Bamanyishi ba Bukalenge badi balonda

“Wenze mudimu wa mumuangalaji wa evanjeliyo”

KUIKALA mumuangalaji wa evanjeliyo kudi kumvuija tshinyi? Muaku eu nnkudimuinu wa tshiena-Greke eu·ag·ge·li·stesʹ, udi musuikakaja menemene ku muaku eu·ag·geʹli·on, udi umvuija “lumu luimpe.” Nunku’eu, mumuangalaji wa evanjeliyo udi muambi, anyi mutuadi wa mukenji, wa lumu luimpe.

Bena nkristo balelela buonso mbamuangalaji ba evanjeliyo bualu badi bamanyisha lumu luimpe ludi lutangila Bukalenge bua Nzambi. Mu mushindu mukumbanyine, mupostolo Paulo wakabela Timote bua ‘kuenza mudimu wa mumuangalaji wa evanjeliyo.’ Timote uvua ne bua kuangata mudimu eu kakuyi bilele. Paulo wakamulomba bua ‘kulama mmuenenu wende wa pankatshinkatshi mu malu wonso’ ne bua ‘kukumbaja mudimu wende menemene.’​—2 Timote 4:5, NW.

Bu mutudi bamuangalaji ba evanjeliyo tudi petu tuangata mudimu wetu kakuyi bilele ne ‘tulama mmuenenu wetu wa pankatshinkatshi,’ anyi tushala bakanzabale bua kuabanya lumu luimpe tshikondo tshionso tshiakanyine. Bavule mbafike mushindu’eu ku dimanya Yehowa ne malaya ende kunyima kua dipetshibua kudi Bantemu ba Yehowa ku bumanyishi buenza mu mpukapuka. Ebi ke biakenzekela Seymore, mulume kampanda wa ku Barbade [Antilles].

Seymore uvua mulongeshi mu tshilongelu kampanda tshia mbulamatadi. Charles, mulongeshi bua mêba makese mu tshilongelu tshimue tshimue etshi ne Ntemu wa Yehowa, uvua mumuangalaji wa evanjeliyo mukanzabale. Uvua ministre wa ku dîba ne ku dîba, anyi mpanda-njila, ne uvua ubabidila tshikondo tshionso tshiakanyine bua kuabanyangana lumu luimpe ne bakuabu. Bivua ku diambuluisha dia bumanyishi bua Charles buenza mu mpukapuka kuvua Seymore mumvuile mukenji wa Bukalenge bua musangu wa kumpala.

Kabiakanenga bua Seymore kupangadija pende bua kuabanyangana malelela a mu Bible ne bantu ba bungi bavuaye mua kupeta. Nunku wakatuadija mayukidilangana a mu mpukapuka ne bantu ku muaba wende wa mudimu, nangananga balongi bende. Nansha mudi mu imue miaba malu a Nzambi kâyi mua kubuejibua mu bilongelu bia mbulamatadi, mulume eu wakapeshibua mudimu wa kulongesha malu a Nzambi ne a nsombelu wa tshitembu. Kadi mpindieu mmuenenu ya kale ya Seymore pa malu aa ikavua mipingana kudi dimanya diende dia Bible ditshivuaye ufuma ku dipeta. Pa mêba a diikisha, uvua uyukila ne balongi bende pa bidi bitangila dilaya dia Nzambi dia bulongolodi bupiabupia ne ditekemena dia muoyo wa kashidi.

Mmunyi muakandamuna bana? Bavule bakaleja dijinga dilelela dia kumanya bivule pa lumu luimpe lua Bukalenge bua Yehowa. Kunyima, Seymore wakatuadija kulombola malonga a Bible ne balongi bende 13. Dijinga diabu dia kumanya bivule divua ditambe bunene; nunku bakalongolola bua kulonga Bible misangu ibidi ku lumingu. Ndekelu wa bionso bavule ba kudibu bakatuadija kubuela mu bisangilu bia bena nkristo ku Nzubu wa Bukalenge wa Bantemu ba Yehowa wa muaba au. Lelu’eu tshitema ba kudibu mbalue Bantemu ba Yehowa baditshipe ne batambushibue. Pa bidi bitangila Seymore, udi mpindieu ukumbaja mudimu wende menemene pa kusadila bu mpanda-njila wa pa tshibidilu ne mukulu mu tshimue tshia ku bisumbu bia Bantemu ba Yehowa ku Barbade.

Ebi bidi amu tshilejilu tshimue tshia mudi Bantemu ba Yehowa pa buloba bujima ‘benza [tshimue tshitupa tshia] mudimu wa bamuangalaji ba evanjeliyo,’ pa kudifila mu bumanyishi bua mu mpukapuka. Badi balonda mubelu wa mu Bible udi usanganyibua mu Kolosai 4:5, 6, udi wamba ne: ‘Nuende mu meji ku mesu kua bantu badi kabai munkatshi mua bena ditabuja; nudisumbile tshikondo patshiditshiku tshia kuenza bimpe. Mei enu ikale [malengele, NW] misangu yonso, matue bu luepo, bua nuenu numanye mua kuandamuna muntu ne muntu dîyi.’