Nkonko ya babadi

Yone wa kumudilu 4:18 udi utuambila ne: “Kamuena ditshina mu dinanga; kadi dinanga diakane tshishiki didi di[p]ata ditshina.” Kadi Petelo wakafunda ne: “Nunange dîku dijima dia bana betu, nutshine Nzambi.” (1 Petelo 2:17, NW) Mmunyi mutudi mua kusuikakaja mvese eyi ibidi?

Petelo ne Yone bavua buonso bapostolo bavua balongele buludiludi kudi Yezu Kristo yeye nkayende. Nunku tudi mua kuikala ne dieyemena dia se: tshiakafundabu tshidi mu diumvuangana. Pa bidi bitangila mvese mitela kuulu eku, dijandula didi se: bapostolo babidi aba bavua bakula bua mishindu mishilangane ya ditshina.

Tuanjayi kukonkonona mubelu wa Petelo. Anu bu mudi mêyi adi kuulu ne kuinshi aleja, Petelo uvua ufila kudi bena nkristo nende mubelu muenzeja kudi spiritu pa mmuenenu wabu kudi bamfumu. Mu mêyi makuabu, uvua umvuija mmuenenu muimpe wa dikokela mu imue mianda. Nunku, wakabela bena nkristo bua kukokela bantu badi ne mianzu ya bumfumu mu mbulamatadi ya bantu, bu mudi bakalenge anyi ba-nguvernere. (1 Petelo 2:13, 14) Pa kutungunuka, Petelo wakafunda ne: “Nunemeke bantu ba mishindu yonso, nunange dîku dijima dia bana betu, nutshine Nzambi, nunemeke mukalenge.”​—1 Petelo 2:17, NW.

Pa kukonkonona mêyi adi kuulu ne kuinshi, mbimueneke patoke se: pakamba Petelo ne: bena nkristo badi ne bua ‘kutshina Nzambi,’ uvua usua kumvuija ne: tudi ne bua kuikala ne kanemu kuondoke, kanême bua Nzambi, ditshina kubenga kusankisha mfumu udi mutambe buonso butumbuke.​—Fuanyikija ne Ebelu 11:7.

Netuambe tshinyi bua diumvuija dia Yone? Ku ntuadijilu wa 1 Yone nshapita 4, mupostolo wakakula bua dikengedibua dia kuteta “mêyi menzeja kudi spiritu” bu mudi aa avua afumina kudi ba-profete ba dishima. Kakuyi mpata mêyi awu kaena afumina kudi Yehowa Nzambi; adi afumina kudi bulongolodi ebu bubi anyi adi aleja mmuenenu wabu.

Bishilangane, bena nkristo bela manyi “badi bafumina kudi Nzambi.” (1 Yone 4:1-6, NW) Bu mudibi nunku, Yone wakabela ne: “Bananga, tutungunukayi ne kunangangana, bualu dinanga ndifumine kudi Nzambi.” Nzambi ke wakela tshiidia tshia nzanzanza mu dilejangana dinanga​—“wakatuma muanende bu mulambu wa dibuikila nawu mpekatu yetu.” (1 Yone 4:7-10, NW) Mmunyi mutudi ne bua kuandamuna?

Mu ngakuilu mupepele, tudi ne bua kushala mu buobumue ne Nzambi wetu wa dinanga. Katuena ne bua kumumvua buôwa anyi kuzakala ku lungenyi lua kusemena pabuipi nende mu masambila. Ku ntuadijilu Yone wakabela ne: “Bikala mitshima yetu kayiyi itupiisha, tudi ne budikadidi bua diakula kudi Nzambi; ne tshionso tshitudi tulomba tudi tutshipeta kudiye, bualu tudi tutumikila mêyi-matuma ende.” (1 Yone 3:21, 22, NW) Eyowa, kuondo ka muoyo kakezuke kadi katupetesha budikadidi bua kusemena pabuipi ne Nzambi katuyi ne buôwa buzembeji anyi bukena bukandi. Ku butuangaji bua dinanga, tudi tudiumvua badikadile bua kuteya ntema yetu yonso kudi Yehowa, anyi kusemena pabuipi nende mu masambila. Mu mushindu’eu, “kamuena ditshina mu dinanga.”

Nunku, tuanjayi kusangisha ngenyi eyi ibidi. Muena nkristo udi ne bua kuikala misangu yonso ne ditshina dinême dia Yehowa, dilela kudi kanemu kuondoke bua muanzu, bukole, ne buakane biende. Kadi tudi kabidi tunanga Nzambi bu Tatuetu ne tudiumvua pabuipi nende ne bikale ne budikadidi bua kusemena pabuipi nende. Pamutu pa kujimijibua didikanda kudi dimumvua buôwa kayi buonso, tudi ne dieyemena se: tudi mua kusemena pabuipi nende, anu bu mutu muana udiumvua ne budikadidi bua kusemena pabuipi ne tatuende muena dinanga.​—Yakobo 4:8.