Sekelela Tshivulukilu mu mushindu muakanyine

DILOLO dia 14 Nizan mu 33 B.B., ke divua Yezu mubanjije Tshivulukilu.a Uvua ufuma ku dijikija musekelelu wa Pasaka (Kupita kua Yehowa) ne bapostolo bende 12, nunku tudi mua kuikala ne dishindika pa bidi bitangila dituku edi. Kunyima kua dipatula mumupàngidi, Yuda, Yezu “wakangata diampa, kuamba dibenesha, kuditshibula ne kubapadi, ne kuamba ne: ‘Diangatayi, etshi tshidi tshileja mubidi wanyi.’ Ne wangata dikopo, e kuela tuasakidila ne kubapadi, ne bonso bakadinua. Ne wakabambila ne: ‘Etshi tshidi tshileja “mashi anyi a tshiovo,” adi ne bua kupumunyibua bua bavule.’”​—Mâko 14:22-24, NW.

Yezu wakatumina bayidi bende dîyi bua kuvuluka lufu luende bua mushinga walu. (Luka 22:19; 1 Kolinto 11:23-26) Mulambu wende uvua umuepele uvua mukumbane bua kupikula bukua-bantu ku mulawu wa mpekatu ne lufu bipiana. (Lomo 5:12; 6:23) Diampa ne mvinyo biakatumikaye nabi bivua bimanyinu bia mubidi wende ne mashi ende bipuangane. Bu mutudi bamanye dituku divua Yezu mubanjije Tshivulukilu, tudi mua kusekelela tshikondo etshi dituku didi diakanangane nadi ku tshidimu ku tshidimu, anu bu muvuabi bienjibua ne Pasaka wa bena Yuda. Kadi tudi ne bua kuenza nunku mu mushindu muakanyine. Bua tshinyi?

Mupostolo Paulo wakamba ne: aba badi badia ne banua bimanyishilu bia diampa ne mvinyo badi ne bua ‘kutungunuka ne kumanyisha lufu lua Mukalenge too ne paluaye.’ (1 Kolinto 11:26, NW) Bua musekelelu eu kashonyi kadi ne bua kuedibua pa lufu lua Yezu ne diumvuija dialu bua bukua-bantu. Tshikondo etshi tshidi ne bua kuikala tshia mushinga, tshikondo tshia kuela meji pa buimpe bua Nzambi ne pa dianyisha ditudi ne bua kuikala nadi bua Yehowa ne Muanende. (Lomo 5:8; Tito 2:14; 1 Yone 4:9, 10) Nunku, Paulo wakadimuija ne: “Yonso udi udia diampa nansha unua dikopo dia Mfumu kayi mubiakanyine, neapie tshilumbu tshia mubidi ne mashi bia Mfumu.”​—1 Bena Korente 11:27, MMM.

Muakanyine​—Mmushindu kayi?

Kakuyi mpata, Nzambi kakusankishibua bituanyanga tshikondo etshi pa kuditua mu bienzedi bidi bijula mpata anyi pa kusungula bilele bia bampangano. (Yakobo 1:27; 4:3, 4) Bidi bikengela kudikanda ku malu matangalake a tshikondo tshia Paska. Mu dilonda dîyi-dishidimunyi dia Yezu dia ‘kuenza nunku bua kumuvuluka,’ tudi ne bua kusekelela Tshivulukilu anu bu muakatshibanjijaye. (Luka 22:19; 1 Kolinto 11:24, 25) Bidi bikengela kudikanda ku bienzedi bisakidila ku musekelelu eu kudi ekleziya ya Bukua-buena-nkristo. Tshibungu tshia New Catholic Encyclopedia tshidi tshitonda ne: “Misa ya lelu’eu mmishilangane bikole ne tshienzedi tshipepele tshiakenzabu kudi Kristo ne Bapostolo Bende.” Ne pa kufuka Misa pa tshibidilu, ku dituku ku dituku mene, Bukua-buena-nkristo mbusesuke ku tshivua Yezu wipatshila ne mbuyivuije tshintu tshia patupu.

Paulo wakafundila bena nkristo bena Kolinto pa bidi bitangila didia ne dinua bimanyishilu mu mushindu ukena muakanyine bualu tshilumbu kampanda tshiakajuka mu tshisumbu pa bidi bitangila Didia dia Dilolo dia Mukalenge. Bamue kabavua banemeka ngikadilu wadi wa tshijila. Bavua batuala biakudia biabu bia dilolo bua kubidia kumpala anyi munkatshi mua tshisangilu etshi. Pa tshibidilu bavua badia ne banua bapitshisha. Ebi bivua bibaladika tulu ne bikepesha ditumika dia biumvuilu biabu. Pa kupanga kuikala badiakaje mu tshieledi tshia lungenyi ne mu nyuma, kabavua bakumbane bua ‘kujingulula tshidi mubidi wa Mfumu’ ne nunku kulua bantu ‘bapie tshilumbu tshia mubidi ne mashi bia Mfumu.’ Ku luseke lukuabu, aba bavua kabayi badia biakudia bia dilolo bavua ne nzala ne balua pabu bakuata kudi ditanaji. Mbimueneke patoke ne: nansha umue wa kudibu kavua mu nsombelu wa kudia ne kunua bimanyishilu ne dianyisha ne dijingulula dijima dia mushinga wa tshikondo etshi​—dia se: musekelelu eu uvua wenjibua bua kuvuluka lufu lua Mfumu. Ebi biakabafikisha ku dilumbuluishibua, bualu bavua bapange kanemu, nansha badiwula musekelelu eu.​—1 Bena Korente 11:27-34, MMM.

Busunguluji budi bukengedibua

Bamue mbadie ne mbanue bimanyishilu bia Tshivulukilu nansha muakaluabu kusunguluja pashishe ne: kabavua ne bua kuenza nunku. Aba badi ne bukenji bua kudia ne kunua bimanyishilu bia Tshivulukilu badi ne bujadiki bua spiritu wa Nzambi pa bualu abu. (Lomo 8:15-17; 2 Kolinto 1:21, 22) Ki ndipangadika anyi dishindika diabu bine didi dibavuija bakanyine. Bungi bua aba bakokesha ne Kristo mu muulu bujadika kudi Nzambi budi bua bantu 144 000, bungi budi bukese mu bualabale kampanda pa kufuanyikija ne aba bonso badi bababidila tshia-bupikudi tshia Kristo. (Buakabuluibua 14:1, 3) Disungula diakatuadija mu matuku a Yezu, nunku bu tshipeta lelu’eu kudi anu ndambu mukese wa badì ne banù ba bimanyishilu bia Tshivulukilu. Ne bu mudi bamue ba kudibu benda bafua, bungi abu budi ne bua kukepela.

Bua tshinyi muntu kampanda udi mua kudia ne kunua bimanyishilu mu mushindu mubi? Pamu’apa mbuenzeji bua mmuenenu ya kale ya malu a ntendelelu​—ya se: bena lulamatu bonso badi baya mu diulu. Anyi pamu’apa mbua lutambishi anyi budisui​—nyanji ya se: kampanda mmuakanyine kupita bakuabu​—ne lukuka bua lumu. Pamu’apa ntshipeta tshia mpampakenu mikole mikebesha kudi ntatu mikole anyi malu makuate buôwa tshidi tshifikisha muntu ku dijimija disankidila muoyo pa buloba. Bidi kabidi mua kuikala bua malanda mashême ne muntu kampanda udi ne dibikidibua dia mu diulu. Buonso buetu tudi ne bua kuvuluka ne: dipangadija edi didi anu dia Nzambi, ki ndietu to. (Lomo 9:16) Nunku bikala muntu, “kunyima kua mumane kudikonkonona,” musokolole ne: mu bulelela buonso kavua ne bua kudia ne kunua bimanyishilu, udi mpindieu ne bua kulekela.​—1 Kolinto 11:28, NW.

Ditekemena didi Nzambi muteke kumpala kua bavule mu bukua-bantu mmuoyo wa kashidi pa buloba bua mparadizu. Atshi ndibenesha dinene dia kutekemena, ne ditudi ne bua kuanyisha. (Genese 1:28; Musambu wa 37:9, 11) Pa buloba ke pikala bena lulamatu ne bua kudisangisha ne babiishibue babu bananga ne kupetangana ne bantu bakane ba ku kale bu mudi Abrahama, Sara, Mozese, Rahabe, Davidi, ne Yone Mubatiji​—bonso abu bakafua kumpala kua Yezu kunzulula njila udi ufikisha ku muoyo wa mu diulu.​—Matayo 11:11; fuanyikija ne 1 Kolinto 15:20-23.

Aba badi ne matekemena a pa buloba badi basekelela mu mushindu muakanyine Didia dia Dilolo dia Mukalenge ku dibuela diabu ne ntema ya kanemu, nansha mudibu kabayi badia diampa ne banua mvinyo. Buobu pabu badi bababidila mulambu wa Kristo, udi ubapetesha mushindu wa kupeta dianyishibua kumpala kua Nzambi. (Buakabuluibua 7:14, 15) Padibu bateleja muyuki muenza, dianyisha diabu bua bintu bia tshijila didi dikoleshibua, ne dijinga diabu bua kushala mu buobumue ne bantu ba Nzambi mu muaba wonso didi didiunda.

Tshidimu etshi, kunyima kua dibuela dia dîba mu Dibidi, dia 2 Tshisanga, nebasekelele Tshivulukilu mu bisumbu bia Bantemu ba Yehowa bipite pa 78 000 pa buloba bujima. Newikale munkatshi mua bamubuedi anyi?

[Mêyi adi kuinshi]

[Tshimfuanyi mu dibeji 8]

Bantemu ba Yehowa batu basekelela Tshivulukilu musangu umue ku tshidimu