Evanjeliyo bilondeshile bashikuluji

“MEME ewu bantu badi bamba ne: ndi nganyi?” (Lukase 9:18, MMM) Yezu wakakonka bayidi bende bualu ebu kukadi bidimu bu binunu bibidi. Lukonko elu luakajula milandu mu tshikondo atshi. Ludi lumueneka mene luikale nayi mipite nansha lelu’eu, nangananga mu tshikondo tshia Nowele, tshidibu bamba muditshi tshitangija meji kudi Yezu. Bavule badi bitaba ne: Yezu uvua mutumibue kumbukila mu diulu bua kupikula bukua-bantu. Ke muudi wela meji anyi?

Bamue bashikuluji badi bafila mmuenenu mukuabu. “Tshimfuanyi tshia Yezu bu muntu wakalongesha ne: uvua Muana wa Nzambi, uvua ne bua kufua bua mpekatu ya ba pa buloba ki ntshilelela bilondeshile malu a kale nansha,” ke mudi Marcus J. Borg, profesere wa malu a bitendelelu ne nshidimukilu, wamba.

Bakuabu bashikuluji badi bamba ne: Yezu mulelela uvua mushilangane ne eu utudi tubala mu Bible. Bamue badi bitaba ne: Evanjeliyo yonso ivua mifundibue bidimu makumi anayi peshi bipite kunyima kua lufu lua Yezu, kabidi ne: mu tshikondo atshi, bumuntu bulelela bua Yezu bukavua bulengejibue. Tshilumbu katshivua bua tshivulukidi tshia bafundi ba Evanjeliyo nansha, ke mudi bashikuluji bashindika, kadi tshivua tshia diumvuija diabu. Kunyima kua lufu lua Yezu bayidi bende bakafika ku dimuangata mu mishindu mishilangane​—bu Muana wa Nzambi, Mupandishi, ne Masiya. Bamue ne dikamakama dionso badi bamba ne: Yezu uvua patupu muena meji mutambakanyi, mukebi wa mashintuluka mu nsombelu wa bantu. Bashikuluji badi bamba ne: ke mudi bulelela bua evanjeliyo nenku.

Mmuenenu wa “bushikuluji” wa Yezu

Bua kubingisha mmuenenu wabu wa “bushikuluji,” bakonkononyi mbamueneke bikale ne dijinga dikole dia kujimija tshintu kayi tshionso pa bidi bitangila Yezu tshidi tshimueneka katshiyi kujingulula. Tshilejilu, bamue badi bamba ne: diledibua dia Yezu kudi mukaji utshivua kamama divua mushindu wa kubuikidija diledibua dia Yezu bu muana wa panshi. Bakuabu badi babenga milayi ya Yezu bua kabutu ka Yeruzaleme, bashindika ne: malu aa akabuejibua mu Evanjeliyo panyima pa “dikumbana” diawu. Bamue badi mene bamba ne: muondapa menza kudi Yezu avua a mu mpampakenu patupu​—atangila anu tshieledi tshia lungenyi. Udi mumone bidibu bamba ebi bilelela peshi bia butshimbakane?

Bashikuluji bakuabu badi mene bamba ne: bayidi ba Yezu bakafuikakaja dibiishibua bua kukuba tshisumbu tshiabu ku dishimbuka. Ndekelu wa bionso, ke mudi bashikuluji bela meji, balondi ba Yezu kabavua ne bukole pavuabu kabayi nende, nanku bakafunda pashishe muyuki mufuikakaja wa Mfumu wabu. Bushuwa, Buena-nkristo ke buakabiishibua, ki n’Kristo nansha. Pikalabi bimueneka bu dipambuka dia bashikuluji, netuambe tshinyi bua ngakuilu wa muena teoloji Barbara Thiering, wa se: Yezu kakashipibua mene nansha? Udi witaba ne: Yezu wakapanduka ku dipopedibua diende ne wakatungunuka ne muoyo bua kusela misangu ibidi ne kulela bana basatu.

Ngenyi yonso eyi idi anu ipuekeshisha Yezu mulongo wikala bashikuluji bavule mua kumuitabujila: eu wa muntu muena meji, muena Yuda mushilangane ne bantu bakuabu bonso, muakajiludi wa malu a mu nsombelu​—kuitaba bionso kadi ki mbu Muana wa Nzambi, wakalua “bua kufila anyima wende bu tshia-bupikudi mu dishintakaja bua ba bungi” nansha.​—Matayo 20:28, NW.

Pamu’apa mu tshikondo etshi tshia tshidimu, udi mubale bitupa bia Evanjeliyo, bu mudi etshi tshia diledibua dia Yezu mu tshidiilu. Peshi ukadi mumvue muyuki eu mu ekleziya. Wakitaba miyuki ya Evanjeliyo bu ya mushinga ne ya kuitabuja anyi? Nunku ubambishe nsombelu eu wa dibungama. Mu Seminere wa ku dîna wa Yezu, tshisumbu kampanda tshia bashikuluji ntshidisangishe misangu ibidi ku tshidimu katshia mu 1985 bua kujadika bulelela bua mêyi a Yezu. Yezu wakambaku bushuwa mêyi adi Bible umupesha anyi? Bena mu seminere eu bakenza disungula pa tshiambilu tshionso ne masàngà mafita mekala. Busàngà bukunze buvua bumvuija ne: tshiambilu kampanda tshivua bushuwa tshiamba kudi Yezu; busàngà bukunzubile buvua bumvuija ne: Yezu uvua pamu’apa muambe nanku; busàngà butokoloke buvua buleja dielakana; ne busàngà bufiike buvua buleja dishima.

Udi mua kusuyibua pa kumvua ne: Seminere eu wa Yezu wakamanyisha ne: bia pa lukama 82 bia mêyi mapesha Yezu avua pamu’apa kâyi mamba kudiye. Anu dîyi dimue ditela mu Evanjeliyo wa Mâko ke diakanyishibua bu dia kueyemena. Bakamba bua Evanjeliyo wa Luka ne: mmûle tente ne biakulakula bidi “kabiyi kujingulula.” Yonso pa kumbusha isatu ya mu milongo ya Evanjeliyo wa Yone yakapeta busàngà bufiike bua disungula edi, bùdì buleja dishima, ne bua ndambu uvua mushale, bakamba ne: ng’wa busàngà butokoloke bua dielakana.

Kupita bashikuluji

Udi witaba bashikuluji aba anyi? Badi batuleja ne dijadika dionso tshimfuanyi tshia Yezu kupita muditshi mu Bible anyi? Nkonko eyi kayena anu muanda wa dikokangana dia bashikuluji. Mu tshikondo etshi tshia tshidimu, udi mua kuvuluka ne: bilondeshile Bible, Nzambi wakatuma Yezu “bua eu yonso udi uleja ditabuja kudiye kabutudibu, kadi apete muoyo wa kashidi.”​—Yone 3:16, NW.

Bikala Yezu uvua mutambakanyi muena meji patupu utudi ne bua kumanya kakese, kabivua mua kuikala ne mushinga bua ‘kuleja ditabuja’ kudiye nansha. Ku lukuabu luseke, bikala tshimfuanyi tshia Yezu tshia mu Bible tshilelela, lupandu luetu lua tshiendelele ludi mu bualu ebu. Pa nanku, tudi tukengela bua kumanya​—Bible udi ne bulelela pa bidi bitangila Yezu anyi?