Bamanyishi ba Bukalenge badi balonda

“Bakenka bu bimunyi bia butoke mu bukua-bantu”

BANTEMU BA YEHOWA mbamanyike bu tshisumbu tshishilangane ne bikuabu ne misangu mivule batu babendeshila lumu lubi bua dibenga diabu dia diedibua mashi. Nansha nanku, mmuenenu eu mmushindamena bikole pa Bible. Udi uleja ne: Nzambi kêna wanyisha ditumika dibi ne mashi, bualu mashi adi ne mushinga mukole ku mêsu kuende. (Genese 9:3, 4; Lewitiki 17:14) Bu tshipeta tshia dikonkonona Mifundu pa muanda eu, Bantemu ba Yehowa badi bakomesha ne: dîyi-dituma dia mu Bible dia ‘kudilama ku mashi’ divua patoke ne bua kukonga tshienzedi tshia buena-lelu tshia diela mashi.​—Bienzedi 15:19, 20, 28, 29.

Mu bidimu bishale ebi bena mu nsangilu wa buondapi, pamue ne tubadi mu amue matunga, mbafike ku dibingisha Bantemu ba Yehowa pa muanda eu. Tshilejilu, mu Danemark mamu kampanda utshivua nsongakaji úvuá mumanye bimpe mmuenenu wa Bible udi utangila mashi wakafua bu tshipeta tshia ku njiwu ya mashinyi. Bua dibenga diende dia kuitaba diedibua mashi, ba-minganga bende bakasonsola mu bule bua ngondo mujima kampanye ka lukuna ku bimuangalaji bia ngumu bua Bantemu ba Yehowa.

Baledi ba nsongakaji eu bakalomba dikebulula, ne mu Tshisanga 1994 dipangadika diakapatudibua kudi Nsangilu wa mu Danemark wa Didiabakena dia Babedi. Divua diamba ne: mubedi uvua mufue, ki mbualu uvua mubenga mashi, kadi mbua ditumika ne lulèngù dia buondapi. Dipangadika edi divua dishindamene pa makebulula menza kudi Nsangilu wa Bashikuluji ba Malu a Luondapu ne bamanyi bapiluke mu malu a makanda a mubidi. Mu mukanda mutumina nzubu yonso ya malu a luondapu mu Danemark, Nsangilu wa Ditunga wa Malu a Makanda a Mubidi wakamanyisha ne: ba-minganga badi ne tshia bua kupetesha Bantemu ba Yehowa ngondapilu mushilangane mutambe buimpe udiku, pa kuangata ne mushinga dibenga diabu dia kuitaba mashi.

Tshilumbu tshikuabu tshivua tshitangila Dan, Ntemu wa bidimu 15 wakafua ku disama dia leucémie. Mu tshilumbu etshi ba-minganga bakanemeka dipangadika dia dikima dia Dan dia kubenga diedibua mashi. Ebi biakakebesha kampanye katangalake mu bikandakanda ne tudiomba muvua bamuangalaji ba ngumu badiwula ba-minganga bua lufu lua Dan. Kadi, bavule kabakanyisha kampanye aka ka tshipatshila tshibi.

Tshilejilu, mulombodi wa tshilongelu muvua Dan ulonga uvua mu Nzubu wa Bukalenge bua muyuki wa dijiika mufue. Wakaleja disuyibua diende bua ngumu mibi miendesha pa lufu lua Dan. Kunyima kua diela Ntemu muena mudimu nende nkonko mivule pa bidi bitangila Bantemu ba Yehowa, wakitaba bua kuangata kasete video ka Les Témoins de Jéhovah: Un nom, une organisation. Kasete aka kakamukemesha bikole, kumufikishabi too ne ku dilongolola bua balongeshi buonso mu tshilongelu atshi babandile kasete aku. Pashishe, kasete aka kakalejibua kudi balongi buonso, kalasa ne kalasa.

Ministre wa Danemark wa malu a makanda a mubidi kakanyisha pende lumu lubi luendeshila ba-minganga ba Dan. Wakamba ne: ba-minganga bavua benze bualu buakane pa kunemeka dipangadika dibobe dia Dan ne ditabuja diende dishindame.

Kudi miliyo mivule ya bamanyishi ba Bukalenge badi batumikila mikenji ya Nzambi. Bua butumike buabu, mbadisunguluje, “bakenka bu bimunyi bia butoke mu bukua-bantu.”​—Filipoi 2:12, 15, NW.