Kandamena bilele bikena bia buena Nzambi!

“BULELELA nebunupikule,” ke muakamba Yezu Kristo. (Yone 8:32, NW) Eyowa, buena nkristo budi bupikula bantu​—ku bupika bua bitabataba, ku ditabuja malongesha ne matekemena bia dishima, ku bupika bua bienzedi bibiipe.

Kadi, anu bu mu bikondo bia kale, bena nkristo lelu’eu badi misangu mivule bakama bifimpakaji bua kupingana ku bilele bia kale. (Galatia 4:9, 10) Kabiena bisua kumvuija ne: bilele bionso bia bantu mbibi. Bushuwa, muena nkristo udi mua kusungula bua kulonda bilele bia mu ditunga bidi biakane ne bikuatshishi. Kadi padi bilele kabiyi mu diumvuangana ne Dîyi dia Nzambi, bena nkristo kabena batupa ku mikenji. Ke bua tshinyi Bantemu ba Yehowa mbamanyike bimpe bua dibenga diabu dia kusangila mu mafesto a Nowele, mifikilu ya diledibua, ne bikuabu bilele bidi bibengangane ne Dîyi dia Nzambi.

Nkandamenu eu wa dikima utu misangu mivule ufikisha ku disekibua dikole ne buluishi kudi bamanyangana, bena mutumba, ne balela bakena bena kuitabuja. Mbitambe kuikala nunku nangananga mu amue matunga a mu Afrike, mudibu balonda bilele mishindu kabukabu padiku madilu, bibilu bia dibaka, ne maledibua. Bifimpakaji bua kulonda bilele bidi mua kukuatshisha buôwa​—misangu mivule bidi bikonga dikanyina ne bienzedi bia tshikisu. Mmunyi mudi bena nkristo mua kulama nkandamenu mu muanda eu? Kudiku mushindu wa kuepuka buluishi kakuyi ditupa ku mikenji anyi? Bua kuandamuna lukonko elu, tuanjayi kukonkonona mushindu uvua bena nkristo bena lulamatu bapite ne bimue bilele bikena bilonda Mifundu.

Bilele bia madilu bia bitabataba

Mu Afrike wa ku Sud mudi bilele bivulavulayi bia madilu ne bia dijiika bafue. Badi bafuishe batu ne tshibidilu tshia kutshisha butuku bujima​—anyi mafuku a butuku a bungi—​ku nzubu kudi madilu, kudi kapia kalakuka dîba dionso. Bena tshinyongopelu mbabakandike bua kulamba, kukosesha nsuki, anyi kuôwa mâyi too ne ku tshikondo tshidibu bajiika mufue. Ndekelu wa bionso, badi ne bua kudiowesha nkayabu mu bisosa bisambakaja bia mushindu wa pa buawu. Bilele bia nunku mbianyishibue bua bena nkristo anyi? Tòo. Bidi bionso bileja ditabuja kampanda mu dipanga kufua dia anyima ne buôwa bukole bua bafue.

Muambi 9:5 (NW) udi wamba ne: “Badi ne muoyo mbamanye ne: nebafue; kadi, bafue kabena bamanye bualu nansha bumue.” Dimanya bulelela ebu didi dipikula muntu ku dikala ne buôwa bua ‘spiritu ya bafue.’ Kadi, ntshinyi tshidi muena nkristo ne bua kuenza padi balela ne kalolo kuonso bamulomba bua yeye kudifila pende mu dilonda dia bilele bia mushindu’eu?

Tangila bualu buakafikila Ntemu kampanda muena Afrike udi ne dîna dia Jane, pakafua tatuende. Amu utshifikilapu ku nzubu kuvua madilu, bakamuambila diakamue ne: yeye pamue ne bakuabu bena mu dîku bavua ne bua kuja maja banyunguluka tshitalu butuku bujima bua kutukija spiritu wa mufue. “Ngakabambila ne: bu mumvua Ntemu wa Yehowa, tshivua mua kudibueja mu ngenzelu ya mushindu’au to,” ke mudi Jane ulonda. “Kadi, dituku diakalonda dijiikibua, balela bakulumpe bakamba ne: bavua ne bua kuowesha bena mu dîku dia mufue mâyi bua kubakuba ku spiritu wa mufue. Ngakabenga tshiakabidi bua kudifila. Dîba dimue dimue adi, mamu uvua mulama ku luseke mu nzubu kampanda. Muntu kayi yonso uvua usua kumumona uvua ne bua kuanji kunua maluvu a kapia malongolola bua tshipatshila atshi.

“Ngakabenga bua kudibueja mu bionso ebi. Pamutu pa nanku, ngakaya kumbelu bua kulamba biakudia, bingakalua nabi ku nzubu kuvua mamu musombe. Ebi bushuwa biakafuisha dîku dianyi bundu. Balela banyi bakela meji ne: tshivua biakane to.” Kupita apu, bakamuseka ne kumutshipa, bamba ne: “Bu muudi muimanshe tshilele tshietu bualu bua ntendelelu webe, neukengeshibue kudi spiritu wa tatuebe. Bushuwa, kuena nansha mua kulela bana.” Bua musangu eu kabidi, Jane wakabenga bua kutshingishibua. Mbipeta kayi biakamueneka? Udi ulonda ne: “Tshikondo atshi nkavua ne bana babidi. Mpindieu ndi nabu basambombo! Ebi mbifuishe bundu aba bakamba mumvua tshiyi kabidi mua kulela bana.”

“Dikezula” pa kumanyangana

Tshikuabu tshilele ng’etshi tshia dikezula kunyima kua lufu lua muena dibaka umue. Padi mukaji ufua, dîku diende nedituadile mulume mufuishe bukonde buende wa bakaji anyi mukuabu mukaji udi mulela wa pabuipi ne mukajende udi mufue. Udi ne bua kumanyangana nende. Amu muenze nunku ke kushishaye kusela yonso udiye musue. Mbia muomumue padi bayende wa mukaji kampanda ufua. Badi bela meji se: ngenzelu eu udi ukezula muena dibaka udi mushale ku “spiritu” wa muena dibaka udi mufue.

Muntu kayi yonso udi ubenga bua bamuenze “dikezula” dia mushindu’eu mmufuane kujula tshiji tshikole tshia balela bende. Badi mua kumulapa ne kumuseka ne kumuela milawu. Nansha nanku, bena nkristo badi babenga kulonda tshilele etshi. Mbamanye se: pamutu pa kuikala mushindu kampanda wa “dikezula,” dimanyangana kadiyi mu dibaka mbukoya ku mêsu kua Nzambi. (1 Kolinto 6:18-20) Kupita apu, bena nkristo badi ne bua kuselangana “anu mu Mukelenge.”​—1 Kolinto 7:39.

Mukaji muena nkristo kampanda muena Zambie udi ne dîna dia Violet wakajimija bayende. Ndekelu wa bionso, balela bakamutuadila mulume kampanda, bamba amu kuamba bua yeye kumanyangana nende. Violet wakabenga, ne bu dinyoka bakamukandika bua kusuna mâyi ku tshina tshia bantu bonso. Bakamudimuija kabidi se: kendedi mu njila munene, bua se: kalu kupeta njiwu. Kadi, wakabenga bua kutshingishibua né nkudi balela anyi kudi bena mu musoko nende.

Pashishe Violet wakafundibua ku kabadi ka mu musoko au. Ku muab’eu, wakumvuija ne dikima dionso tubingila tuende tuashila pa Mifundu bua muvuaye ubenga kudifila mu dimanyangana dikena dilonda mikenji. Kabadi kakamubingisha, pa kuamba ne: kakena mua kumubambidika bua kulamata bilele ne bikadilu bia mu ditunga bivua bibengangane ne mitabuja ende. Bualu bua mushinga, dibenga diende dia kutupa ku mikenji dienza ne lulamatu diakambuluisha bua kutuyisha difimpakajibua dia bakuabu Bantemu bena mu musoko bakapetangana ne muanda wa muomumue pashishe.

Ntemu muena Afrike udi ne dîna dia Monika wakatantamena difimpakajibua dia muomumue kunyima kua lufu lua bayende. Dîku dia mulume divua disua amu kumupesha mulume mukuabu. Monika udi wamba ne: “Ngakabenga, mupangadije bua kulonda dîyi-dituma didi mu 1 Kolinto 7:39.” Nansha nanku, difimpakajibua edi kadiakajika to. “Bavua bantshingisha,” ke mudi Monika uvuluka. “Bavua bamba ne: ‘Wewe mubenga, kuakusedibua kabidi nansha.’ Bakafika too ne ku diamba ne: bamue bena nkristo nanyi bakadi bumbushe mikiya pa kudikezula mu musokoko.” Nansha nanku, Monika wakakandamana. “Ngakashala mujike bidimu bibidi, pashishe meme kubakibua kabidi bilondeshile buena nkristo,” ke mudiye wamba. Monika udi usadila mpindieu bu mpanda-njila wa pa tshibidilu.

Ditula mafu ne bana bafuile munda

Bena nkristo mu Afrike wa ku Sud badi kabidi bakama ntatu ya bilele bidi bitangila ditula mafu ne bana bafuile munda. Malu adi abungamija aa mbipeta bia dipanga bupuangane dia muntu​—ki ndinyokibua dia kudi Nzambi nansha. (Lomo 3:23) Kadi padi mukaji utula difu, bimue bilele bia mu Afrike bidi bilomba se: mukaji angatshibue bu muimansha bua tshikondo kampanda.

Ke bua tshinyi mukaji kampanda uvua ufuma ku ditula difu wakakema pa kumona Ntemu kansanga ulua buludi kumbelu kuende. Pakavuaye pabuipi, wakamuambila ne dîyi dikole ne: “Kufiki apa! Bilondeshile tshilele tshietu, mukaji udi ufuma ku ditula difu kêna mua kukumbudibua.” Kadi, Ntemu wakamuambila ne: Bantemu ba Yehowa badi batuadila bantu ba mishindu yonso mukenji wa mu Bible, kabidi se: kabena balonda bilele bia mu ditunga pa ditula mafu. Pashishe wakamubadila Yeshaya 65:20, 23, umvuija se: muinshi mua Bukalenge bua Nzambi ditula mafu ne bana bafuile munda kabiakuikalaku. Bu tshipeta, mukaji au wakitaba dilonga dia Bible kumbelu.

Bilele bia bitabataba bidi mua kuikalaku kabidi padibu bajiika bana bafuile munda. Pakaya Ntemu kampanda muena dîna dia Joseph ku dijiika dia mushindu’eu, bakamuambila se: buonso bavuaku bavua ne bua kuôwa bianza biabu mu bimue bisosa bisambakaja ne kulaba buanga ebu pa biadi biabu. Bavua bamba se: bivua bikandika “spiritu” wa muana bua kapinganyi ne kubenzela bibi. Joseph wakabenga ne kanemu kuonso, pa kumanya dilongesha dia Bible dia se: bafue kabena mua kuenzela badi ne muoyo bualu bubi. Nansha nanku, bamue bakateta bua kumufimpakaja bua adilabe buanga ebu. Joseph wakabenga tshiakabidi. Pa kumona ngikadilu ukena buôwa wa muena nkristo eu, bakuabu bantu bavuaku bakabenga pabu bisosa abi.

Epuka dikokangana ku mêyi, kadi ushale mukandamane

Ditshina badi ne muoyo ne buôwa bua kuimanshibua kudi bakuabu bidi mua kuikala bienzeji bikole bua kutupa ku mikenji. Nsumuinu 29:25 (NW) udi wamba ne: “Ditshina bantu ke didi diteya buteyi.” Malu menzeka atuatedi kuulu eku adi aleja bulelela bua tshitupa tshia ndekelu tshia mvese eu: “Kadi muntu udi weyemena Yehowa neakubibue.”

Nansha nanku, misangu mivule kutu mushindu wa kuepuka dikokangana ku mêyi. Tshilejilu, padi muena nkristo mubikidibue ku dijiika dia mulela kampanda, kêna ne bua kuindila too ne padiye uditeka kumpala kua nsombelu mukole udi mua kumufikisha ku ditupa ku mikenji. “Muntu mudimuke udi utangila dikenga diamba kumukuata, udi usokoma; kadi batshimbakanyi badi ba[p]itaku, badi bakengeshibua.”​—Nsumuinu 27:12.

Nebikale bia meji bua kuebeja ne bukalanga pa bilele bikalabu ne bua kulonda. Pikalabi kabiyi kuanyisha, muena nkristo udi mua kutumika ne tshikondo atshi bua kumvuija bua tshinyi kêna mua kudifila [mu tshilele atshi], pa kuenza nunku “ne lutulu ne kanemu kuondoke.” (1 Petelo 3:15, NW) Padi muena nkristo udianjila kumvuija mmuenenu wende mushindamene pa Bible, balela bende batu pa tshibidilu banemeka mitabuja ende ne kabatu bafika ku dimukanyina anyi dimutshingisha.

Nansha diandamuna dia balela dikala munyi, muena nkristo kêna mua kutupa patupu ku mikenji pa kulonda bilele bidi bifuisha Nzambi bundu​—nansha biamukanyinabu anyi biamukengeshabu mu mushindu kayi wonso. Tukadi bamane kupikudibua ku buôwa bua bitabataba. Mupostolo Paulo wakabela ne: “Bua budikadidi bua mushindu’eu ke buakatupikuila Kristo. Nenku, kandamanayi ne kanudifinakaji kabidi ku bukokeshi bua bupika nansha.”​—Galatia 5:1, NW.

[Tshimfuanyi mu dibeji 29]

Bavule badi bitaba se: muntu udi mufue udi mua kutumika bu mutuangaji ne kufila mikenji kudi balela bakavua badianjile kufua