Masambila a mu Bible mmakumbanyine dikonkononyibua

MUKAJI kampanda muena kanyinganyinga, mukalenge kansanga, ne Muana wa Nzambi muine bakenza masambila atuakonkonona mpindieu. Disambila dionso diakenjibua bilondeshile nsombelu mishilangane. Kadi, nsombelu ya mushindu’eu idi mua kuikala ne buenzeji kutudi lelu’eu. Ntshinyi tshitudi mua kulongela ku bilejilu ebi?

“Tangila kanyinganyinga ka mupika webe mukaji”

Udiku uluangana ne lutatu kampanda lua munanunanu anyi? Peshi udiku muomekela bujitu kudi kanyinganyinga? Nenku, udi mu nsombelu wa muomumue menemene ne wa Hana bangabanga ne kulelaye Samuele muanende wa balume wa kumpala. Kavua ne bana ne uvua usekibua kudi mukuabo mukaji. Eyowa, nsombelu wa Hana uvua umusuya ne umutondesha kakuyi nansha mushindu wa kudia. (1 Samuele 1:2-8, 15, 16) Wakabila Yehowa ne kuenza mutendekenu udi ulonda eu:

“Ô Yehowa wa biluilu, biwatangila kanyinganyinga ka mupika webe mukaji ne kumvuluka menemene, kuakupua mupika webe mukaji muoyo ne neupe bushuwa mupika webe mukaji muana wa balume, nemmupe Yehowa matuku wonso a muoyo wende, ne kapaya kakakupita mu mutu muende to.”​—1 Samuele 1:11, NW.

Mona se: Hana kakakula malu ne lupuayipuayi nansha. Wakenzela Yehowa dilomba disunguluke (bua ndelanganyi mulume) ne kusangishaku dipangadika dikole (dia kumulambula bua mudimu wa Nzambi). Disambila edi didi ditulongesha tshinyi?

Paudi mu dikenga, sunguluja lutatu luebe mu disambila. Lutatu luebe nansha luolu lua mushindu kayi​—lua nsombelu webe wa ku nzubu, bunkaya anyi disama—​sambila Yehowa bua lutatu elu. Umuleje ngikadilu wa lutatu luebe ne mushindu uudi udiumvua. “Dilolo dionso, ndi ngeyemejila Yehowa ntatu yanyi yonso,” ke mudi Louise mukaji mukamba wamba. “Imue misangu kutu ntatu kabukabu, kadi ntu mu mushindu mutokesha ntela luonso lua kudiyi.”

Kuyukidilangana ne Yehowa mu mêyi masunguluke kudi kupatula bipeta bimpe. Kuenza nunku kudi kutuambuluisha bua kupeta lumvu lutokeshibue lua ntatu yetu, idi mua kumueneka kunyima ne: kayena mitambe bukole to. Kuenza masambila masunguluke kudi kutusulakaja ku tunyinganyinga. Nansha bangabanga ne kupetaye diandamuna ku disambila diende, Hana uvua ne dishindika, ne “mpala wende kakanyingalala kabidi to.” (1 Samuele 1:18, NW) Kabidi, kujalamija bitudi tutela kudi kupetesha mushindu wa kubambisha diandamuna ku masambila etu. “Pandi ntamba kujalamija mêyi mu masambila anyi,” ke mudi Bernhard, muena nkristo wa ku Allemagne wamba, “mandamuna mmatokeshibue bikole bitambe.”

“Kadi ntshidi anu muana wa balume mutekete”

Kadi, muntu udi mua kumvua lutatu lua mushindu mushilangane biapetaye mudimu udiye udiumvua kayi ne dimanya kuenza dia kuukumbaja. Utuku mu tshikondo kampanda mutshintshimikibua kudi bujitu kansanga bukuomekela kudi Yehowa anyi? Peshi bamue bantu badi bakuangata bu udi kayi mukumbanyine mudimu uudi wenza? Nsongalume Solomo uvua mu nsombelu wa nunku pakedibuaye manyi bu mukalenge wa Izalele. Bamue bantu banene bakajinga bua mukuabo muntu kuikalaye mu nkuasa wa bumfumu. (1 Bakelenge 1:5-7, 41-46; 2:13-22) Ku ntuadijilu kua dikokesha diende, Solomo wakalomba mu disambila ne:

“Yehowa Nzambi wanyi, wavuiji wewe nkayende musadidi webe mukalenge . . . Kadi ntshidi anu muana wa balume mutekete. Tshiena mumanye mua kupatuka ne mua kubuela. . . . Upeteshe musadidi webe mutshima mutumikidi bua kulumbuluisha bantu bebe, bua kujingulula malu mimpe ne malu mabi.”​—1 Bakalenge 3:7-9, NW.

Solomo wakashimikila disambila diende pa malanda ende ne Yehowa, pa muabi uvuabo bamupeteshe ne pa bukokeshi buende bua kukumbaja mudimu mumuomekela. Bia muomumue, nansha biatupabu bujitu kampanda butudi tumvua bu budi bupite bukokeshi buetu, tudi ne bua kusengelela Nzambi bua atupe bukole bua kuenza mudimu awu. Tukonkononayi malu adi alonda aa akenzeka:

“Pakandombabu bua kuenza mudimu mutambe bunene mu filiale wa Société Watch Tower,” ke mudi Eugene umvuija, “Ngakadiumvua menemene tshiyi mukumbanyine. Kuvua bakuabo bavua ne dimanya kuenza ne dimonamona dia mianda kumpita. Ngakashala ne tshitabela matuku abidi akalonda, mpitshisha dîba divule mu disambila, diakampetesha bukole ne dishindika bivua bikengedibua.”

Bakalomba Roy bua kuenza muyuki bangabanga ne dijikibua dia mulunda wende uvua mutambe kumanyika wakangulangana ne lufu lua mu tshikoso ne lukuate buôwa. Bantu nkama ne nkama bavua ne bua kuikalaku. Ntshinyi tshiakenza Roy? “Ngakenza disambila dia mu tshimpitshimpi bua kupeta bukole ne nzanzu ya kupeta mêyi makanyine bua kupatula ngenyi miibaki ne kukankamija.”

Bu mudi Mufuki ‘wambuluja bintu’ ne bu mudi bulongolodi buende buenda bualabala, tshipeta ntshia se: bavule ba ku basadidi bende badi benda babuomekela majitu. (Yeshayi 60:22, NW) Biakulombabu bua kuvudija didifila diebe, ikala ne dishindika dia se: Yehowa udi mua kutshintshija dipangika kayi dionso dia dimanya kuenza, dilongeshibua, anyi bukokeshi biebe. Yukidilangana ne Yehowa mu mushindu wa muomumue ne wakenza Solomo, ne Yeye neakupeteshe mushindu wa kukumbaja mudimu eu.

“Bua buonso bikale tshintu tshimue”

Bualu buisatu butu bumueneka lelu’eu mbua padibo balomba muntu bua kuikala muleji-mpala wa kasumbu mu disambila. Padibo batulomba bua kuenza disambila bua bakuabo, ntshinyi tshitudi ne bua kulombamu? Konkonona disambila dia Yezu diakafundibua mu Yone nshapita wa 17. Wakenza disambila edi kumpala kua balongi bende dilolo diende dia ndekelu bu muntu. Mmilombo ya mushindu kayi yakenzaye kudi Tatuende wa mu diulu?

Yezu wakazangika bipatshila bitu bantu buonso badifundila ne ditekemena divua nadi bavuapu. Wakatela ditumbishibua dia dîna dia Yehowa Nzambi ne dimanyishibua dia Bukalenge. Yezu wakazangika mushinga udi nawu malanda adi pankatshi pa Tatu ne Muanende, mashila pa dimanya dia Mifundu. Wakakula bua diditapulula ku bulongolodi ebu, muanda uvua ulongolola balongi bende ku buluishi. Kristo wakalomba kabidi Tatuende bua kukuba balongi bende ne kubasangisha mu ntendelelu mulelela.

Eyowa, Yezu wakazangika buobumue. (Yone 17:20, 21) Ku ntuadijilu kua dilolo adi, balongi bavua baditue mu matandu bu bantu bavua kabayi bapie [mu nyuma]. (Luka 22:24-27) Kadi, mu disambila, Kristo kavua ukeba bua kupishangana apo bua kusangisha. Bia muomumue, masambila a mu dîku ne a mu tshisumbu adi ne bua kulubuluja dinanga ne kukeba bua kujikija disuyangana pankatshi pa bantu. Aba badibo baleja mu masambila badi ne bua kukokibua pamue mu buobumue.​—Musambu wa 133:1-3.

Buobumue ebu budi bulejibue padi bateleji bamba mu nkomenu ne: “Amen,” anyi se: “Bikale nanku.” Bua kuikalabi nanku, badi ne bua kujingulula ne kuanyisha bionso bidi biambibue. Nenku, ki mbikumbanyine kutela mu disambila bualu budi kabuyi bumanyike kudi badipu. Tshilejilu, mukulu kampanda udi uleja tshisumbu mu disambila udi mua kulomba dibenesha dia kudi Yehowa pa bana betu ba mu nyuma balume anyi bakaji badi ne bubedi bukole. Kadi nebikale bitambe buimpe bienzaye nunku anu pikala bavule ba ku badiye uleja mu disambila bamanye muntu awu ne bumvue bakula bua disama adi.

Mona kabidi se: Yezu kakatela mu kanungu mu kanungu bionso bivua muena mu kasumbu yonso ukengela to. Kuenza nunku kuvua mua kumufikisha ku ditela malu avua mamanyike anu kudi bamue bantu. Malu adi atangila muntu pa nkayende mmakanyine kuikala tshiena-bualu mu disambila dia ku lupengeleke, didi mua kualabajibua ne didi mua kuikala dienza ne malu adi mundamunda bu mudi dijinga dia muntu nkayende.

Mmunyi mudi muntu ne bua kudilongolola bua kuleja tshisangilu tshialabale tshia batendeledi mu disambila? Muena nkristo kampanda mupie [mu nyuma] udi umvuija ne: “Ndi ndianjila kukonkonona tshingelela tuasakidila, malomba adi bana betu mua kuikala nawu, ne milombo indi mua kuenza bualu buabo. Pashishe, ntu ndongamija bimpe ngenyi yanyi ne mêyi a disamuna nawu mu tshieledi tshianyi tshia lungenyi. Kumpala kua kuenza disambila dia patoke, ndi nganji kuenza disambila dia mu tshimumamuma, ndomba diambuluisha bua kumona mua kuikala muleji-mpala wa bana betu mu disambila mu buneme buonso.”

Nsombelu yebe nansha yoyi ya mushindu kayi, pamu’apa neusangane disambila mu Bible divua dienjibua kudi muntu kampanda uvua mu nsombelu wa muomumue ne webe. Mulongolongo wa masambila adi mu Mifundu ntshijadiki tshia bulenga-bunangi bua Nzambi. Kubala masambila aa ne kueleelapu meji nebikuambuluishe bua kulengeja masambila ebe.

[Kazubu mu dibeji 5]

MASAMBILA MANENE A MU BIBLE

Basadidi ba Yehowa bakenza masambila pavuabo mu nsombelu kabukabu. Udiku mua kuambuluishibua kudi umue anyi mivule ya ku nsombelu idi ilonda eyi anyi?

Udiku ukengela buludiki bua kudi Nzambi, bu muakenza Eliezere anyi?​—Genese 24:12-14.

Udiku mu njiwu minene, bu muvua Yakobo anyi?​—Genese 32:9-12.

Udiku usua kumanya Nzambi bilenga bitambe, bu muakasua Mozese kumanya anyi?​—Ekesode 33:12-17.

Udiku wakamangana ne baluishi, bu muakenza Eliya anyi?​—1 Bakelenge 18:36, 37.

Buambi mbukukolele, bu muvuabi bua Yelemiya anyi?​—Yelemiya 20:7-12.

Udiku ukengela kutonda mpekatu ne kukeba dilekeledibua, bu muakakengela Danyele anyi?​—Danyele 9:3-19.

Udiku wakamangana ne dikengeshibua, bu muakenza balongi ba Yezu anyi?​—Bienzedi 4:24-31.

Tangila kabidi Matayo 6:9-13; Yone 17:1-26; Filipoi 4:6, 7; Yakobo 5:16.

[Kazubu mu dibeji 6]

TSHIAKUSAMBIDILA PATUDI TULUANGANA NE TSHIBIDILU KAMPANDA TSHIDI TSHIASE MIJI

Udiku uluangana ne butekete kampanda butu buya bualukila anyi? Mmunyi mudi masambila adi mu Bible mua kuikala ne dikuatshisha? Petela dilongesha kudi Davidi, wakasambila misangu ne misangu bua matekete ende.

Davidi wakimba ne: “Umfukune munda muanyi, Ô Nzambi, ne manya mutshima wanyi. Unkonkonone, ne manya ngenyi yanyi milubakane.” (Musambu wa 139:23, NW) Dijinga dia Davidi divua dia se: Yehowa Nzambi afukunune ngenyi yende mibi, mpampakenu, anyi tubingila tusakianganyi. Mu makuabo mêyi, Davidi wakapeta diambuluisha kudi Yehowa pa kuepuka mpekatu.

Kadi butekete bua Davidi buakamutshimuna, ne wakenza mpekatu munene. Apa kabidi, disambila diakamuambuluisha​—tshikondo etshi bua kupingajilula malanda ne Nzambi. Bilondeshile Musambu wa 51:2, Davidi wakasengelela ne: “Unguvuwe tshishiki ku mahambuka anyi, untokeshe ku bubi buanyi.”

Tuetu petu tudi mua kulomba ne budipuekeshi buonso dikuatshisha dia Yehowa bua kukandamena majinga mabi. Ebi nebitupeteshe bukole bua kutshimuna butekete kampanda budi buase miji ne bidi mua kutuambuluisha bua kuepuka mpekatu. Biajukuluka butekete kampanda, tudi ne bua kubila Yehowa tshiakabidi mu milombo bua se: atuambuluishe bua tutungunuka ne kuluangana.

[Bimfuanyi mu dibeji 7]

Masambila menza bua kasumbu adi ne bua kuzangika matekemena a mu Mifundu ne bipatshila bia mu nyuma bia bantu buonso