetu wa mu diulu, mutunangi, neumvue muadi wetu wa dimulomba dilekelela diende dia bilema ne neatupandishe ku dipanga ditekemena. Kadi, diambedi, tudi ne bua kuanji kuditatshisha bua tshipendu ne bundu bitudi bafikishe pa dîna dia Yehowa.​—15/3, dibeji dia 18.

▫ Batismo wa mâyi ntshimanyishilu tshia tshinyi?

Aba badi batambushibua badi baleja se: badi balambula muoyo wabo kudi Yehowa Nzambi. Badi balejila ku diinyibua diabo mu mâyi ne: mbafue pa bidi bitangila nsombelu wabo wa kale, wa dienza bionso anu buabo nkayabo. Dipatuka mu mâyi ntshimanyinu tshia se: mpindieu, nebikale ne muoyo bua kuenza disua dia Nzambi, pa kuteka dine disua edi pa muaba wa kumpala mu nsombelu wabu. (Matayi 16:24)​—1/4, mabeji 5, 6.