Bua tshinyi bonso tudi ne bua kusamuna Nzambi?

HALLELUYAH! Muaku eu mmumanya bimpe kudi bena ekleziya bavule mu Bukua-buena-nkristo. Bamue ba kudibu badi bela nawu mbila mu masangisha abu a mu Dia lumingu. Kadi, mbantu bungi munyi badi bamanye bushuwa tshidi muaku eu umvuija? Bushuwa, mmuaku wa mu tshiena-Ebelu bua “Samunayi Yah!” Ndisekelela dia disanka, dia tshikuma bua Mufuki, udi ne dîna dia Yehowa.a

Muaku “Halleluyah” udi umueneka misangu ne misangu mu Bible. Bua tshinyi? Bualu kudi tubingila tua bungi bua kusamuna Nzambi. Yah (Yehowa) udi Mufuki ne Mukuatshishi wa bukua-bintu buonso. (Musambu 147:4, 5; 148:3-6) Wakenza bionso bìdì bienza binsanga ne bidi bitunyunguluke bìdì biambuluisha bua kuikala ne muoyo pa buloba. (Musambu 147:8, 9; 148:7-10) Ne udi ne diditashisha dia pa buadi bua bukua-bantu. Bituenza disua diende, udi utubenesha ne utukuatshisha mu nsombelu’eu ne udi utupesha ditekemena dishindame dia muoyo mutambe buimpe mene utshidi ulua. (Musambu 148:11-14) Yah (Yehowa) ke wakenzeja mêyi aa ku spiritu: “Bantu bakane neba[p]iane buloba, nebashikamemu tshiendelele.”​—Musambu 37:29.

Pa nanku, dikankamija nditangija kudi bonso ne: “Halleluyah!” “Samunayi Yah!” (Note kuinshi kua Musambu 104:35, NW) Kadi diakabi, ki mmuntu yonso udi usua kuandamuna nansha. Lelu’eu, bantu badi bakenga. Bavule badi ne nzala, basama, peshi bikale bafinakaja. Bantu ba bungi badi batantamena tunyinganyinga tuvule tukebesha kudi ditumika dibi ne manga anyi maluvu makole peshi bipeta bia tshiendenda tshiabu anyi buntomboji. Kudiku kabingila bua bantu ba nenku kusamunabu Nzambi anyi?

‘Anu Yehowa ke uvua mua kumpesha ditekemena’

Eyowa, kadiku. Yehowa udi ubikila muntu yonso kakuyi disunguluja bua kumumanya, kulonga mua kuenza disua diende, ne kusankila mu mabenesha adi asaka bantu bua bamusamune. Ne bavule badi bandamuna. Angata tshilejilu tshia Adriana, mu Guatemala. Pavua Adriana ne bidimu muanda-mutekete, mamuende wakafua. Katupa kîpi panyima, tatuende wakumbuka kumbelu. Pavuaye ne bidimu dikumi, wakatuadija kuenza mudimu bua kudiambuluisha. Bu muvua mamuende mumuambile bua kusadila Nzambi ne ekleziya, Adriana wakabuela mu bisumbu kabukabu bia bena Katolike, kadi pakakumbajaye bidimu 12, wakatekeshibua ku muoyo ne wakadisangisha ne tshisumbu tshia ba-bandi ba mu misesu. Wakatuadija kunua makanya ne diamba, ne kuiba. Bua tshinyi nsongakaji mutekete bu au uvua mua kujinga bua kusamuna Nzambi?

Muanabu ne Adriana wa bakaji wakatuadija dilonga Bible ne Bantemu ba Yehowa, kadi Adriana wakamuseka. Pashishe mamuabu mukuabu wakafua. Ku dijikibua dia mamuende mukuabu, Adriana uvua mulubakaja kudi nkonko idi inyunguluja mutu. Mmuaba kayi udi mamuende mukuabu muye? Uvua mu diulu anyi? Uvua muye mu inferno wa kapia anyi? Bivua bipampakaja bikole, ne Adriana wakaya ku nzubu wa disambila pabuipi ne nkita bua kulomba diambuluisha, pa kutumika ne dîna dia Nzambi dia Yehowa, bu muvua muanabu wa bakaji mumulongeshe.

Diakamue wakatuadija kulonga Bible ne Bantemu ba Yehowa ne kubuela mu bisangilu biabu bia bena nkristo. Ebi biakamupesha mmuenenu mukuabu mujima bua muoyo, ne wakakosa ne dikima dionso malanda ende ne ba-bandi aba ba mu misesu. Adriana, udi mpindieu ne bidimu bipite pa 20, udi wamba ne: “Anu dinanga bua Yehowa ke diakandekesha nsombelu mubi wa mushindu’eu. Anu Yehowa mu luse luende lunene ke uvua mua kumpesha ditekemena dia muoyo wa kashidi.” Adriana, nansha muvuaye ne ntuadijilu wa lutatu mu nsombelu wende, udi ne tubingila tuimpe bua kusamuna Nzambi.

Nsombelu mukuabu kayi nansha mene wa kutekemena ng’wa mu Ukraine. Mulume kampanda mmusombe mu buloko muindile dimushipa. Udi unyingalala bua bualu buende anyi? Mmubungamijibue anyi? Tòo, bishilangane bikole. Mumane kupetangana matuku mashale aa ne Bantemu ba Yehowa ne mumane kupeta ndambu wa dimanya dia Yehowa, wakabalomba bua kumonanganabu ne mamuende. Mpindieu udi ubafundila bualu mmumvue ne: bavua bakumbaje dilomba diende. Udi wamba ne: “Tuasakidilayi bua dikumbula mamu wanyi. Elu luvua lumu lua disanka ditambe bunene lumvua mupete tshidimu tshishale.”

Pa kuakula buende yeye muine ne bua binende ba mu ka-tshibambalu badiye mupeshe bumanyishi, udi ufunda ne: “Mpindieu tudi ne ditabuja kudi Nzambi ne tudi tuidikija bua kuenza malu bilondeshile ditabuja dietu.” Udi ukoma mukanda wende ne: “Tuasakidilayi bua dituambuluisha bua kulonga tshidi dinanga diumvuija ne bua kupeta ditabuja. Bu meme mua kushala ne muoyo, nennuambuluishe penu. Elayi Nzambi tuasakidila bua munudi ne muoyo ne bua munudi nuambuluisha bakuabu bua kunanga Nzambi ne kumuitabuja.” Muntu eu wakalayidila tshibawu tshiende tshia lufu. Kadi nansha yeye mushipibue anyi muikale upitshisha bidimu bivule mu buloko, udi mu butoke buonso ne kabingila bua kusamuna Nzambi.

‘Nansha mundi mpofo, ndi mmona’

Tangila mpindieu, nsongakaji kampanda wa dikanda udi mujimije diakamue lumonu luende. Ke tshidi tshienzekele Gloria, udi musombele mu Argentine. Gloria wakalua diakamue mpofo pavuaye ne bidimu 19, ne kakapetulula lumonu luende. Ne bidimu 29 wakabanza kua mulume kampanda ne katupa kîpi e kupetaye difu. Apu ke yeye kumvua ne: muoyo wende uvua ne tshipatshila. Kadi pakajimijaye muanende, wakatuadija kudiela nkonko. Wakadiebeja ne: ‘Bua tshinyi bualu bu ebu budi bungenzekela meme? Ntshinyi tshindi muenze? Nzambi udiku bushuwa anyi?’

Mpindieu, Bantemu babidi bakalua ku tshiibi tshiende. Wakatuadija kulonga Bible ne wakumvua dilaya diende dia se: mu bulongolodi bupiabupia, bampofo nebamone tshiakabidi. (Yeshaya 35:5) Nditekemena kayipu dia dikema bua Gloria! Uvua ne disanka dia bungi, nangananga pakitaba bayende bua kufundisha dibaka diabu ku mikanda. Pashishe bayende wakapeta njiwu ne wakalua katshiyi mua kutumika, mufinyina anu mu dikalu dia balema. Lelu’eu mukaji eu mpofo udi utumika bikole bua kudiambuluisha. Kabidi, udi wenza midimu yonso ku nzubu, pamue ne ditabalela bayende bua bidiye ukengela. Pabi Gloria udi usamuna Yehowa! Ku diambuluisha dia bana babu bena nkristo balume ne bakaji, udi ulonga Bible mufunda mu braille, ne mmukankamijibue bikole kudi bisangilu bia bena nkristo ku Nzubu wa Bukalenge. Udi wamba ne: “Mbikole bua kumvuija, kadi nansha mundi mpofo, mbienza anu bu se: ndi mmona.”

Misangu mikuabu bantu badi bakengeshibua padibu basamuna Nzambi. Mukaji kampanda mu Croatie uvua ne disanka pakalongaye pa bidi bitangila Nzambi, kadi bayende uvua ubenga ditabuja diende dipiadipia dipeta ne wakamubenga, ne kumunyengaye ne muan’abu wa bakaji wa tshidimu tshimue. Pambelu, mulekela kudi mulume ne kudi dîku, kayi ne nzubu, nansha mudimu, anyi muanende muine, uvua diambedi mubungamijibue. Kadi dinanga diende bua Nzambi diakamukuatshisha, nansha muvuaye kayi utamba kumonangana ne muanende wa bakaji too ne pakakola muana eu. Mukaji eu uvua mupete “dibue dia mushinga mutambe bukole” ne kavua mua kudilekela. (Matayo 13:45, 46) Mmunyi muakalamaye disanka diende mu bikondo ebi bikole? Udi wamba ne: “Disanka ndimuma dia spiritu wa Nzambi. Didi mua kudimibua kakuyi ditangila nsombelu idi imueneka ne mêsu, anu bu mudi bikunyibua mua kukola mu lupangu kampanda nansha pambelu pikale luya anyi mashika.”

Mu Finlande, Markus, muana wa bidimu bisambombo, bakamupeta ne disama dia mu misunyi dikena buondapi. Katupa kîpi uvua mufinyina mu dikalu dia balema. Bidimu bikese pashishe, mamuende wakaya nende kudi muena Pentekoste kampanda uvua muende lumu miaba yonso wamba muvuaye wondapa bantu badi basama. Kadi kakuvua luondapu lua tshishima nansha. Nenku Markus wakajimija disankidila kudi Nzambi ne wakatungunuka ne malonga mu malu a sianse ne malonga makuabu kabidi. Pashishe bidimu bu bitanu bimane kupita, mukaji kampanda uvua mu dikalu dia balema, mushindikija kudi nsongalume mukuabu, bakalua ku nzubu kuvua Markus musombele. Bavua Bantemu ba Yehowa. Markus ukavua mulue mpindieu muvidi wa dikalaku dia Nzambi, kadi kavua ne milandu bua kuyikila pa bitendelelu ne wakababueja mu nzubu.

Pashishe, bena dibaka babidi bakamukumbula, ne dilonga dia Bible diakatuadija. Ndekelu wa bionso, bukole bua bulelela bua mu Bible buakashintulula mmuenenu wa malu wa Markus, ne wakajingulula ne: nansha muvuaye ne bulema, uvua bushuwa ne tubingila bua kusamuna Nzambi. Wakamba ne: “Ndi ne disanka dia bungi bualu ndi mupete bulelela ne bulongolodi budi Yehowa utumika nabu. Muoyo wanyi udi mpindieu ne tshipatshila ne diumvuija. Mukoko mukuabu mujimine mmupetshibue ne kawena ujinga bua kumbuka mu tshisumbu tshia mikoko tshia Yehowa!”​—Fuanyikija ne Matayo 10:6.

Bonso “basamune Yah”

Aa mmalu makese patupu a ku malu mamona bungi tshianana atudi mua kulonda bua kuleja ne: bantu lelu’eu, nansha buobu bikale ne nsombelu kayi, badi mua kuikala ne kabingila bua kusamuna Nzambi. Mupostolo Paulo wakabiumvuija mu mushindu’eu: “Kadi dilamata kudi [“Nzambi,” NW], didi dikuatshisha mu malu onso, bualu bua diodi didi ditulaya muoyo mpindiewu ne bua matuku alualua.” (1 Timote 4:8, Muanda Mulenga Lelu) Bituenza disua dia Nzambi, neakumbaje ‘dilaya dia muoyo mpindieu.’ Bushuwa, mu ndongoluelu eu wa malu, kakuvuija bapele babanji peshi babedi balue ne makanda a mubidi. Kadi udi upesha badi bamusadila spiritu wende bua bapete disanka ne disankishibua nansha buobu bamueneka ne nsombelu kayi. Eyowa, nansha mu ‘muoyo [wa] mpindieu,’ babedi, bantu bafinakaja, ne bapele badi mua kupeta kabingila bua kusamuna Nzambi.

Kadi netuambe tshinyi bua “muoyo bua matuku alualua”? Eyo, dieleelapu meji didi ne bua kutusaka ku disamuna Nzambi ne musangelu mutambe bunene! Muoyo wetu udi womba patudi tuela meji bua tshikondo tshikale bupele kabutshiyi bumanyike kabidi; tshikala ‘muena musoko kayi wamba ne: Ndi ne disama’; ne tshikala Yehowa Nzambi mua ‘kukupula tshinsonji tshionso ku mêsu kuabu; ne lufu kaluyi luikalaku kabidi; madilu kaayi ikalaku kabidi; nansha muadi; nansha kanyinganyinga kabidi, [tshikala] malu a kumudilu mumuke.’ (Yeshaya 33:24; Buakabuluibua 21:3, 4; Musambu 72:16) Mmunyi muudi wangata malaya aa a kudi Nzambi?

Nsongalume kampanda mu El Salvador wakitaba trakte wa malu a Bible uvua umvuija amue a ku malu aa. Wakambila Ntemu wakamupesha trakte eu ne: “Mukajana, tshidi trakte eu wamba ntshitambe buimpe kadi katshiyi tshilelela.” Bavule batu bandamuna nanku. Pabi, aa mmalaya a Eu wakafuka bukua-bintu buonso, wakendesha bintu bia ku tshifukilu bia buloba buetu ebu, ne udi wambuluisha nansha bapele ne babedi bua bapete disanka. Tudi mua kuitabuja tshidiye wamba. Nsongalume mutela kuulu eku wakalonga Bible ne Bantemu ba Yehowa ne wakamona muanda eu muikale mulelela. Biwikala kuyi muanji kuenza nenku, tudi tukukankamija bua wenze bia muomumue. Nenku, udi mua kuikalaku pebe papita ndongoluelu eu wa malu, ne padisangisha bifukibua bionso mu diela lubila ne: “Halleluyah!” “Samunayi Yah!”​—Musambu 112:1; 135:1, NW.

[Mêyi adi kuinshi]

[Tshimfuanyi mu dibeji 5]

Udi mua kuikalaku pebe padisangisha bifukibua bionso mu diela lubila ne: “Halleluyah”