Tshidi bifukibua “bia meji a tshingenyingenyi” mua kutulongesha

DIPETESHA kapepe katalale, tshikandiki tshia dikuatakana dia mâyi, diumbusha luepu mu mâyi, ne sonar (tshiamu tshisokoloji tshia bintu bidi muinshi mua mâyi) mbintu bienza bidi bilue kumanyika bikole kudi bantu mu siekele eu wa 20. Pabi, bivuaku munkatshi mua bukua-nyama kukadi kupite binunu bia bidimu. Eyowa, bukua-bantu budi bupeta masanka pa kulonga bifukibua bia “meji a tshingenyingenyi” bia mushindu’eu. (Nsumuinu 30:24-28, NW; Yobo 12:7-9) Mbimueneke se: imue nyama mmilue kuikala mishidimunyi ya bantu ikena yakula, ne tudi mua kusanka bikole pa kulonga imue ngikadilu ya nyama eyi.

Tudiku mua kupetela masanka ku dikonkonona ngikadilu ya imue nyama anyi? Ee, Yezu Kristo wakafuanyikija balondi bende ne mikoko, nyoka, nkutshi, too ne mpasu. Ntshinyi tshivuaye natshi mu tshieledi tshia lungenyi pakafuanyikijaye balondi bende ne bifukibua ebi? Tuanjayi kumona.

‘Mikoko yanyi idi yumvua dîyi dianyi’

Mikoko mmitela mu Bible misangu mipite pa 200. Anu bu mudi nkonga-miaku wa Smith’s Bible Dictionary umvuija, “mukoko udi tshifuanyikijilu tshia bupole-malu, lutulu, ne dikokela.” Mu Yeshaya nshapita wa 53, Yezu yeye muine wakadianjila kufuanyikijibua ne mukoko. Mmunyipu muvuabi biakanyine bua kufuanyikijaye balondi bende ne nyama umue umue eu! Kadi Yezu uvua wela meji pa ngikadilu kayi ya pa buayi ya mikoko?

‘Mikoko yanyi idi yumvua dîyi dianyi, ndi muyimanye, idi indonda,’ ke muakamba Yezu. (Yone 10:27) Nenku wakazangika bupole-malu bua bayidi bende ne dizukila diabu bua kumulonda. Mikoko miena dîna itu yumvua dîyi dia mulami wayi ne imulonda ku budisuile. Mulami utu pende ulamata bikole tshisumbu tshiende tshia mikoko.

Tshisumbu tshia mikoko tshidi mua kuikala tshitangalake mu mpata padiyi idia, kadi mukoko ne mukoko udi ulama dituangana ne tshisumbu mu ka-bujima. Nenku, padi nyama eyi idiumvua kayiyi mikubibue anyi itshinyishibua, “idi mua kudisangisha pamue ne lukasa luonso,” ke mudi mukanda wa Alles für das Schaf (Malu onso adi atangila mikoko) wamba. Padi mikoko inyema bua kuepuka njiwu, idi yenza nunku bu tshisumbu, yimana imue misangu bua kutangila tshiakabidi nsombelu eu. “Dinyema bitupa bitupa nunku didi dipetesha mikoko miana ne nyama mitambe kuteketa bua kutungunuka. Dikala mu tshisumbu edi didi mene diyipetesha dikubibua dia pa buadi.” Ntshinyi tshitudi mua kulongela ku ngikadilu eu?

Bena nkristo balelela lelu’eu ki mbatangalake munkatshi mua bisumbusumbu bia Bukua-buena-nkristo. Bishilangane, mbadisangishe mu tshisumbu tshimue. Muena nkristo yonso udi udiumvua yeye muine mulamate ku tshisumbu etshi tshia mikoko ya Nzambi, ne ebi bidi bilubuluja buobumue bua bulongolodi bua Bantemu ba Yehowa. Tshikondo kayi tshionso tshidi dikenga dimueneka​—bikala disama dikole, mvita, anyi tshipupu kampanda—​nkuepi kudi mutendeledi yonso ukebela buludiki ne bukubi? Mmu bulongolodi bua Yehowa, budi bupetesha dikubibua dia mu nyuma.

Mmunyi mudi mibelu ya mu Bible ipetshibua? Ku diambuluisha dia bibejibeji bu mudi Tshibumba tshia Nsentedi ne muinatshi Réveillez-vous! Bibejibeji ebi ne bisangilu bia bena nkristo bidi bipetesha bushuwa diambuluisha dia pa buadi kudi aba badi bakengela ditabalela dia pa mutu, anu bu mudi tuana tua mikoko ne mikoko mitambe kuteketa ya mu tshisumbu. Tshilejilu, ntema mmituma kudi baledi badi bakolesha bana nkayabu ne aba badi bakenga bua tunyinganyinga tukole. Nunku, mmunyipu mudibi bia meji bua kubala tshibejibeji tshionso, kubuela mu tshisangilu tshionso tshia tshisumbu, ne kutumikila bitudi tulonga! Pa kuenza nanku tudi tuleja bupole-malu ne dilamata dikole ku tshisumbu tshia mikoko ya Nzambi.​—1 Petelo 5:2.

“Badimuke bu nyoka, kadi kabayi bualu bu nkutshi”

Nkonga-miaku wa Smith’s Bible Dictionary udi wamba ne: “Mu tshitupa tshia ku Est bavua batumika ne nyoka bu tshifuanyikijilu tshia bubi, tshia spiritu wa bupidia.” Ku luseke lukuabu, “nyunyu wanyi wa nkutshi” uvua mbikidilu wa kuleja nende disuangana. (Musambu wa Solomo 5:2) Nunku, Yezu uvua wela meji kayi pakakankamijaye balondi bende bua kuikala “badimuke bu nyoka, kadi kabayi bualu bu nkutshi”?​—Matayo 10:16, NW.

Yezu uvua ufila mêyi-mashidimunyi bua kuyisha ne kulongesha. Bayidi bende bavua mua kutekemena dianyishibua anyi dibenga kuanyishibua mu buambi. Bamue bavua mua kuleja disankidila, pavua eku bakuabu mua kubenga lumu luimpe. Bamue bavua nansha mene mua kukengesha basadidi balelela ba Nzambi aba. (Matayo 10:17-23) Mmunyi muvua bayidi ne bua kuandamuna ku dikengeshibua?

Mu mukanda wende wa Das Evangelium des Matthäus (Evanjeliyo wa Matayo), Fritz Rienecker udi wamba pa bidi bitangila Matayo 10:16 ne: “Meji matue . . . adi ne bua kusangishibua ne muoyo-mutoke, bululame, ne dipangadika dia kuya kumpala, bua ne: bualu kampanda kabupeshi baluishi tubingila tulelela tua kudiabakena. Milopo ya Yezu idi munkatshi mua baluishi bena tshikisu, badi kabayi baleja dianyisha nansha dikese bua bapostolo ne badi bababunda kakuyi luse ne padi mushindu mutambe bukese mua kumueneka. Nunku, bidi bikengela​—anu bu nyoka—​bua kudimukila baluishi, ne kukonkonona nsombelu eu ne mêsu a budimu; kukontolola nsombelu eu kakuyi diibila anyi dishima, kuikala mukezuke ne muena bulelela ku mêyi ne ku bienzedi ne nenku kudileja buobu bine bu nkutshi.”

Ntshinyi tshidi basadidi ba Nzambi ba matuku etu aa mua kulongela ku mêyi a Yezu adi asanganyibua mu Matayo 10:16? Lelu’eu, bantu badi bandamuna ku lumu luimpe mu mushindu mufuanangane bikole ne wa mu siekele wa kumpala. Padibu batuilangana mpala ne dikengeshibua, bena nkristo balelela badi ne bua kuikala ne meji matue a nyoka ne bukezuke bua nkutshi. Bena nkristo kabena mua kutumika nansha kakese ne dishima anyi dipanga bululame kadi badi ne bua kuikala kabayi badì ba mabuejila, bena muoyo umue, ne mululame mu dimanyisha bakuabu mukenji wa Bukalenge.

Tshilejilu: Binebe ku muaba wa mudimu, bansonga mu kalasa, anyi mene bena mu dîku diebe dine badi mua kupatula mêyi adi atapa ku muoyo pa bidi bitangila mitabuja ebe bu muudi Ntemu wa Yehowa. Ngandamuinu wa diakamue udi mua kuikala wa kuandamuna bia muomumue pa kutobolola diabu ditabuja. Kadi kuenza nunku nkuikala kuyi ne bualu anyi? Kabiena nanku bushuwa. Biwaleja ku ngandamuinu webe ne: ditobolola diabu kadiena ne buenzeji nansha bumue pa ngikadilu webe muimpe, badi mua kushintulula mmuenenu wabu. Apu ke paudi mua kulua muena meji matue ne kuyi ne bualu​—‘mudimuke bu nyoka, kadi kuyi ne bualu bu nkutshi.’

‘Mpasu ivua mifuane tubalu tulongolola bua mvita’

Tshibejibeji tshia GEO tshidi tshimanyisha ne: mu 1784, Afrique du Sud uvua munyanga kudi “tshisumbu tshitambe bunene [tshia mpasu] tshidi katshia bantu kabayi banji kumona.” Tshisumbu etshi tshiakabuikila tshipapu tshia buloba tshia kilometre karé 5 200, tshidi misangu mitue ku itanu bunene bua Hong Kong. Nkonga-miaku wa Smith’s Bible Dictionary udi wamba ne: mpasu “utu unyangakaja bukua-mitshi mu matunga adiye upitshila.”

Mu disokolola diende dia kudi Nzambi dia malu avua ne bua kuenzeka mu “dituku dia Mukalenge,” Yezu wakatumika ne tshikena-kumona kampanda tshia tshisumbu tshia mpasu. Bakamba bualu buayi ne: ‘Mpasu eyi ivua mifuane tubalu tulongolola bua mvita.’ (Buakabuluibua 1:1, 10; 9:3-7, NW) Ditumika ne tshimfuanyi etshi divua diumvuija tshinyi?

Bantemu ba Yehowa bakadi bamane kujingulula se: mpasu eyi ya mu Buakabuluibua nshapita wa 9 idi tshimfuanyi tshia basadidi bela manyi ba Nzambi pa buloba mu siekele eu.a Bena nkristo aba mbabapeshe mudimu wa pa buawu​—kuyisha mukenji wa Bukalenge pa buloba bujima ne kuenza bayidi. (Matayo 24:14; 28:19, 20) Ebi bidi bibalomba bua kutshimuna bipumbishi ne kunanukila mu mudimu wabu. Ntshinyi tshidi tshitambe buimpe bua kuleja bualu ebu kupita mpasu ukena kutshimuna?

Nansha mudiye ne bule bushadile ku santimetre itanu, mpasu utu wenda pa tshibidilu pankatshi pa kilometre 100 ne 200 ku dituku. Mpasu wa mu tshipela utu mene mua kulepesha mutantshi eu ku kilometre 1 000. Tshibejibeji tshia GEO tshidi tshiumvuija ne: “masala awu atu apepa misangu 18 ku kasunsa kamue ne mu bule bua mêba nansha 17 ku dituku​—bualu budi tshishi tshikuabu katshiyi mua kuenza.” Mmudimu kayipu munene bua tshifukibua tshikese etshi!

Bu tshisumbu, Bantemu ba Yehowa mbasuminyine mu dimuangalaja lumu luimpe lua Bukalenge. Badi mpindieu bayisha mu matunga mapite pa 230. Basadidi aba ba Nzambi badi batshimuna ntatu mivule bua kudifila mu dikumbaja mudimu eu. Nntatu ya mushindu kayi idibu bapeta? Ngenyi midifumbila, mikandu ya kudi mbulamatadi, masama, diteketa mu maboko, ne buluishi bua kudi balela ng’imue ya ku ntatu eyi. Kadi tshintu nansha tshimue katshiena tshikumbana kuimanyika diya diabu kumpala. Badi bananukila mu mudimu wabu mubapesha kudi Nzambi.

Tungunuka ne kuleja ngikadilu ya Buena-nkristo

Eyowa, Yezu wakafuanyikija balondi bende ne mikoko, nyoka, nkutshi, ne mpasu. Ebi mbiakanyine bushuwa matuku etu aa. Bua tshinyi? Bualu ndekelu wa ndongoluelu eu wa malu ukadi pabuipi, ne ntatu idi itamba kufinakaja kupita tshikondo kayi tshionso.

Pa kulama mu tshieledi tshia lungenyi mêyi a mu tshimfuanyi a Yezu aa, bena nkristo balelela badi bashala balamate bikole ku tshisumbu tshia mikoko ya Nzambi ne bitaba ne bupole-malu mibelu ya kudi bulongolodi bua Yehowa. Badi batungunuka ne kutabala ne kudimukila nsombelu idi mua kukepesha midimu yabu ya bena nkristo, eku bashala kabayi kubandibua mu malu onso. Kupita apu, badi basuminyina mu dienza disua dia Nzambi kumpala kua bipumbishi. Ne badi batungunuka ne kulongela ku bimue bifukibua “bia meji a tshingenyingenyi.”

[Mêyi adi kuinshi]