Bua tshinyi kunanga muntu nebe?

MUOYO wa kashidi mmusuikakaja ku dinanga dietu bua Nzambi ne bua muntu netu. Mmuenenu eu wakalejibua kukadi bidimu pabuipi ne 2 000 mu diyukidilangana kampanda diakenzeka.

Muena Yuda kampanda uvua ne dimanya dipiluke dia Mikenji ya Mozese wakebeja Yezu Kristo ne: “Nku dienza tshinyi kungapianyina muoyo wa kashidi?” Yezu e kumuandamuna ne: “Mbafunde tshinyi mu Mikenji? Ntshinyi tshiwudi ubala?” Pa kutela Mikenji, muntu eu wakamba ne: “‘Udi ne bua kunanga Yehowa Nzambi webe ne mutshima webe mujima ne anyima webe mujima, ne bukole buebe buonso ne lungenyi luebe luonso,’ ne, ‘[kunanga] muntu nebe amu bu wewe muine.’” “Wandamunyi bimpe menemene,” ke muakamba Yezu. “Utungunuke ne kuenza nunku ne neupete muoyo.”​—Luka 10:25-28.

Pa nanku, muyukidishanganyi ne Yezu wakebeja ne: “Nnganyi udi menemene muntu nanyi?” Pamutu pa kumuandamuna buludiludi, Yezu wakalonda muyuki kampanda pa bidi bitangila muena Yuda kansanga uvuabu biiba bintu, bamututa ne bamushiya mufue tshipuuka. Bena Yuda babidi bakapitshila muaba awu​—diambedi, muakuidi ne pashishe, muena Lewi. Bubidi buabu bakabandila nsombelu wa muanabu muena Yuda, kadi kabakenza bualu nansha bumue bua kumuambuluisha. Kunyima, muena Samariya kampanda wakalua pende. Luse e kumukuata, yeye kusuika mputa ya muena Yuda, kuya nende mu nzubu kampanda wa tshilala benyi ne kutabalela bua kumukumbajila makuabo malu.

Yezu wakebeja mumuyukidishi wende ne: “Nnganyi wa ku bantu aba basatu udi buebe wewe mudienze muinende kudi muntu eu wakapona mu bianza bia biivi?” Mbimueneke patoke se: mmuena Samariya wa luse. Nenku, Yezu wakaleja ne: dinanga dia muntu nebe dilelela didi disambuka ne pa mikalu ya bisa.​—Luka 10:29-37.

Dibula dinanga bua muntu netu

Lelu’eu, nkuna pankatshi pa bantu bena bisa bishilangane idi yenda ivula. Tshilejilu, mu Allemagne wa bena Néonazi badiku matuku adi panshi aa, bakaladika muntu kampanda panshi, kumudiatakaja ne bilatu biabu bia bujitu, e kumutshibula mbadi pabuipi ne yonso. Pashishe, buobu e kumusanshila maluvu makole ne kumutua kadilu. Muntu eu wakashiyabu mufue, bakamuluisha bualu bavua bela lungenyi se: uvua muena Yuda. Mu dibundangana dikuabu dia mvita didi kadiyi mu diumvuangana ne dituatedi kuulu eku, bakimansha bombe pa nzubu kampanda uvua pabuipi ne tshimenga tshia Hambourg, bena ditunga dia Turquie basatu e kuoshika ne muoyo​—umue wa kudibu uvua muana wa bakaji mutekete wa bidimu dikumi.

Mu tshikondo tshimue tshimue, nangananga ku Est wa matunga a Balkans, mvita yakabudika pankatshi pa bena bisa bishilangane yakashipesha bantu binunu ne binunu. Bakuabu bafuile ku Bangladesh, ku Inde, ne ku Pakistan mu mvita yakabudika pankatshi pa bena bisa bishilangane. Ne mu Afrike, bimvundu pankatshi pa bantu ba makoba ne bisa bishilangane mbishipeshe bakuabu bantu.

Tshikisu tshia mushindu’eu tshidi tshipetesha bantu bavule tunyinganyinga ne mbapangadije bua kubenga kuenzela muntu nabu bibi nansha kakese. Musumba munene wa bena Allemagne bakadisangisha bua kupiisha ngenzelu eu wa tshikisu udi pankatshi pa bena bisa bishilangane mu ditunga diabu. Kadi, La Nouvelle Encyclopédie britanique udi wamba ne: “Bena mu matunga pabuipi ne wonso pa buloba, badi bangata nsombelu wabu buobo bine bu udi mutambe kubandila kupita wa bena mutumba nabu, nansha kabidi wa bakuabu bena dîku diabu mene.” Mmuenenu wa mushindu’eu udi uditshiamakaja mu njila wa dinanga dia muntu nebe. Ntshintu kayi tshidi mua kuenjibua pa bidi bitangila muanda eu, nangananga bualu Yezu wakamba ne: muoyo webe mmusuikakaja ku dinanga bua Nzambi ne bua muntu nebe?

[Mêyi a dianyisha bua tshimfuanyi mu dibeji 2]

Tshizubu: Jules Pelcog/​Die Heilige Schrift

[Mêyi a dianyisha bua tshimfuanyi mu dibeji 3]

Muena Samariya muimpe/​The Doré Bible Illustrations/​Dover Publications, Inc.