Nkonko ya babadi

Mu ngakuilu wa tshishiki, kudi dishilangana pankatshi pa mbikidilu ya mu Bible “mikoko mikuabo” ne “musumba munene” anyi?

Eyowa, kadi katuena ne bua kuikala tusuyakajibua tshianana bua miaku anyi kuikala tunyengabajibua biashintakaja muntu kampanda mbikidilu eyi.

Bena nkristo bavule mbibidilangane ne mvese mutudi tusangana mbikidilu eyi. Yone 10:16 (NW) udi umue wa kudiyi. Mu mvese eu Yezu udi wamba ne: “Ndi ne mikoko mikuabo, idi kayiyi ya tshisumbu etshi, ayi payi ndi ne bua kuyituala, ne idi ne bua kumvua dîyi dianyi, ne neyilue tshisumbu tshimue, mulami umue.” Mbikidilu mukuabo, “musumba munene,” udi usanganyibua mu Buakabuluibua 7:9 (NW). Tudi tubala ne: “Kunyima kua malu aa, ngakatangila, e kumona musumba munene [wa bantu] badi muntu nansha umue kayi mua kubala, ba mu matunga wonso ne bisa bionso ne bisamba bionso ne miakulu yonso, biimane kumpala kua nkuasa wa bumfumu ne kua Muan’a Mukoko, bavuale nkanzu mitoke; ne bavua ne malala mu bianza biabo.”

Tuanjibi kukonkonona Yone 10:16 diambedi. Mikoko ayi mbanganyi? Eyowa, mbimpe bua kuvuluka se: balondi ba Yezu buonso ba lulamatu badi babikidibua bu mikoko. Mu Luka 12:32 (NW), wakabikila aba ba munkatshi mua balongi bende bavua ne bua kuya mu diulu ne: “kasumbu kakese.” Kasumbu kakese ka tshinyi? Ka mikoko. “Mikoko” ya “kasumbu kakese” nebikale bena Bukalenge bua mu diulu. Kadi, kudi bakuabo, aba badi ne ditekemena dishilangane, badi Yezu wangata kabidi bu mikoko.

Tudi mua kumona bualu ebu mu Yone nshapita wa 10. Kunyima kua mumane kuakula bua mikoko bu mudi bapostolo bende bakabikilaye bua kuikala ne muoyo mu diulu, Yezu wakasakidila mu mvese wa 16 ne: “Ndi ne mikoko mikuabo, idi kayiyi ya mu tshisumbu etshi; ayi payi ndi ne bua kuyituala.” Biangatshile ku kale, Bantemu ba Yehowa mbajingulule se: mu mvese eu Yezu uvua wakula bua bantu badi ne ditekemena dia muoyo pa buloba. Bena lulamatu bavule mu bikondo bia kumpala kua Kristo, bu mudi Abrahama, Sara, Nowa, ne Malaki, bavua ne ditekemena dia mushindu’eu. Nunku tudi ne kabingila bua kubabala bu bena mu “mikoko mikuabo” ya Yone 10:16. Munkatshi mua Bidimu Tshinunu, bantemu bena lulamatu ba mushindu’eu ba kumpala kua Kristo nebabiishibue ku lufu ne pashishe nebalonge malu adi atangila Yezu Kristo ne nebamuitabuje, bua kulua “mikoko mikuabo” ya Mulami Mulenga.

Tudi kabidi bamanye se: katshia dibikidibua dijima dia kasumbu ka mu diulu diajika, bantu miliyo ne miliyo mbalue bena nkristo balelela. Aba pabu, mu bululame buonso mbabikidibue “mikoko mikuabo,” bualu kabena bena mu “kasumbu kakese.” Bishilangane, mikoko mikuabo lelu’eu mmitekemene bua kuikala ne muoyo mu mparadizu wa pa buloba.

Mpindieu, ntshinyi tshidi mua kuambibua pa tshidi “musumba munene” mutela mu Buakabuluibua 7:9? Eyowa, tangila mu mvese wa 13 ne lukonko, “Mbanganyi ne badi bafumina penyi?” Tudi tupeta diandamuna mu Buakabuluibua 7:14: “Ng’aba badi bafumina ku dikenga dinene.” Nunku “musumba munene” mmuenza kudi aba badi bafuma, anyi bapanduka ku dikenga dinene. Anu bu mudi mvese wa 17 wamba, nebikale ‘balombola ku mpokolo ya mâyi a muoyo’ pa buloba.

Kadi, bidi bimueneka patoke se: bua kupandukabo ku dikenga dinene dikadi pabuipi, badi ne bua kuikala basukule nkanzu yabo mu mashi a Muan’a Mukoko kumpala kua dîba, bua kulua batendeledi balelela. Nunku, nansha mudi Buakabuluibua 7:9 uleja musumba eu kunyima kua dikenga dinene, tudi mua kutumika ne mbikidilu “musumba munene” bua aba buonso badi ne matekemena a pa buloba badi benzela Yehowa mudimu wa tshijila mpindieu, kumpala kua dibudika dia dikenga dinene ne dibundibua dia ntendelelu ya dishima kudi matunga.

Mu tshikoso, tudi ne bua kuvuluka “mikoko mikuabo” bu mbikidilu mualabale, udi unguija basadidi buonso ba Nzambi badi ne ditekemena dia kuikala ne muoyo wa kashidi pa buloba. Udi unguija tshibumbu tshijadika menemene tshia bantu bafuane mikoko lelu’eu badi basangishibue bu “musumba munene” udi ne ditekemena dia kupanduka ku dikenga dinene dikadi pabuipi. Bavule ba ku bena nkristo badi ne muoyo lelu’eu badi “mikoko mikuabo,” ne badi bena mu “musumba munene” buobuo pabo.

Bidi bia mushinga bua kuambulula se: nansha mudibi biakanyine bua kuikala ne dishindika mu ditumika ne mumvuija aa, kabiena bikengela bua muena nkristo kuikala mujinguludi munekesha wa miaku​—muntu udi pamu’apa mua kubikidibua bu mutontolodi wa miaku. Paulo wakadimuija pa bidi bitangila bamue bavua ne “kudisua kukole” ne bavua baditue mu [mudimu wa] “dikokangana ku miaku.” (1 Timote 6:4, NW) Bituikala nkayetu tusunguluja dishilangana pankatshi pa miaku, ebu mbualu buakane. Kadi, kabiena bikengela bua tuetu kujana patoke anyi mundamunda bakuabo badi pamu’apa kabayi batumika ne miaku ya mu Bible ne dishindika dionso.