Mushindu uwudi utendelela udi ne mushinga anyi?

TSHIMENGA tshikese tshia mu Afrike tshidi mu luya lukole, pa dîba mujalamu. Kumbukila mu tshibandabanda tshidi pabuipi, udi mua kumvua lutoyitoyi, miadi ya ngoma, misambu ne dituta bikashi bia disanka. Kadi ebi, ki mmalu a bantu to. Nntendelelu wa bena Afrike wa ka-bukulu. Kadi, mitoyi idi itembangana ne mêyi makondakane adi umbukila ku tshitendelelu tshia karismatike tshidi pabuipi. Batendeledi batshi badi batuuka nyuma badi benza bishima bia “diondapangana” ne bakula mu miakulu. Ku mfudilu mukuabo wa tshimenga, kudi tshikuabo tshimanyinu tshia ntendelelu. Dîyi dia tshipundu dia muezin didi dibikila batendeledi bena tshisumbu tshia Izlame bua kulua kusambila.

Eyowa, ntendelelu mishilangane idi mua kumueneka mu bimenga ne mu misoko mivule bia mu Afrike. Ndelanganyi ya bena Afrike, ivua isanka bua kulonda biabu bilele nkayabu bia ntendelelu. Kadi, pashishe, pakalua ba-misionere ba bena bukua-buena-nkristo, batua mu nyima kudi bisumbu bia basalayi ba mu matunga mashilangane a ku Mputu, ne tshikisu tshionso bakenza madikolela bua muntu yonso “kuvuijibuaye muena nkristo”​—kufika too ne ku dienzeja bena Afrike bua kushintulula mêna abu bua kubikidibua ku avuabu bangata bu a bena-nkristo.

Ntshipeta kayi tshiakapatuka? Diledibua dia ntendelelu uvua usangisha bilele bia bena Afrike ne mitabuja a ntendelelu mienyi. Too ne ku lelu’eu, bena “nkristo” bavule batendeledi batshidi anu batumika ne bitutshishi bia dikasa dimpe ne bijimba. Ba-misionere ba bukua-buena-nkristo bakaleja bibi bitambe buena-nkristo, e kushiya bumpianyi bua tshikisu. Mu bualabale buonso, mmuenenu muatuke udi mu tshieledi tshia lungenyi pa bidi bitangila Bible udi mu bamue bena Afrike lelu’eu, udi pa makaya abo.

Kadi, mishindu mivule ya “buena-nkristo” itshidi mu mushindu mualabale itungunuka ne kuenjibua. Mu bidimu bidi panshi ebi, mu mushindu wa pa buawu, tusumbu tua ntendelelu wa karismatike tudi tuenda tuvula; bitendelelu bidi bitabuja bishima bia diondapangana bidi pabi bienda bivula. Mufundi kampanda wa ngumu mu tshikandakanda wakumvuija bulobeshi bua bitendelelu ebi pa kuamba ne: ‘mu mmuenenu wa bena Afrike, ntendelelu udi ne bua kukuatshishangana. Mu ngenyi ya bena Afrike, ntendelelu udi ne bua kukumbajila diakamue bantu bintu bia ku mubidi bidibu bakengela. Kabidi, kudi bena Afrike badi bitabuja se: malu adi ba-spiritu bamanyisha adi ne mushinga mu mianda pabuipi ne yonso, buondopianganyi bua bitendelelu abi [anyi ditabuja dia luondapu] bua bitendelelu abi budi mu diumvuangana ne bidi nsombelu wa muoyo wende ulomba.’ Diakabi, kadi, bitendelelu bivule bia karismatike mbiasa bua kupeta mfranga.

Lelu’eu, tusumbusumbu tua malu a Nzambi tupite pa 6 000 tudi mu Afrike. Pamu’apa, udi mua kumona se: bitendelelu ebi bionso ne tusumbusumbu tua malu a Nzambi ke bidi ne nsapi wa dipandishibua. Kadi, lukonko lua nshindamenu ndolu’elu: mmunyi mudi Nzambi ubiangata?

Ntendelelu kayi wonso udi’anu mua kulengelela Nzambi anyi?

Bulelela, Mufuki wa bukua-mabulunge kavua mua kutushiya katuyi ne buludiki mu muanda eu to. (Amosa 3:7; Bienzedi 17:26, 27) Tshijadiki tshinene ntshia se: buludiki bua kudi Nzambi budi ne bua kusanganyibua mu Bible. Tòo, Bible kêna anu bu mudi bamue bena Afrike bamubikila ne: mukanda wa batoke to. Bushuwa, muntu nansha umue​—mufike anyi mutoke—​kêna mua kuwangata bu wende nansha. “Mufundu wonso mufundisha ku spiritu wa Nzambi,” ke mudi 2 Timote 3:16 wamba. Bulelela budi mu Bible, malongesha a kutumikila adimu, dikalaku diende katshia ku kale, mushindu wakapandukaye kudi baluishi bende, milayi yende milelela ne diabanyibua diende pa buloba bujima dikena kufuanyikija​—ebi mbijadiki bia patoke bia mudi Nzambi muikale mfumuende.

Ntshinyi tshidi mukanda eu utulongesha? Diambedi, udi utumanyisha ne: “Nzambi mulelela” udi’amu umuepele. (Yone 17:3) Bu mudibi nanku, mmunyi mudi bulelela mua kuikala mu bitendelelu bionso? Tusumbu tua malu a Nzambi katutuku tupanga kumvuangana munkatshi muatu padibi bikengela kujingulula bumuntu menemene bua Nzambi anyi? Umue wa ku bafundi ba Bible, Yakobo udi wakula bua “ntendelelu mukezuke ne udi kayi katoba.” (Yakobo 1:27, Today’s English Version) Bikalabi bikengedibua bua kusunguluja ntendelelu udi kayi katoba, kudi ne bua kuikala kabidi mushindu wa kujingulula ntendelelu wa dishima anyi mudingianganyi. Ebi kabiena biumvuangana ne dilongesha dia se: ntendelelu yonso idi amu njila mishilangane idi ifikisha kudi Nzambi.

Mêyi-maludiki a Mufuki pa bidi bitangila ntendelelu

Mmushindu kayi mujalame wa kutendelela Nzambi? Bible udi utulongesha se: ntendelelu udi kayi katoba, miji yende mmiashila pa dimanya dijalame. Muprofete munene, Yezu Kristo, wakambila, dituku kampanda, mukaji muena Samariya ne: “Nudi nutendelela tshinudi kanuyi bamanye.” (Yone 4:22) Ebi bidi mua kuikala pamu’apa bilelela buebe pebe anyi? Mbakulongesheku ne: Nzambi Wa-Bukole-Buonso dîna diende n’Yehowa anyi? (Musambu wa 83:18) Udiku mumanye malongolola ende pa bidi bitangila bantu ne buloba anyi? (Matayi 6:9, 10; Efeso 1:9, 10; 3:11) Ntendelelu webe udiku ufila ditekemena dilelela pa bidi bitangila nsombelu mulenga mu matuku atshilualua anyi? Biwadiangata wewe muine bu muena nkristo, udiku mua kumvuija mitabuja ebe biangatshile mu Mifundu anyi, peshi mbumpianyi buwudi kuyi nansha mutambe kukonkonona?

Biwajingulula wewe muine kuyi ne dimanya dijalame, udi mua kudipeta pa kulonga Dîyi dia Nzambi, Bible. Yehowa Nzambi, udi utekemena bua bamutendeledi bende bamanye bidi Mukanda Munsantu awu ulongesha. Kupita apu, udi utekemena kudibu bua bawutumikile mu nsombelu yabu. Mmuenenu wetu udi ne bua kuikala wa muomumue ne wa mufundi wa misambu wakamba ne: “Dîyi diebe didi muendu bua dikasa dianyi ne butoke bua njila wanyi.” (Musambu wa 119:105) Mmu bualabale kayi mudi ntendelelu webe ukuambuluisha bua kumanya ne kujingulula malu adi mu Bible?

Mukuabo mushindu wa mushinga mukole udi usunguluja ntendelelu mulelela nditabuja kudi Yezu Kristo, ki ng’anu bu muprofete munene, kadi kabidi, bu Muana umuepele wa Nzambi. Mifundu idi yamba patoke se: Yezu “Ntshiamu [tshia mudimu] Tshinene tshidi tshipetesha muoyo.” (Bienzedi 3:15; 4:12) Bantu bavule badi batonda ditabuja kudi Yezu, kadi, ntshinyi tshidi menemene ditabuja diabu diumvuija? Ditabuja dilelela kudi Kristo didi dilomba ditumikila mêyi-matuma ende. Nzambi mene wakakankamija muanda eu pakambaye ne: “Eu udi Muan’anyi munanga, munvuilai.” (Mako 9:7, Mukanda wa Nzambi) Nenku, batendeledi balelela badi benza madikolela bua kulonda biakane makasa a Yezu. (1 Petelo 2:21) Badi benza nunku pa kudifila mu mudimu wa patoke wa buambi wakabanjijaye. (Matayi 4:17; 10:5-7) Tshitendelelu tshiebe tshituku tshikukankamija bua wewe kudifila pebe mu mudimu eu anyi?

Dinanga ndilombibua padi mu ntendelelu udi kayi katoba. Badi bakula bua Yehowa Nzambi bu tshimuenekelu mene tshia dinanga, ne Yezu wakambila bamulondi bende se: bavua ne bua kubamanyina ku dinanga divuabo ne bua kulejangana munkatshi muabo. (Yone 13:34, 35; 1 Yone 4:8) Patudi tuangata bantu miliyo ne miliyo lelu’eu, badi badiamba mudibo bena nkristo, buloba kabuvuaku ne bua kuwula tente ne dinanga anyi? Bushuwa, bulongolodi buetu ebu mbulue menemene muaba udi dinanga kadiyi disanganyibua. Mvita mmibutule mioyo ya bantu miliyo ne miliyo mu siekele eu nkayende. Dibunda bibawu ne tshinyangu bidi bienda bivula. Nenku, udiebeje nkayebe ne: ‘Bu muntu yonso mua kuikala muena mu tshitendelelu tshianyi, bulongolodi ebu buvua mua kuikala muaba udi dinanga divule disanganyibua anyi?’

Ndekelu wa bionso, Bible udi uleja se: batendeledi balelela badi ne bua kuditapulula ku bulongolodi ebu budi kabuyi bumanye Nzambi. Pakatekaye ditunga dia Izalele wa kale bu dikubi dia ntendelelu mukezuke, wakabela tshisamba tshiende bua katshishemeji bulunda ne matunga manyanguke avua mabanyunguluke. (Dutelonome 7:1-6) Mu Yone 17:16, Kristo Yezu, mu mushindu wa muomumue, wakamba bua bamulondi bende ne: “Ki mbena mu bulongolodi ebu, anu bu mundi tshiyi muena mu bulongolodi ebu.” Batendeledi balelela ba Nzambi kabena badibuejakaja mu mianda ya tshididi, mu tshiendenda, mu bungenda-mushinga bua lukuka anyi mu filozofi kayi yonso idi ipetula Nzambi. (Yone 18:36; 1 Yone 2:15-17) Badi batumikila dîyi-dituma didi mu Lomo 12:2: “Kanulondi kabidi tshilejilu tshia bulongolodi ebu bua malu.” Ke mudi tshitendelelu tshiebe tshikusaka bua kuenza anyi?

Diambuluisha didiku

Eyowa, mushindu uwudi utendelela udi ne mushinga ku mêsu kua Nzambi. Bu mudibi bimutangila, ntendelelu mulelela udi anu umuepele. (Efeso 4:4-6) Dikonkonona dietu dia mu mêyi makese ndilenge amue malu a nshindamenu a dilongesha dia mu Bible. Bua tshinyi kubenga kuenzaku madikolela bua kulonga bivule?

Nansha dishidimuka diebe mu malu a Nzambi katshia ku buana buebe dikale dia mushindu kayi, Bantemu ba Yehowa badi mua kukuambuluisha mu muanda eu. Mbamanyike pa buloba bujima bua mudimu wabu muvule wa dilongesha bantu Bible. Mbadiumvue buomekela bujitu bua kuambuluisha bantu bena bisa bionso, bavua kale bena bitendelelu bikuabo, bua kupeta dijingulula diondoke dia malu adi mu Bible. (Nsumuinu 2:1-6) Badi bapatula mikanda idi yumvuija Bible pa kuenza makebulula a nsongo.a Bushuwa, nebalue nansha ku nzubu kuebe, ku budisuile kabayi bakulomba bua kufuta mfranga bua kukulongesha pa nkayebe malongesha a mu Bible a nshindamenu. Bantu miliyo ne miliyo pa buloba bujima, badi bababidila programme eu wa dishidimuna mushindamena pa Bible. Bua tshinyi kuenaku pebe mua kuenza nunku? Bushuwa, bidi bia mushinga mukole bua wewe kuenza nunku, bualu mushindu uwudi utendelela udi ne mushinga.

[Mêyi adi kuinshi]

[Tshimfuanyi mu dibeji 5]

Ba-misionere ba bukua-buena-nkristo bakaleja buena-nkristo bibi bitambe, e kushiya bumpianyi bua tshikisu

[Tshimfuanyi mu dibeji 5]

Bitendelelu bivule bia karismatike mbiasa bua kupeta mfranga

[Tshimfuanyi mu dibeji 6]

Ditabuja kudi Yezu didi ne muaba munene mu ntendelelu mulelela

[Tshimfuanyi mu dibeji 7]

Bantemu ba Yehowa badi bambuluisha bantu miliyo ne miliyo bua kupeta dimanya dijalame ku malonga a Bible a ku nzubu a ku budisuile