Bua tshinyi kusadila Yehowa?
“DITUKU dia Yehowa ne dikadi pabuipi! ‘Dikenga dinene’ diasemenyi pabuipi, ne kuakupanduka to biwikala kuyi usadila Nzambi.” Biakuambila muntu nanku, newenze munyi?—Sefanya 2:2, 3; Matayi 24:21.
Bushuwa, tudi ne bua kuvuluka dituku dia Yehowa mu lungenyi, ne pa bidi bitangila dipanduka dietu ku dikenga dinene dikadi pabuipi, tshiavua kukosa bualu ndisadila dietu dia Nzambi ne lulamatu. Kadi, abi bidi ne bua kuikala mabingila a diambedi adi atusaka bua kukuatshila Yehowa Nzambi mudimu munsantu anyi? Bua tshinyi udi usadila Yehowa?
Mabingila makumbanyine mmakengedibue
Bikala muntu kayi usadila Nzambi ne kabingila kalenga, udi mua kulekela pikala bipatshila biende kabiyi bikumbane kunyima kua tshikondo kampanda. Tshilejilu, bamue bantu bavua batekemene dialukila dia Yezu Kristo mu 1843 anyi mu 1844, bidimu ebi e kupitabi, ditekemena diabu nanshadi kukumbana. Bafundile pa muanda eu bualu bua mushinga kudi George Storrs, mufundi wa tshibejibeji tshia Scrutateur de la Bible (angl.), ne wakavua kumanyangana pashishe ne Charles Taze Russell, mulombodi wa kumpala wa Société Watch Tower. Mu Scrutateur de la Bible wa mu Septembre 1846, Storrs wakafunda ne:
“Tshilumbu tshia kusadila Nzambi tshidi ne mushinga munene mutambe kupita disemena pabuipi patupu dia dituku diende. . . . Tshiavua kuenzeka pikala tshidimu tshia 1846 ne tshia 1847, bipite difika dia Mukalenge kadiyi dienzeke, tshidi mua kuikala tshibi tshitambe bionso bitudi mua kuelela meji. Malu mamonamona adi ajadika bualu ebu—ndi ngela meji ku malu amvua mumone mu bidimu bia 1843 ne 1844. Nkuepi kudi mpindieu tshitupa tshinene tshia aba bavua badiamba muvuabo ‘basakibue bua kusadilabo Nzambi,’ bu muvuabo ne bua kuenza ku dimanyisha dia tshikondo tshia dilua dia Mukalenge? Ne mukungulu wa mêyi utshidi wamba ne: NKUEPI!!! Anu muntu umue pa bantu dikumi ke udi mua kuikala utshikuata mpindieu mudimu ne unemeka tshikadilu tshiende tshia buena nkristo. Bua tshinyi kudi nsombelu eu? Mabingila mabi avua mabasake. Tshivuabo bajule munda muabo tshivua nangananga budinangi. Bavua benze bu musombele muena mpekato udi udimona ubunga ne lufu pa bulalu buende bua bubedi peshi pa mâyi adi tshipepele tshikole tshituta. Bikalaye ne bua kufua, neavue muena nkristo. Biavuaye kumanya bua se: katshiena mu njiwu, kakuvua kusanka ne buena nkristo nansha kakese.”
Tusadilayi ne mabingila malenga
Budinangi ne buowa bua dibutudibua bidi mua kuvua kusaka bamue bantu bua kudingidija mudibo benza disua dia Yehowa. Bakuabo badi mua kusanka bikole bua ditekemena dia kuikala ne muoyo mu mparadizu, buobo e kuvua kusadila Nzambi anu bua bualu ebu. Pinapo, bikala bantu badi basakibua nangananga kudi mabingila a mushindu’eu mua kuvua kuela meji se: dituku dia Yehowa ne dikenga dinene kabiena pabuipi menemene, kabakuvua, imue misangu, kusadila Nzambi ne disuminyina dionso nansha.
Bushuwa, kabiena bileja budinangi bituikala mua kusanka bualu bua malaya a Nzambi ne mabenensha madianjila kumanyisha. Nzambi udi ujinga bua tuetu kuikala ne disanka bua malu adi mua kuenzeka adi matekibue kumpala kuetu bu mutudi balongi ba Muanende Yezu Kristo. Mupostolo Paulo wakamba ne: “Nusanke mu ditekemena. Nutantamene makenga. Nunanukile mu masambila.” (Lomo 12:12) Padidi disangisha ne masambila, “disanka dia Yehowa” didi diambuluisha bua kutantamena matetshibua ne bua kuindila ne lutulu luonso dikumbana dia malaya a Nzambi. (Nehemiya 8:10) Pinapo, tudi ne mabingila mavule a kusadila Yehowa. Amue a ku wowo mmabingila kayi?
Tshilumbu ne diakalenga
Bu mudiye Mukalenge udi ku muntu kua buonso, Yehowa mmuakanyine ne udi ulomba bua kumulamata amu yeye nkayende. (Ekesode 20:4, 5) Nenku, muena nkristo yonso udi ne tshilumbu tshia muomumue kudi Nzambi, nansha dikenga dinene mua kufika maloba, tshidimu tshilualua, peshi kunyima. Tshiende nkusadila Yehowa kakuyi budinangi, bualu udi munange Nzambi ne mutshima wende wonso, ne anyima wende wonso, ne bukole buende buonso. (Mako 12:30) Bamue bena nkristo ba kumpala bavua bela meji ne: dituku dia Yehowa divua pabuipi, kadi ditekemena diabo kadiakakumbana to, ne bakafua kabayi bamone dituku edi nansha. (1 Tesalonike 5:1-5; 2 Tesalonike 2:1-5) Kadi, bu bikalabo bafue ne lulamatu, balongi ba Kristo aba bela manyi mbashishe kuvua kupeta difutu diabo pa kubishibua ku bafue bua kuya kusombela mu diulu.—Buakabuluibua 2:10.
Bantemu ba Yehowa batambule batismo badi ne bua kusadila Nzambi ne lulamatu bualu bakitaba ku budisuile tshilumbu tshia kuenza disua diende. Anjibi kuela meji kakese! Anu bu banjelo bansantu, tudi mua kuenza disua dia Mukalenge wa biakafukibua bionso. (Musambu wa 103:20, 21) Bu muvua Yezu wangata mudimu eu wa diakalenga ne mushinga mukole mutambe, wakamba ne: “Tshianyi tshiakudia nkuenza disua dia udi muntume ne kukumbaja mudimu wende.” (Yone 4:34) Bituikala ne mmuenenu wa muomumue, netumanyishe ne disuminyina dionso butumbi bua Yehowa ne netuambile bantu bakuabo malongolola ende bu mudiwo masokolola mu Mifundu. Mushindu’eu, netupete petu diakalenga dia kuambuluisha bantu netu mu nyuma. Kabiyi mpata, kuenza disua dia Nzambi bualu tudi ne dinanga kudiye ndiakalenga dia pa buadi, nansha bikala dituku dia Yehowa mua kutuadija tshikondo kayi tshionso.
Dianyisha didi difila kabingila
Dianyisha dietu kudi Yehowa Nzambi bua dinanga divuaye mutuleje pa kufila Muanende bu mulambu wa tshia-bupikudi didi ne bua kutusaka bua kumusadila. Tshikondo kampanda, tuvua kule ne Nzambi bualu bua mpekatu. Kadi Yezu wakamba ne: “Nzambi wakananga bantu bikole e kubapa Muanende umuepele bua muntu yonso udi wenza midimu ya ditabuja kudiye kabutudibu, kadi apete muoyo wa kashidi.” (Yone 3:16) Yehowa ke wakaleja diambedi ditunanga bu muakafunda Paulo ne: “Nzambi udi utupesha tshilejilu tshia dinanga diende nkayende bualu patutshivua bena mpekatu, Kristo wakafua bualu buetu.” (Lomo 5:8) Dianyisha dietu bua mushindu eu udi Nzambi muleje dinanga didi ne bua kutusaka bua kumusadila ne mutshima wetu wonso.
Dianyisha bua diambuluisha dia Yehowa ne mapa a mu nyuma ne a ku mubidi didi kabingila kakuabo ka kumusadila ne bulamatshi ku mikenji. Dîyi dia Nzambi didi mulombodi mulelela—butoke mu njila wetu. Mikanda itudi tupeta ku diambuluisha dia “mupika wa lulamatu ne wa budimu” idi ituambuluisha bua kuakaja nsombelu wetu bua kumvuanganaye ne disua dia Nzambi. (Matayi 24:45-47; Musambu wa 119:105) Ne, bu mutudi tukeba diambedi Bukalenge, Yehowa udi pende utukuba pa bidi bitangila bintu bia ku mubidi. (Matayi 6:25-34) Wewe, utu uleja dianyisha diebe bua bintu ebi anyi?
Dianyisha dietu bua mudi Nzambi mutupandule ku ntendelelu ya mafi nkabingila kakuabo ka kusadila Yehowa ne lulamatu. Mukaji wa ndumba, Babilone Munene, “mmusombe pa mâyi mavule,” mbuena kuamba ne: “bisamba, misumba ne matunga ne miakulu.” (Buakabuluibua 17:1, 15) Apo, ki mmusombe pa basadidi ba Yehowa nansha, mbuena kuamba ne: kêna ne buenzeji kudibo pa bidi bitangila mianda ya ntendelelu ne kêna ubakokesha nansha kakese. Tshilejilu, basadidi ba Yehowa badi bapidia dilongesha dia mashimi dia anyima ukena ufua. Mbamanye bua se: muntu wakafukibua “anyima wa muoyo,” “bafue kabena bamanye bualu nansha bumue,” ne dibishibua dia bantu ku lufu nedikaleku. (Genese 2:7; Muambi 9:5, 10; Bienzedi 24:15) Nenku, kabena batshina bafue ne kabena babatendelela nansha. Dianyisha dietu bua budikadidi bua mushindu’eu bua mu nyuma kadienaku mua kutusaka bua kupidia butontolodi ne kuobokela ntendelelu mukezuke wa Yehowa anyi?—Yone 8:32.
Dianyisha dietu bua dituambuluisha dia ku dituku ne ku dituku dia Yehowa didi ne bua kukolesha dipangadika dietu dia kumusadila ne bulamatshi ku mikenji. Mufundi wa Misambu Davidi wakamba ne: “Yehowa atumbishibue, yeye udi utuambuila bujitu buetu ku dituku dionso.” (Musambu wa 68:19) Muaba mukuabo, mufundi wa Misambu wakamba ne: “Pandekela tatu ne mamu, Yehowa neangakidile.” (Musambu wa 27:10) Eyowa, musadidi wa Yehowa muena lulamatu udi mua kumuambika bujitu buende bua mu tshimfuanyi, bu mudi ntatu yende ne matetshibua ende. Tutu tuleja dianyisha dietu bua dituambuluisha dia Yehowa pa kumusadila ne lulamatu anyi?—Musambu wa 145:14.
Tutumbishayi Yehowa ne Bukalenge buende
Dijinga dia kutumbisha Yehowa didi ne bua kutusaka kabidi bua kumusadila. Bifukibua bia mu diulu mbilejibue bitumbisha Nzambi ne miaku eyi: “Eyowa, Yehowa, Nzambi wetu, wewe udi mukumbanyine bua kupeta butumbi, lumu ne buneme, bualu wewe ke udi mufuke bintu bionso, bidiku ne biakafukibua ku disua diebe.” (Buakabuluibua 4:11) Mukalenge Davidi wakatumbisha Nzambi pa kuamba ne: “Yehowa, bunene, ne bukole ne bulengele ne buimpe ne buneme mbiebe . . . Bukalenge mbuebe, O Yehowa . . . Bubanji ne butumbi mbiebe, ne udi ukokesha pa tshintu tshionso . . . O Nzambi wetu, tudi tukuela tuasakidila ne tusamuna dîna diebe dilengele.” (1 Kulondolola 29:10-13) Tuetu badi basadidi ba Yehowa, tudiku mua kumutumbisha mu mushindu mushadile ku miaku ne ku ngenzelu patutshidi bindile dikumbana dia malaya ende anyi?—1 Kolinto 10:31.
Dijinga diondoke dia kuakula bua Bukalenge bua Yehowa didi ditupetesha kabidi kabingila kakuabo ka dimusadila. Kabingila aka kempe kadi kalejibue biakane mu miaku eyi ya mufundi wa Misambu: “Yehowa, bintu bionso biwakenza nebikutumbishe, ne bakulamatshi bebe nebakubeneshe. Nebambilangane bua butumbi buebe, nebakulangane bua bukole buebe, bua kumanyishabo bana ba bantu bienzedi biende bia bukole ne butumbi bua bulengele bua bukalenge buende. Bukalenge buebe budi bukalenge bua kashidi ne bukokeshi buebe budi bushala mu ndelanganyi yonso yavua kulondangana.” (Musambu wa 145:10-13) Bumanyishi bua bukalenge budi bukenji buimikila bena nkristo ne mudimu wa mushinga mukole mutambe udi mua kuenjibua mu tshikondo tshietu etshi. (Matayi 24:14; 28:19, 20) Udi ne dijinga dikole dia kutumbisha Yehowa ne kuakulangana bua Bukalenge buende kudi bantu bakuabo anyi?
Ditumbisha dia dîna dia Yehowa ne disombuela dia bumfumu buende ku mutu kua bionso bidi ne bua kuikala ne mushinga mukole kutudi mushindu mukumbane mua tuetu kuikala ne dijinga dia kumusadila ne lulamatu luonso. Tudi mua kuikala tusambila bua ditumbishibua dia dîna dia Yehowa ne disombuela dia bumfumu buende ku mutu kua buonso. (Matayi 6:9) Tudi mua kukuata mudimu mu diumvuangana ne masambila etu pa kudifila pa tshibidilu mu mudimu wa buena nkristo ne pa kumuangalaja bulelela pa bidi bitangila mianda eyi ya mushinga.—Yehezekele 36:23; 39:7.
Disanka ne disankishibua
Pa kusadila Yehowa ne lulamatu, tudi ne disanka dia kusankisha mutshima wende ne kuleja ne: Diabolo udi muena dishima. Bu muvua Satana ujadika bua se: budinangi mbudi busaka bantu bua kusadila Nzambi, mudimu wetu muabingila Yehowa ne lulamatu, mukumbaja ne dinanga dionso, udi ushindika muanda wa se: bidibo bajadika kudi mukebianganyi eu mbia dishima. (Yobo 1:8-12) Abi bidi bitupetesha kabingila kalenga ka kuenza anu kuenza tshitudi mua kubala mu Nsumuinu 27:11 ne: “Muan’anyi, ikala ne meji, usankishe mutshima wanyi, bua mmone mua kuandamuna mumbundi wanyi.” Kabidi, patudi tusadila Yehowa ne bulamatshi ku mikenji, nansha kuikala ntatu yonso idi Satana mua kujula, muoyo mutoke wetu udi mua kukolesha bena mudimu netu bena nkristo.—Filipoi 1:12-14.
Disanka ne disankishibua bia mutudi tudifila mu dinowa dia mu nyuma bidi kabidi ne bua kutusaka bua kusadila Yehowa ne lulamatu. Yezu uvua ne disanka bua kuambuluisha bantu nende, nangananga mu malu a mu nyuma. Tudi tubala mu Matayi 9:35-38 ne: “Yezu uvua upitshila mu bimenga ne mu misoko yonso, ulongesha mu nzubu yabo ya nsunagoga, umanyisha lumu luimpe lua bukalenge, upolesha kabidi masama a mishindu yonso ne mateketa a mishindu yonso. Pakamonaye misumba ya bantu, luse luakamukuata, bualu bavua bapungile ne batangalakangane bu mikoko kayiyi ne muyilami. Ke kuambilaye balongi bende ne: ‘Eyowa, bia kunowa bidi bia bungi, kadi, bena mudimu mbakese. Nenku, nulombe kudi Mfumu wa budimi bua atume bantu mu mudimu wende wa kunowa.’” Bikala dinowa dinenge bikole kupita ne patuvua belele meji, netupete kabidi dîba dipitshidile dia kuikala ne disanka ne disankishibua dia kuambuluisha bantu bakuabo mu nyuma. Nebikale kabidi mushindu kampanda wa kuleja dinanga dia muntu netu didi Nzambi utekemena kutudi.—Matayi 22:39.
Bua tshinyi udi usadila Nzambi?
Tudi bakonkonone anu amue a ku mabingila mavule adi atusaka bua kusadila Yehowa ne lulamatu. Mbimpe kuela meji mu disambila ku mabingila adi atusaka tuetu bine mu mudimu wa Nzambi bualu tuetu buonso muntu ne muntu netulumbuluishibue kudiye. (Lomo 14:12; Ebelu 4:13) Ne aba badi bakandamana anu ne mabingila a budinangi kabakupeta dianyishibua dia Nzambi nansha.
Ntshinyi tshitudi mua kutekemena bituikala mua kuteka pa muaba wa kumpala ditumbishibua dia dîna dia Yehowa ne bituikala tumuenzela mudimu munsantu kabiyi bua budinangi? Mmushindu kayipu wavua Yehowa kutubenesha, tuetu ne mudimu wetu kabidi! (Nsumuinu 10:22) Netupete kabidi muoyo wa kashidi bua mutuvua basadile Yehowa ne lulamatu luonso.
[Tshimfuanyi mu dibeji 9]
Binunu bia bantu badi basadila Yehowa ku Japon
[Tshimfuanyi mu dibeji 10]
Badi basadila Yehowa mu Côte d’Ivoire
[Mêyi a dianyisha bua tshimfuanyi mu dibeji 8]
SIX SERMONS, kudi George Storrs (1855)