Wakakumbaja dijinga dia mutshima wende

KUMONA Bukalenge bua Nzambi bukokesha pa buloba bujima ke dijinga dia mutshima webe anyi? Bikalabi nanku, udi ujinga ne muoyo kulukulu ne usambila bua mabenesha malaya pa buloba mu bukokeshi bua Bukalenge bua mu diulu. Nenku, tukija, bualu “tshintu tshijinga tshidi mutshi wa muoyo paditshi tshifika.”​—Nsumuinu 13:12; Yakobo 5:7, 8.

Kukadi bidimu bitue ku 2 000, Simeone, muntu “muakane ne wa kanemu,” uvua usombela ku Yeruzaleme. Uvua witabuja milayi ivua yakula bua Masiya, ne uvua, ne lutulu luonso, “muindile disambibua dia Izalele.”​—Luka 2:25.

Milayi ya Masiya idi ifila ditekemena

Yehowa ke wakafila mulayi wa kumpala wa Masiya​—mulayi wakafila ditekemena kudi bukua-bantu bena mpekatu ne badi bindila lufu. Nzambi wakadianjila kumanyisha divua dia Dimiinu dia “mukajende,” anyi bulongolodi mu bukua-bifukibua.​—Genese 3:15.

Yeye mene ke wakalejibua bu dimiinu dia Abrahame, ne Yakoba wakadianjila kuakula bua dilua diende. (Genese 22:17, 18; 49:10) Butumbi bua Mukalenge Masiya buakasamunyibua mu misambu. (Musambu wa 72:1-20) Yeshayi wakadianjila kuamba ne: Dimiinu divua ne bua kuledibua kudi mukaji utshivua kamama, ne Mika wakafila mulayi ne: diledibua edi divua ne bua kuenzeka ku Beteleme. (Yeshayi 7:14; Mika 5:2) Eyi ng’imue ya ku milayi mivule idi itangila Masiya.

Masiya kavua muanji kulua to!

Anjibi kuela meji ku malu a kale, fuanyikijabi se: siekele wa kumpala B.B. udi wenda usemena pabuipi. Mulayi wa ku ntuadijilu uvua wakula bua Masiya uvua Nzambi mufile ukadi mpindieu ne bidimu 4 000. Bena Yuda bavua bamone diupula dia ntempelu wa Yehowa, dinyangakaja ditunga diabo, diya nabu bu bapika ku Babilone munkatshi mua bidimu 70, ne bidimu 500 bia dikokeshibua kudi bamfumu ba bisamba bia bende. Masiya kavua muanji kulua to!

Mmushindu kayipu uvua bena Yuda batshinyi ba Nzambi bazukila dilua dia Masiya! Kudiye, mabenesha avua ne bua kubabodiokela ne kabidi kudi matunga wonso.

Muntu wa kunemekibua

Munkatshi mua bena Yuda ba kunemekibua bavua bajinga ne basambila bua dilua dia Masiya, muvua mununu Simeone, musadidi wa Yehowa wa lulamatu uvua musombele mu Yudeya, tshimamuende wa bukalenge [tshia ditunga]. Bualu bua pa buabu buakenzekela Simeone.

Nzambi wakateka spiritu wende munsantu pa Simeone, ne kumupesha tshikena-kumona bu difutu. Simeone kavua ne bua kumona lufu too ne pavuaye ne bua kumona eu uvua ne bua kuikala Masiya. Kadi bidimu ne ngondo mbiabi bilapuka. Simeone udi wenda ukulakaja ne mbikole bua yeye kutekemena kabidi kushala ne muoyo munkatshi mua bidimu bivule. Dilaya diakamulaya Nzambi nedikumbane anyi?

Dimu’edi (mu 2 B.B.), bansonga bena dibaka babidi pamue ne muana mutekete bakalua mu ntempelu, bafumina ku Beteleme. Spiritu munsantu e kumanyisha Simeone ne: edi ke dituku divua dindila katshia ku kale. Wakaya mu ntempelu, muakamuenenaye eu muena malu wonso avua baprofete bafunde. Wakajuka lubilu wenda ubabata bilondeshile mubidi wende wa muntu mununu, e kumona Yozefu, Mariya ne muana.

Ndisanka kayipu divuaye nadi, Simeone wakambula Yezu muana mu maboko ende! Eu nealue Masiya mulaya​—“Kristo wa Yehowa.” Bu mukavuaye ne bidimu bivule mushindu’eu, Simeone kavua kabidi ne ditekemena dia kumona Yezu ukumbaja mudimu wende wa pa buloba. Kadi, mbualu bua dikema bua kumumona bu muana wa katoto. Milayi ivua yakula bua Masiya yakatuadija kukumbana. Ndisanka kayipu kudi Simeone! Mpindieu, neikale ne disanka bua kulala mu lufu too ne ku dibiishibua ku bafue.​—Luka 2:25-28.

Mêyi a Simeone a bu-profete

Padi Simeone ubandisha dîyi bua kusamuna Yehowa, tudi tumumvua wamba ne: “Mpindieu, Mukalenge Munene, lekelaku mupika webe aye mu ditalala bilondeshile dimanyisha diebe; bualu mêsu anyi amonyi uudi utumika nende bua kufila lupandu, eu uudi mulongolole kumpala kua bisamba bionso, butoke bua kumbusha nabo tshilamba tshidi pa mutu pa matunga ne butumbi bua tshisamba tshiebe, Izalele.” Yozefu tatuende mudishi wa Yezu pamue ne mamuende, Mariya, badi bakema bikole bua mêyi aa.​—Luka 2:29-33.

Mpala wa Simeone udi ubalakana padiye ubenesha Yozefu ne Mariya, ubanjingila patoke dibenesha dia kudi Yehowa bua bakumbaje midimu yabo pa bidi bitangila muana. Pashishe, tshilunji tshia mpala wa muntu mununu tshidi tshibatama. Wakambila Mariya ne: “Tangila! Eu mmuladika bua dipona ne dijuka tshiakabidi dia bavule mu Izalele ne bua tshimanyinu tshiapetulabo bamba ne: (Eyowa, muele mule neutubule anyima webe), bua ngelelu wa meji wa mu mitshima ya bantu bavule kujandudibua.”​—Luka 2:34, 35.

Miaku ya Simeone kudi Mariya

Fuanyikija mushindu uvua Mariya mudiumvue. Ntshinyi tshivua Simeone umvuija? Bamue nebitabuje Kristo ne bajudibue mu nsombelu wabo munyanguke. Kadi, bakuabo bavua mua kumubenga, kututa dikasa kudiye ne kudishinda. Amu bu muvuabu badianjile kubimanyisha, Yezu wakamueneka bu dibue divua dikulula bena Yuda bavule. (Yeshayi 8:14; 28:16) Miaku ya Simeone kayena yumvuija ne: bena Yuda bavua ne bua kudishinda diambedi mu dibula ditabuja ne pashishe kujuka mu ditabuja pa kuanyisha Yezu. Kadi, ngikadilu ya bantu bua bualu buende ivu’amu ne bua kushilangana bilondeshile muntu ku muntu, yela patoke ngelelu wa meji wa mu mitshima ya bavule ne ibalombola ku dilumbuluisha dia kudi Nzambi bua bimpe ne bibi. Kudi aba badi babule ditabuja, uvua ne bua kuikala tshimanyinu anyi tshintu tshia kupetula. Pa kumuitabuja, bakuabo nebajudibue ku lufu mu bilema ne mu mpekato yabo bua kuimana biakane mu disanka ku luseke lua Nzambi. Bienzedi bia bantu kudi Masiya bivua ne bua kuleja tshivua mu mitshima yabo.

Netuambe tshinyi bua miaku ya Simeone eyi: “Muele mule neutubule anyima webe wewe nkayebe”? Kakuena tshimanyinu nansha tshimue mu Mifundu tshidi tshileja se: Mariya uvua ne muele uvua mumutubule munda muende to. Kadi, dibenga Yezu kudi bantu bavule divua ne bua kumubungamija. Ne ndibungama kayipu bua Mariya pa kumona Yezu mupopela pa mutshi! Etshi tshivua mua kuikala amu bu muele mumutubula munda.

Simeone udi ukumbaja milayi ya Masiya

Spiritu wa Nzambi wakasaka Simeone ku dilamika Yezu milayi ivua yakula bua Masiya. Simeone uvua mua kufua mu ditalala anyi mu bupole, “bualu mêsu anyi amonyi uudi utumika nende bua kufila lupandu, eu uudi mulongolole kumpala kua bisamba bionso, butoke bua kumbusha nabo tshilamba tshidi pa mutu pa matunga ne butumbi bua tshisamba tshiebe, Izalele.” (Luka 2:30-32) Ndikumbana kayipu bulenga dia miaku ya mu milayi ya Yeshayi!

Muprofete eu wakadianjila kuamba ne: “Butumbi bua Yehowa nebulejibue bushuwa, ne mubidi wonso neubumone pamue.” “Meme [Yehowa] ndi munupeshe kabidi [Masiya] bua butoke bua matunga, bua lupandu luanyi lufike ku ntengu ya buloba.” (Yeshayi 40:5; 42:6; 49:6; 52:10) Mifundu ya bena nkristo mu tshiena-Greke ne mianda itudi tumona bidi bileja ne: Masiya, Yezu Kristo, mbutoke bua matunga, eu udi umbusha tshilamba tshia mîdima ya mu nyuma ne ufila lupandu kudi bantu.

Dîyi dia Nzambi kadiena dimanyisha makuabo malu mavule adi atangila mununu Simeone nansha. Mbimueneke ne: wakafua kumpala kua Yezu kunzulula njila wa kuya kuikala ne muoyo mu diulu. Mu katupa kîpi emu, Simeone neabiishibue bua kuikalaye ne muoyo pa buloba. Ndisanka kayipu dinuikala nadi, wewe​—ne yeye—​mu bulongolodi bupiabupia muînshi mua bukokeshi bua Bukalenge bua Masiya wa Nzambi!