Nkonko ya babadi

Mariya, wakalua mamuende wa Yezu, ukavua ne difu pakayaye bua kukumbula mulela wende Elizabete anyi?

Eyowa, bijadiki bidi bileja ne: ukavua nadi.

Mu Luka nshapita wa 1, tudi tubala bua musangu wa kumpala pa bidi bitangila difu dia Elizabete, mukaji wa muakuidi Zakariya, wakalela Yone (Mubatiji). Pakavua Elizabete “mu ngondo wende muisambombo muanjelu Gabriele” wakakumbula Mariya bua kumumanyisha se: neimite difu ne nealele “Muana wa Mutambe-Kutumbuka wa mu diulu.” (Luka 1:26, 30-33, NW) Kadi ndîba kayi diakimita Mariya difu?

Muyuki wa Luka udi utungunuka ne kulonda ne: Mariya wakenza pashishe luendu ku Yudeya bua kukumbula muanabu Elizabete uvua muimite difu. Pakasambakana bakaji babidi aba, muana uvua munda mua Elizabete (Yone) wakatupika. Elizabete wakakula bua ‘tshimuma tshia mu lukutu lua Mariya,’ ne kubikila Mariya bu “Mamuende wa Mfumu wanyi.” (Lukase 1:39-44, MMM) Nkomenu wa meji udi se: Mariya ukavua muimite, mbuena kuamba ne: uvua ne difu pakayaye kutangila Elizabete.

Lukase 1:56 (MMM) udi wamba ne: “Mariya kushala kua Elizabete ngondo bu isatu, pashishe kupinganaye kuende.” Mvese eu kêna upetesha mushindu wa kuenza makumi majadika bua kupeta dituku dijalame dia kalandrié. Udi wamba ne: “ngondo bu isatu,” bivua biteka Elizabete mu ngondo wende wa tshitema wa difu.

Kunyima kua mumane kuambuluisha Elizabete munkatshi mua matuku a ku shòò a difu diende, Mariya wakaya kuende ku Nazarete. Pamu’apa Mariya wakasunguluja ne: diakamue pavua Elizabete ne bua kulela (Yone), kuvua pamu’apa ne bua kuikala bakumbudi bavule, bamue ba kudibu bikale nansha bana babu. Abi bivua mua kuikala bualu bua bundu anyi butamuji bua nsongakaji udi kayi ku dibaka uvua mudimitshile difu. Difu dia Mariya dikavua dia tshikondo bule kayi pakayaye ku Nazarete? Bualu uvua pamue ne Elizabete munkatshi mua “ngondo bu isatu,” Mariya uvua pamu’apa ku ndekelu wa ngondo muisatu anyi ku ntuadijilu wa ngondo muinayi wa difu diende pakapinganaye ku Nazarete.