Mmunyi muudi mua kulengeja masambila ebe?

DISAMBILA ntshintu tshia pa buatshi munkatshi mua mapa a dinanga a Yehowa Nzambi. Baluishi badi mua kukunyenga Bible webe anyi kukupangisha bua kudisangisha ne batendeledi nebe, kadi muntu nansha umue kêna mua kukupangisha disambila. Disambila didi ne mushinga muvule mutambe ukena kubadika. Nenku, bidi bia mushinga bua yonso wa kutudi kuanyisha ne kubabidila muabi eu. Ntshinyi tshidi mua kukuambuluisha bua kulengeja masambila ebe?

Bible ki mmukanda wa masambila to. Kadi, udi mua kuangatshibua bu mukanda mutamba bunene bua bukua-bantu pa masambila. Mifundu ya tshiena-Ebelu nkayayi idi ne masambila mapite pa 150. Amue mmîpi; makuabo mmale. Avua enjibua patoke anyi ku lupengeleke, kudi bakalenge peshi kudi bapika, mu ditshionkomoka anyi mu dikenga. Bu muakimba Davidi mu Musambu wa 65:2 (NW), “bukua-bantu buonso” kudimukayi kudi Yehowa, “Mumvu wa masambila.” Bua tshinyi Nzambi wakasaka bafundi ba Bible bua kufunda mulongolongo wa masambila masunguluke a mushindu’eu?

Bua kuandamuna lukonko elu, tukonkonone 2 Timote 3:16 (NW). Udi wamba ne: “Mufundu wonso mmufundisha kudi Nzambi ne udi ne mushinga.” Nenku, masambila adi mu Bible mmafundibue bua kutulombola, anu bu mutu milayi ya mu Mifundu, mêyi-maludiki ne malu a kale bitulombola. Mmunyi mudi masambila aa mua kuikala ne diambuluisha kutudi?

Pa kukonkonona masambila adi mu Mifundu, tudi mua kusunguluja aa akenjibua mu nsombelu idi mifuanangane ne yetu petu. Tudi mua kulonga mushindu udi masambila ashilangana bilondeshile tshipatshila ne nsombelu. Kupita apu, netusokolole biambilu bipiabipia bia disamuna ne diela tuasakidila ne netusangane mêyi mapiamapia bua milombo ne mitendekenu yetu. Mu mêyi makese, masambila adi mu Bible adi mua kutuambuluisha bua kulengeja etu masambila.

Bidi bimueneka patoke se: Mariya wakalua mamuende wa Yezu, uvua muntu wakababidila mêyi akatumikabu nawu mu disambila kampanda diakafundibua mu Bible. Wakakumbula muanabu Elizabete kunyima kua yonso wa kudibo mumane kuimita dîmi dia muana wa balume ku diambuluisha dia Nzambi. Mariya wakasamuna ne kuela Nzambi tuasakidila, ne amue a ku mêyi ende adi mu mushindu wa dikema mafuanangane ne aa adi mu disambila kampanda didi mu Mifundu ya tshiena-Ebelu. Bidi bimueneka anu bu se: Mariya uvua mumanye disambila diakenza Hana, mamuende wa muprofete Samuele. Hana wakiimita pende muana wa balume ku diambuluisha dia Nzambi, bidimu bipite pa 1 000 bangabanga. Bidi mua kuikala se: Mariya uvua weleela meji pa disambila edi bualu divua dileja mushindu uvuaye udiumvua yeye muine anyi?​—1 Samuele 2:1-10; Luka 1:46-55.

Tuambe tshinyi buebe? Udiku mua kuvuluka disambila kampanda dia mu Bible dienza mu nsombelu ya muomumue ne yebe anyi? Kupeta, kubala ne kueleela meji pa masambila a mushindu’eu nebikuambuluishe bua kulengeja diyukidilangana diebe ne Nzambi. Mu tshiena-bualu tshidi tshilonda, tudi tukulomba bua kukonkonona masambila asatu a mu Mifundu Minsantu. Bavua baenza mu nsombelu mishilashilangane idi pamu’apa mua kuikala ya muomumue ne yebe.