Nkonko ya babadi

Yone utambuishile Yezu udi ne bua kubikidibua ne: “Yone Mubatiji” peshi “Yone Mubatijanyi”?

Mbikidilu eyi yonso ibidi idi miakane ne mmijadikibue mu Bible.

Yone uvua “ne bua kuakajila Yehowa tshisamba tshilongolola,” ke tshiakenzaye pa “kulongesha batismu bu tshimanyinu tshia dinyingalala bua kupeta dilekelela dia mpekatu.” (Luka 1:17; 3:3) Mupostolo Matayi wakafunda ne: “Yone Mubatiji wakalua ulongesha mu tshipela tshia Yudeya, wamba ne: ‘Nyingalalayi, bualu bukalenge bua mu diulu bukadi pabuipi.’ . . . Nenku, Yeruzaleme ne Yudeya mujima . . . bakalua kudiye, ne bantu bakatambushibua kudiye mu musulu wa Yordane, batonda mpekatu yabo patoke.”​—Matayi 3:1-6.

Nutabalele bua se: Matayi udi umanyisha Yone bu “Mubatiji.” Matayi, mu muyuki wende uvuaye umanyisha bena Yuda, udi ne bua kuikala mujadike se: bena Yuda bavua bamanye muine “Mubatiji” eu. Wakangata muaku “Mubatiji” bu dikuabo dîna. Yezu ne balongi bende bakatumika ne dîna dia “Yone Mubatiji,” bu muakenzabo kudi basadidi ba Herodese.a​—Matayi 11:11, 12; 14:2; 16:14.

Mulongi Mako udi umanyisha mushindu wa muomumue wa kutumika ne dîna dia “Mubatiji.” (Mako 6:25; 8:28) Kadi, pakalejaye Yone, Mako wakamubikila ne: “Yone mubatijanganyi.” (Mako 1:4) Muaku wa tshiena-Greke udibo bangate mu Mako 1:4 mmushilangane kakese ne eu udibo bangate mu mvese mikuabo. Mako 1:4 udi kabidi mua kukudimunyibua ne “eu udi ubatizangana.” Mako uvua ushindamena pa tshivua Yone wenza; uvua mubatijanganyi.

Kadi, kabiena bimueneke se: tudi ne bua kusunguluja mishindu eyi ya dibikila Yone. Mu Mako 6:24, 25, tudi tubala pa bidi bitangila Salome ne: “Wakapatuka ne kuambila mamuende ne: ‘Ndombe tshinyi?’ Wakamba ne: ‘Mutu wa Yone mubatijanganyi.’ Ne lukasa luonso, wakaya kudi mukalenge ne kumulomba, wamba ne: ‘Ndi musue bua umpeshe mpindieu pa dilonga mutu wa Yone Mubatiji.’” Mbikidilu eyi ibidi ivua mua kuangatshibua umue pa muaba wa mukuabo.

Bamue bantu badi mua kumvua “Mubatiji” bilondeshile diumvuija dibidi didi mu nkonga-miaku kampanda: “Muena mu tshisumbu tshia bena Mishionyi badi bashindamene pa bukokeshi bua tshisumbu ne batismu wa kuinyibua kua mu mâyi anu wa bena kuitabuja nkayabo.” Yone kavua nanku nansha kakese.

Nenku, “Yone Mubatiji” ne “Yone Mubatijanganyi” mmbikidilu mimpe ne miakane.

[Mêyi adi kuinshi]