Nngikadilu kayi udi nende bafue?

DITSHINA bafue ndishindamena pa lungenyi ludianjila kufuanyikija​—lua se: bafue badi ne anyima anyi spiritu udi ushala ne muoyo kunyima kua lufu. Pikala Bible ulongesha patoke se: dilongesha edi ndia dishima, nenku muanda wa se: bafue badi mua kukuenzela bibi mmumane kuedibua tshisala. Kadi, ntshinyi tshidi Bible wamba mene?

Pa bidi bitangila ngikadilu wa bafue, Dîyi dia Nzambi didi diamba ne: “Bualu bua badi ne muoyo badi bamanye ne, Netufue; kadi bafue kabena bamanye bualu bumue, kabena ne difutu diabo kabidi; kabena babavuluka. Dinanga diabo ne lukinu luabo ne mukau wabo biakajimina kale; kabena ne bualu bukuabo tshiendelele mu malu onso adi enjibua muinshi mua diba.”​—Muambi 9:5, 6.

Mu mmuenenu wa muanda eu, bafue badi mua kukuambuluisha peshi kukuenzela bibi anyi? Tòo, ke mudi Mifundu yamba. Bafue ki mbamanye bualu nansha bumue ne mbapuwe talalaa. Kabena ne mushindu wa kuyukidilangana ne ba-muoyo anyi kuleja lupampu kayi luonso to​—bu mudi dinanga anyi lukinu—​peshi kuenza bualu kayi buonso. Kuena ne bua kubatshina nansha kakese.

‘Eyowa, abi bidi mua kuikala bilelela biwatangila lufu lua mubidi muena dîna,’ ke mudi bamue mua kuamba. ‘Kadi lufu luena dîna kaluena lukomesha muoyo to; ludi anu lupatula spiritu mu mubidi. Spiritu awu udi mua kuambuluisha anyi kuenzela ba-muoyo bibi.’ Ke mudi bantu miliyo ne miliyo pa buloba bujima bela meji.

Tshilejilu, ku Madagascar, muoyo badi bawangata anu bu muanda wa lupitapita patupu, nenku mikiya ya dijiikibua ne dijula mubidi wa mufue, badi batamba kubiangata ne mushinga kupita difesto dia dibaka. Badi bela meji se: muntu wakafumina kudi ba-nkambua bende ne udi upingana kudibo ku lufu. Pa nanku, nzubu ya ba-muoyo badi bayasa ne mitshi ne matafuadi a buloba, bintu bidi binyanguka kunyima kua tshitupa tshîpi, pabi, nkita, “nzubu” ya bafue, idi pa tshibidilu mienza tshileya ne mmikole. Ku dijula mubidi wa mufue, bena dîku ne balunda badi bela meji se: nebabeneshibue, ne bakaji badi bela meji se: bialengabo mifuba ya mulela wabo kampanda mufue, nebalue bakaji ba muvulu ku dilela. Kadi, ntshinyi kabidi tshidi Dîyi dia Nzambi diamba?

Lufu kaluvua lufundila bukua-bantu to

Bidi bia mushinga bua kumanya se: Yehowa Nzambi wakafuka muntu bua kuikalaye ne muoyo, ne wakakula bua lufu anu bu tshipeta tshia dibenga kutumikila. (Genese 2:17) Muanda udi utamba kubungamija, mulume ne mukaji ba kumpala bakenza mpekatu, ne bu tshipeta, mpekatu wakamuangalaka kudi bukua-bantu bu bumpianyi bukebeshi bua lufu. (Lomo 5:12) Nenku, udi mua kuamba se: lufu ludi muanda mulelela wa mu nsombelu utudi tuakamangana nawu katshia bena dibaka babidi ba kumpala babenga kutumikila, eyowa, muanda wa mu nsombelu udi ubungamija. Tuakafukibua bua kuikala ne muoyo, ke tshidi tshiumvuija kakese bua tshinyi mbitambe kukola bua miliyo ya bantu bungi tshianana kuitababu lufu ne kuakamanganabu nalu ne dikima bu mudilu luangatshibua bu nshikidilu.

Bilondeshile miyuki ya mu Bible, Satana wakateta bua kudinga bantu babidi ba kumpala pa bidi bitangila lufu pa kupindulula didimuija dia Nzambi dia se: dibenga kutumikila divua ne bua kutuala lufu. (Genese 3:4) Kadi, mu kupita kua bidimu, biamueneki patoke se: bantu badi bafua anu bu muakamba Nzambi. Nenku, mu kupita kua siekele, Satana wakandamuna ne dikuabo dishima​—dia se: spiritu udi bu tshimue tshia ku bitupa bia mubidi wa muntu tshidi tshishala ne muoyo ku lufu lua mubidi. Dishima dia mushindu’eu ndikumbanyine Satana Diabolo, uvua Yezu muleja bu “tatu wa dishima.” (Yone 8:44, NW) Bishilangane, diandamuna dia Nzambi ku lufu ndilaya didi dikankamija.

Ndilaya kayi?

Ndilaya dia dibiishibua ku lufu dia bavule. Muaku wa tshiena-Greke udibo bakudimune “dibiishibua” udi a·naʹsta·sis. Ku muaku ku muaku udi umvuija “kuimana tshiakabidi,” ne udi wakula bua dijuka ku lufu. Eyowa, bantu badi balala mu lufu, kadi Nzambi ku bukole buende udi mua kujululula muntu. Bantu badi bajimija muoyo, kadi Nzambi udi mua kubapeteshilula muoyo. Muana wa Nzambi, Yezu Kristo wakamba ne: “diba nedilue diumvua buonso badi mu nkita dî diandi, nebajuke.” (Yone 5:28, 29) Mupostolo Paulo wakaleja diende “ditekemena kudi Nzambi . . . [dia se:] nekuikale dibiishibua ku lufu dia bantu bakane ne dia bantu bapange buakane.” (Bienzedi 24:15, NW) Yobo, musadidi wa Nzambi wa lulamatu uvuaku kumpala kua bikondo bia bena nkristo, wakaleja pende ditekemena diende mu dibiishibua ne: “Biafua muntu, neikale ne muoyo kabidi, anyi? Nakadi kuindila matuku onso a tshikondo tshianyi tshia kuluangana nvita, tô ne hakadi kulua tshikondo tshia kundekela. Wewe [Nzambi] wakadi kumbikila ne meme nakadi kuitaba kûdi.”​—Yobo 14:14, 15.

Dilaya ditokesha bimpe dia dibiishibua ku lufu ki ndijadikaku mudi lungenyi lua se: bantu badi bashala ne muoyo mu tshimuenekelu tshia ba-spiritu luikale lua dishima anyi? Pikala bafue ne muoyo ne batungunuka ne kuikalaku mu diulu anyi mu umue muaba wa ba-spiritu, kadi ntshinyi tshidi mua kuikala tshipatshila tshia dibiishibua ku lufu? Kabenaku mua kuikala bamane kupeta diabo difutu anyi tshivua tshibafundila anyi? Dilonga dia Dîyi dia Nzambi didi disokolola se: bafue mbafue menemene, kabena bamanye bualu nansha bumue, mbalala tulu too ne ku ditabulujibua dinene ku tulu ku dibiishibua mu bulongolodi bupiabupia​—mparadizu—​bulaya kudi Tatuetu wa dinanga, Yehowa. Kadi, pikala lufu kaluyi lumvuija diabulukangana dia mubidi ne spiritu ne pikala spiritu kayi utungunuka ne kuikala ne muoyo, netuambe tshinyi pa mianda ya tshidi tshimueneka bu mayukidilangana kumbukila mu muaba wa ba-spiritu?

Mayukidilangana kumbukila mu muaba wa ba-spiritu

Mbamane kumanyisha mianda bungi bukena kubadika idi yakula bua mayukidilangana adibo bela meji bu adi afumina mu muaba wa ba-spiritu. Ntshinyi tshidi menemene ntuadijilu wawu? Bible udi utudimuija se: “Satana muine udi wangata mpala wa muanjelo wa butoke. Nenku kabiena bikemesha padi bamusadidi bende bangata pabo mpala wa basadidi ba buakane.” (2 Bena Korente 11:14, 15, Mukenji Mulenga) Eyowa, bua kudinga ne kupambula bantu kakuyi lutatu, ba-demon (banjelo bantomboji) batu bayukidilangana ne ba-muoyo, imue misangu baleja mudibu ne diambuluisha.

Mupostolo Paulo udi ufila didimuija dia pamutu bua kampanya aka kadingianganyi: “Bamue nebavile ditaba, nebalamate bena mafi ne malongesha a diabolo.” (1 Timote 4:1, Mukenji Mulenga) Nenku, diandamuna kayi dionso didibo babambidika bafue didi pamu’apa misangu mivule difumina kudi ba-demon badi badienza bu “bena mudimu ba bimpe” ne balubuluja mashimi pa malu a Nzambi, bakuata bantu ku bupika ku bitabataba bidi bibasesula ku bulelela budi mu Dîyi dia Nzambi.

Mu dijadika bua se: bafue kabena mua kuakula anyi kuenza bualu nansha bumue, peshi kumvua tshintu nansha tshimue, Musambu wa 146:3, 4, [NW] udi wamba ne: “Kanuteki ditekemena dienu kudi banene, Peshi kudi muana wa muntu mupatuila ku buloba, udi kayi mua kupandisha. Mupuya wende udi upatuka, yeye udi upingana ku buloba buende; Mu dine dituku adi, ngenyi yende idi ijimina.” Mmupuya kayi udi “upatuka”? Mbukole bua muoyo bua muntu budi bulamibua ku dieyela. Nenku, padi mufue kampanda ukosa mueyelu, biumvuilu biende kabiena kabidi bitumika to. Udi ubuela mu ngikadilu wa dibenga kumanya bualu nansha bumue. Nenku, mbimukolele bua kulombola ba-muoyo.

Ke bua tshinyi Bible udi ufuanyikija lufu lua muntu ne lua nyama, wamba se: bubidi buabo kabena bamanya bualu nansha bumue ku lufu ne badi balukila ku lupuishi luvuabo babenze nalu. Muambi 3:19, 20 udi wamba ne: “Bualu bua malu adi akuata bana ba bantu adi akuata nyama kabidi; mufuafua umue mmufuafua mukuabo; bidi ne muhuya muomumue; bantu kabena bahita nyama buakane; malu onso adi hatuhu. Bionso biyaya ku muaba umue; bionso bidi anu [lupuishi lua, NW] buloba, nebiandamuke [lupuishi lua, NW] buloba kabidi.”

Bu mudiye mumanye se: ba-demon badi benza madikolela bua kudinga bantu pa kubelesha meji se: badi mua kuyukidilangana ne bafue ne kuenzejibua kudibo, Yehowa Nzambi wakadimuija tshisamba tshiende tshia Izalele wa kale ne: “Muntu kikadi munkatshi muenu . . . nansha mutempi wa mbuku, nansha muena dijimbu nansha muena bilengulengu, nansha muena buloshi, nansha musesuishi wa bantu ne miloû yandi, nansha mutendeledi wa bakishi, nansha muena muhongo, nansha muena lubuku lua muzangu. Muntu yonso utu wenza malu au udi bu tshintu tshibi ku mesu kua Yehowa; bualu bua malu au mabi Yehowa, Nzambi wenu, udi wihata bantu ku mesu kuenu.”​—Dutelonome 18:10-12.

Mu butoke buonso, lungenyi lua se: bafue badi mua kutuenzela malu mabi ki ndufumine kudi Nzambi to. Bualu udi Nzambi wa bulelela. (Musambu wa 31:5; Yone 17:17) Ne mmulame malu a dikema atshilualua bua banangi ba bulelela badi bamutendelela “ne spiritu ne bulelela.”​—Yone 4:23, 24, NW.

Yehowa, Nzambi wa bulelela ne dinanga

Tatu wetu wa dinanga wa mu diulu, “udi kayi mua kushima,” mmulaya ne: miliyo ne miliyo ya aba bakafua ne bakedibua mu nkita nebabiishibue ku lufu ne ditekemena dia muoyo wa tshiendelele pa buloba bupiabupia bua buakane! (Tito 1:1, 2; Yone 5:28) Dilaya edi dia dinanga dia dibiishibua ku lufu didi disokolola se: Yehowa udi mu buondoke buonso uditatshisha bua diakalenga dia bantu bende bakafukaye ne udi ne dijinga dikole mu mutshima dia kujikija lufu, tunyinganyinga ne bisama. Nanku katuena ne bua kutshina bafue anyi kunekesha ku diditatshisha pa bidi bibatangila ne malu abavuila to. (Yeshaya 25:8, 9; Buakabuluibua 21:3, 4) Tatu wetu wa dinanga ne Nzambi muakane, Yehowa, udi mua kubabiisha ne neababiishe ku lufu ne neabumbushile bisama bia lufu.

Dîyi dia Nzambi, Bible, didi ne malu mavule adi aleja ngikadilu milaya ikala pa buloba mu bulongolodi bupiabupia bua buakane. (Musambu wa 37:29; 2 Petelo 3:13) Netshikale tshikondo tshia ditalala ne disanka ne dinanga bua bantu netu buonso. (Musambu wa 72:7; Yeshaya 9:7; 11:6-9; Mika 4:3, 4) Buonso nebikale mu dikubibua, nebikale ne nzubu milenga, kabidi ne mudimu udi usankisha. (Yeshaya 65:21-23) Nemuule tente ne biakudia bimpe bua buonso. (Musambu wa 67:6; 72:16) Buonso nebababidile makanda a mubidi mavule. (Yeshaya 33:24; 35:5, 6) Nansha muakokesha bapostolo ne bungi bujadika busakidila mu diulu pamue ne Yezu, Bible kêna wakula bua ngikadilu wa dibeneshibua mu diulu bua anyima ya bakuabo kunyima kua lufu to. (Buakabuluibua 5:9, 10; 20:6) Ebi bidi mua kunyunguluja buongo bikala miliyo ne miliyo ya aba bakâdi bafue batungunuka ne muoyo kunyima kua lufu.

Kadi kabiena binyungulula buongo patudi tujingulula dilongesha dia mu Bible didi ditokesha ne: bafue kabenaku kabidi bu anyima ya muoyo to. Kabena mua kukuenzela bibi to. Aba badi mu nkita ya bivulukilu badi mu diikisha patupu, kabayi bamanya bualu nansha bumue too ne ku tshikondo tshia dibiishibua diabo ku lufu mu tshikondo tshidi anu Nzambi nkayende mujadika. (Muambi 9:10; Yone 11:11-14, 38-44) Nenku, matekemena ne bipatshila bietu bidi anu mu bianza bia Nzambi. “Tuikalayi ne disanka ne tusankila mu lupandu luende.”​—Yeshayi 25:9, NW.

[Tshimfuanyi mu dibeji 7]

Anu bu mudi Dîyi dia Nzambi dileja patoke, bafue kabena benza tshintu nansha tshimue too ne ku dibiishibua ku lufu