Wakitaba bulombodi bua Nzambi

DIFUANYIKIJA muana mupuangane mukupa bua wewe kumutabalela ne mbatekemena kuudi bua umukoleshe biakane. Mmudimu kayipu mukole! Mmunyi mudi muntu mupange bupuangane mua kûkumbaja? Anu pa kuitaba bulombodi bua Nzambi ne kubutumikila mu nsombelu wa matuku wonso.

Bualu bua nunku ke buakenza Yozefe, tatuende mudishi wa Yezu. Bishilangane ne miyuki ya dishima pa bidi bitangila Yozefe, Bible udi wamba malu makese pa mudimu wende wa budipuekeshi ku ntuadijilu wa muoyo wa Yezu [pa buloba]. Tudi bamanye ne: Yozefe ne Mariya mukajende bakakolesha Yezu, bakuabu bana ba balume banayi, ne ba bakaji kabidi.​—Mâko 6:3.

Yozefe uvua ndelanganyi wa Mukalenge wa Izalele Davidi mu mulongo wa Solomo. Uvua muana mulume wa Yakoba ne tatuende muenu uvua Heli. (Matayo 1:16; Luka 3:23) Bu muena mabaya mu tshimenga tshia Nazarete mu Ngalileya, Yozefe uvua ne dimona dikese dia mfranga. (Matayo 13:55; Luka 2:4, 24; fuanyikija ne Lewitiki 12:8.) Kadi uvua mubanji mu nyuma. (Nsumuinu 10:22) Bivua nunku kabiyi mpata bualu uvua witaba bulombodi bua Nzambi.

Kabiyi mpata, Yozefe uvua muena Yuda mupole malu ne mudipuekeshi uvua ne ditabuja kudi Nzambi ne ujinga kuenza tshivua tshiakane. Malu makese avua mamuenzekele mu nsombelu wende mafunda mu Mifundu adi aleja ne: uvua anu utumikila mêyi-matuma a Yehowa nansha wowo a mu Mikenji anyi nansha buludiludi muapeta kudi banjelu.

Muntu muakane nansha muvuaye ne ntatu

Tshidi muntu mutshinyi wa Nzambi ne bua kuenza ntshinyi padiye upetangana ne lutatu lunene? Eyowa, udi ne bua ‘kuteka bujitu buende ham’bidi ha Yehowa’ ne kulonda bulombodi bua Nzambi! (Musambu wa 55:22) Ke tshiakenza Yozefe. Pavuaye mubangila Mariya, “bobo kabayi banji kusomba pamue, e kumusanganabo muikale ne difu dia kudi Spiritu Munsanto.” Bu ‘muvuaye muntu muakane’ Yozefe ‘kavua musue [kumuela patoke, NW], e kupangadikaye bua kumulekela mu musokoko.’ Kunyima kua Yozefe mumane kuela meji pa malu aa, muanjelu wa Yehowa wakamumuenekela mu tshilota ne wakamuambila ne: “Jozef, muana wa Davide, lekela kutshina bua kuangata Mariya mukajiebe; bualu tshidi tshiledibue munda muende atshio, ntshia kudi Spiritu Munsanto. Nealele muana mulume, wewe neumuinyike dina ne: nYezu: bualu yeye neapandishe bantu bende ku mibi yabo.” Pakabikaye ku tulu, Yozefe “e kuenzaye muvua Muanjelo mumuambile, kuangataye mukajiende. Kadi kavua mumanyangane nende too ne muakalelaye muanende muanabute; e kumuinyikaye dina dia Yezu.” (Mateus 1:18-25, Mukenji Mulenga) Yozefe wakitaba bulombodi bua Nzambi.

Augusto Kaisa wakela mukenji ne: bantu badifundisha ku mikanda mu bimenga biabu. Mu ditumikila, Yozefe ne Mariya bakaya ku Beteleme mu Yudeya. Kuinaku Mariya wakalela Yezu ne wakamuladika mu tshidiilu tshia nyama bualu kakuvua nzubu mukuabu uvua ne muaba. Bufuku abu balami ba bimuna bavua bumvue dimanyisha dia banjelu dia diledibua edi dia pa buadi bakalua kumona muana wa katoto. Matuku matua ku 40 kunyima, Yozefe ne Mariya bakakumbaja Mikenji pa kuleja Yezu mu ntempelo ku Yeruzaleme ne kufila mulambu. Buonso buabu bakakema bu muakumvuabu mêyi a tshiprofete a mukulakaje Simeona pa malu manene avua Yezu ne bua kulua kuenza.​—Luka 2:1-33; fuanyikija ne Lewitiki 12:2-4, 6-8.

Nansha mudibi mua kumueneka ne: Luka 2:39 udi uleja se: Yozefe ne Mariya bakaya ku Nazarete diakamue kunyima kua dileja Yezu mu ntempelo, mvese eu udi tshitupa tshia muyuki mukepesha. Bidi bimueneka ne: tshikondo tshîpi kunyima kua dimuleja mu ntempelo, bena lubuku lua mitoto ba ku Est (Bena meji) bakakumbula Mariya ne Yezu mu nzubu kampanda ku Beteleme. Didibueja dia Nzambi mu bualu ebu diakepula bua dikumbula edi kadifikishi Yezu ku lufu. Kunyima kua Bena meji bamana kuya, muanjelu wa Yehowa wakamuenekela Yozefe mu tshilota e kumuambila ne: “Erodese neavue kukeba muana bua kumujimija.” Bu pa tshibidilu, Yozefe wakateya ntema ku bulombodi bua Nzambi ne wakaya ne dîku diende mu Ejipitu.​—Mateus 2:1-14, Mukenji Mulenga.

Kunyima kua lufu lua Helode, muanjelu wakamuenekela Yozefe mu Ejipitu mu tshilota wamba ne: “Juka, angata muana ne mamuende, upingane mu buloba bua Izraele.” Pakumvuaye ne: Âkelao muana wa Helode mmudie bumfumu pa muaba wa tatuende, Yozefe wakumvua buôwa bua kupingana mu Yudeya. Pakuteya ntema ku didimuija dia Nzambi difila mu tshilota, wakaya mu teritware wa Ngalileya, e kusombela mu tshimenga tshia Nazarete.​—Mateus 2:15-23, Mukengi Mulenga.

Muntu wa mu nyuma

Yozefe uvua uludika malu bua dîku diende ditumikila mikenji ya Nzambi ne didishibue mu nyuma. Tshidimu tshionso uvua uya ne dîku diende dijima ku disekelela dia Pasaka mu Yeruzaleme. Mu luendu kampanda lua mushindu’eu, Yozefe ne Mariya bavua balukila ku Nazarete ne bakavua benza dituku dijima dia luendu pakajingululabu ne: Yezu muana wa mvula 12 kavuaku. Pakapinganabu ku Yeruzaleme, bamukeba ne tshisumi tshionso ne ku shòò bakamusangana mu ntempelo, uteleja ne wela balongeshi nkonko muina amu.​—Luka 2:41-50.

Bidi bimueneka ne: Yozefe uvua ulekela mukajende udienzela amue malu. Tshilejilu, pakapinganabu ku Yeruzaleme ne kusangana Yezu mu ntempelo, Mariya ke wakayukila ne muanende wa balume pa bualu ebu. (Luka 2:48, 49) Mu dikola diende bu “muana wa muena mabaya,” Yezu wakapeta bushidimunyi bua mu nyuma. Yozefe wakamulongesha kabidi mudimu wa mabaya, ke bua tshinyi Yezu uvua ubikidibua ne: “muena mabaya muana wa Mariya.” (Matayo 13:55, NW; Mâko 6:3) Baledi batshinyi ba Nzambi lelu’eu badi ne bua kubabidila menemene bikondo bu nunku bua kushidimuna bana babo, nangananga kubalongesha mu nyuma.​—Efeso 6:4; 2 Timote 1:5; 3:14-16.

Ditekemena dia Yozefe

Mifundu kayena miakula bua lufu lua Yozefe. Kadi tshia kuela kashonyi ntshia se: Mâko 6:3 wakabikila Yezu ne: “muana wa Maliya,” ki n’ngwa Yozefe to. Ebi bidi bileja ne: Yozefe ukavua mufue. Kusakidila apa, bu Yozefe mutshikale ne muoyo too ne mu 33 B.B., pamu’apa Yezu mukudika ku mutshi kavua mua kushila mupostolo Yone bujitu bua Mariya.​—Yone 19:26, 27.

Nunku Yozefe neyikale munkatshi mua bafue bikale mua kumvua dîyi dia muana wa muntu ne kubika ku lufu. (Yone 5:28, 29) Pamanyaye ndongoluedi wa Yehowa bua muoyo wa kashidi, kabiyi mpata, Yozefe neakuate nende mudimu ne disanka dionso ne neyikale mukokedi wa butumike wa Mukalenge munene wa mu diulu, Yezu Kristo, anu bu muakateyaye ntema ku bulombodi bua Nzambi kukadi bidimu bipite pa 1 900.

[Tshimfuanyi mu dibeji 31]

Yozefe wakashidimuna Yezu mu nyuma ne kabidi wakamulongesha mudimu wa mabaya