Bantemu ba Yehowa pa buloba bujima: Zambie

MPATA mialabale, mienza bu mavuala pa lusongo lua tshintente tshibaaluluke tshia bule bua metre 1 200​—ke Zambie eu, ditunga didi munkatshi mua Afrike wa munkatshi ne wa ku sud. Ku nord-est, mikuna ya Muchinga idi ne butumbuke bua metre 2 100. Musulu munene wa Zambèze, udi upueka ne tshikuma pa tshibila tshiende lumu tshia Victoria, ke udi wenza tshitupa tshinene tshia mukalu udi ku sud kua ditunga edi dinyungulula nseke yonso kudi buloba. Kudi dishilangana dinene munkatshi mua bantu, ne bisumbu bia biota bipite pa 70. Miakulu minene muanda-mukulu idi yakudibua mu ditunga edi, kadi kudi mikuabo mivule.

Mu 1911 muakulu mukuabo wakabanga kubanjijibua ne kumuangalaka mu Zambie. Bakumbudi bakatuala mikanda ya Études des écritures, ne kutuadija ku dîba adi, Bantemu ba Yehowa mbenza madikolela bua kumuangalaja “muakulu mukezuke” wa bulelela bua mu Bible mu Zambie. (Sefanya 3:9) Mifuno ya pa buayi mmitabuja mabengangane ne Mifundu pa nsombelu wa bafue. Padi bantu balonga bulelela ne bamona mushindu uvua bitabataba bibakuate mu bupika, badi bafika ku didiumvua ne: baadishikaminyi!​—Yone 8:32.

Tshilejilu, muanetu wa bakaji wa lulamatu udi ulonda ne: “Pakafua manseba mu tshimpitshimpi, mamuanyi, muena Mishonyi munene, wakapampakana. Kunyima kua lumingu lujima lua bilele bia dijikangana, ngakapingana ku musoko bua kumanya muvua makanda ende a mubidi. Ne tshifikilu, meme kusangana mukulumpe kampanda mu nzubu, ne pakayaye, ngakebeja kaku mukaji tshivua muntu awu. E kungambila ne: uvua marabu. Mamuanyi uvua mumubikidishe bua kusombuela lufu lua muanabo wa balume bua ne: anyima wende amone mua kuikisha. Uvua wela meji ne: [anyima wende] uvua ‘anu utua eku utua kuaka,’ bu muvuaye umvuija.

“Kaku mukaji e kumvuija kabidi ne: dibakumbula dianyi divua dibenesha bualu dîku divua dikeba mfranga bua kufuta marabu. Wakandomba bua kufila makuta, kadi ne budimu buonso ngakamuambila ne: bu muena nkristo, tshivua mua kubuelakana mu malu abo to. Ngakelelangana nende meji pa Musambu wa 146:4, udi uleja se: bafue kabena ne meji nansha amue​—nenku kakuena anyima udi ‘utua eku utua kuaka’ to. Tuakakonkonona kabidi Lomo 12:19, udi uleja se: disombuela ndia Yehowa ki ndietu nansha. Kunyima kua abi, ngakakula ne mamuanyi pa ditekemena dia dibiishibua divua Yezu muakule, bu mudibi bifunde mu Yone 5:28, 29. Wakakema bua ditabuja dianyi dikole mu malaya a Nzambi. Katupa kîpi kunyima, wakatuadija kulonga ne Ntemu kampanda e kuenza malubuluka a lukasa. Wakakosa bisuikidi bionso ne tshitendelelu tshiende tshia kale e kuleja diditshipa diende kudi Nzambi ku batismo. Mpindieu udi umue wa ku Bantemu ba Yehowa.”

Mukuabo muanetu wa bakaji udi ulonda ne: “Ngakaya ku dijikibua dia mukaji wa manseba. Ne tshifikilu, meme kusangana manseba ne muanende bavuambula kudi nzala. Kabavua badia kantu katshia dituku divua mukajende mufue. Pangakebeja bua tshinyi nunku, bakankudimuna ne: bilondeshile tshilele, kabavua babalekela bua kutemesha mudilu bua kulamba. Ngakalomba bua kulamba, kadi bamue bena dîku bakatshina bamba ne: meme mushipe tshilele etshi tshia bampangano, muntu yonso neapale!

“Ngakumvuija ne: bu umue wa ku Bantemu ba Yehowa, ndi nnemeka tshidi Bible wamba mu Lewitiki 18:30 ne tshiena ndonda bilele bibengangane ne mifundu to. Mpindieu meme e kubaleja broshire wa Spiritu ya bafue. Lungenyi e kutuya, meme kutungunuka ne kulamba biakudia bua manseba ne bua bantu bakuabo. Balela ba mufue bakalengibua kudi bukitu buanyi ne bakitabuja bua kulonga Bible mu buondoke. Bakaadi bamanyishi bakena babatijibue, ne dîku dijima ndindile mu tshikondo tshîpi emu bua kubatijibua.”

Ndisanka kayipu ditudi nadi padi muakulu mukezuke wa bulelela ubumbula dibuejakaja dia mafi a bitendelelu, nangananga ngelelu ya meji idi miasa miji bikole idi ikuata bantu bakena bamanye bualu mu bupika! Ne dibenesha dia Yehowa, muakulu mukezuke udi umuangalaka mu Zambie, anu bu mudibi pa buloba bujima.​—2 Kolinto 10:4.

[Kazubu mu dibeji 9]

NSOMBELU WA DITUNGA

Tshidimu tshia mudimu tshia 1994

BUNGI BUA BAMANYISHI: 82 926

MUAYENE: Ntemu 1 bua bantu 107

BAVUA BABUELA MU TSHIVULUKILU: 363 372

MUAYENE WA BAMPANDA-NJILA: 10 713

MUAYENE WA MALONGA A BIBLE: 108 948

BAVUA BATAMBUSHIBUE: 3 552

BUNGI BUA BISUMBU: 2 027

BIRO BIA FILIALE: LUSAKA

[Tshimfuanyi mu dibeji 9]

Nzubu ya filiale wa Watch Tower ku mpenga kua Lusaka

[Tshimfuanyi mu dibeji 9]

Bumanyishi mu Shimabala, ku sud kua Lusaka