Dilekela bivule bua tshintu tshipite bunene

BU MUDIBI BILONDA KUDI JULIUS OWO BELLO

Munkatshi mua bidimu 32 mvua Aladura.a Mvua ngitaba ne: luondapu lua ku ditabuja pamue ne masambila bivua mua kujikija ntatu yanyi yonso ne kuondapa masama onso. Tshivuaku muanji kusumba buanga, nansha mene bitalaji bia bisama. Mu bidimu abi, muntu nansha umue mu dîku dianyi kavua muanji kubuejibua mu lupitadi. Dîba kayi dionso divua umue wa ku bana banyi usama, mvua nsambila bua bualu buabu butuku ne munya too ne pavuabu bumvua bimpe. Mvua ngitaba ne: Nzambi uvua wandamuna ku masambila anyi ne uvua umbenesha.

MVUA muena Egbe Jolly, dingumba dia malu a nsombelu ditambe kutumba mu Akure, tshimenga tshia ku Ouest wa Nigeria. Balunda banyi bavua bantu bena bubanji bua bungi ne ba bukole bupite mu tshinsanga tshietu. Deji, mfumu wa mu Akure, misangu mivule uvua unkumbula ku nzubu kuanyi.

Mvua kabidi Kalemba wa mbanza, muikale ne bakaji basela basambombo ne bakaji babanjija ba bungi. Mushinga wanyi wakalubuluka. Malu anyi onso avua enda bimpe. Kadi, anu bu ngenda-mushinga wa mu mufuanu wa Yezu wa busàngà, ngakapeta tshintu kampanda tshia mushinga mukole mu mushindu wa se: ngakalekela batanu ba ku bakaji banyi basela, bakaji banyi babanjija, ekleziya, dingumba dia malu a nsombelu, ne bunême bua mu bulongolodi ebu, bua kushintakaja natshi.​—Matayo 13:45, 46.

Mushindu umvua mulue Aladura

Ngakumvua bua musangu wa kumpala bua ba-Aladura mu 1936, pamvua ne bidimu 13. Mulunda wanyi mukuabu dîna diende Gabriel wakangambila ne: “Bu wewe mua kukumbula Ekleziya wa Bapostolo ba Kristo, neumvue mudi Nzambi wakula.”

“Mmunyi mudi Nzambi wakula?” Ke mungakamukonka.

Wakamba ne: “Luaku, ne neudimuene.”

Mvua ne dijinga dikole dia kuteleja Nzambi. Nenku butuku abu, ngakaya ne Gabriel mu ekleziya au. Nzubu eu mukese uvua mûle tente ne batendeledi. Tshisumbu atshi tshiakatuadija kuimba ne: “Luayi! Eu ke muaba udi Yezu!”

Munkatshi mua musambu eu, muntu kampanda wakela lubila ne: “Tuluka, spiritu munsantu!” Muntu mukuabu pende wakela ngonga, ne tshisumbu tshiakapuwa. Pashishe, mukaji kampanda wakatuadija kuakula lukasalukasa mu muakulu uvua kawuyi umvuika. Mutantshi eu yeye kuela lubila ne: “Telejayi mukenji wa Nzambi, O nuenu bantu! Etshi ke tshidi Nzambi muambe: ‘Sambilayi bua bilembi kabishipi bantu nansha!’” Bantu bonso bavua ne dipampakana.

Ngakitaba ne: Nzambi uvua muakule ku butuangaji buende, nenku tshidimu tshiakalonda ngakatambula bu muena Ekleziya wa Bapostolo ba Kristo.

Dipetangana dia kumpala ne Bantemu ba Yehowa

Mu 1951, ngakitaba kopi wa Tshibumba tshia Nsentedi wa kudi Ntemu kampanda dîna diende Adedeji Boboye. Tshibejibeji etshi tshivua tshimpe, nenku ngakenzeja abonema ne mvua ntshibala pa tshibidilu. Mu 1952, ngakabuela mu mpuilu wa distrike wa Bantemu ba Yehowa wa matuku anayi ku Ado Ekiti.

Bingakamona mu mpuilu eu biakankemesha. Ngakela meji bikole bua kulua umue wa ku Bantemu ba Yehowa, kadi meme kumbusha lungenyi alu. Tshilumbu tshianyi tshivua ne: mu tshikondo atshi mvua ne bakaji basela basatu ne mukaji mubanjija umue. Mvua ngela meji ne: kakuvua mushindu umvua mua kusomba anu ne mukaji umuepele.

Pangakapingana ku Akure, ngakambila Adedeji bua kulekelaye dinkumbula, ne tshiakenzulula abonema wanyi bua Tshibumba tshia Nsentedi nansha. Ngakalua ne tshisumi tshikole mu ekleziya wanyi. Ndekelu wa bionso, ke mungakela meji, Nzambi uvua mumbeneshe katshia ngabuela mu Ekleziya wa Bapostolo ba Kristo. Mvua musele bakaji basatu ne mulele bana ba bungi. Mvua muibake nzubu wanyi nkayanyi. Katshia tshivua muanji kubuela mu lupitadi. Bu muvua Nzambi umueneka ne: uvua wandamuna ku masambila anyi, bua tshinyi kushintulula tshitendelelu tshianyi?

Divulangana dia bunême pamue ne dibungamijibua

Ngakatuadija kuela mfranga ya bungi mu ekleziya. Mutantshi eu bakanteka bu mukulu wa ekleziya, muanzu wakangambuluisha bua kumona midimu ya munda mene mua ekleziya au. Bingakamona biakampampakaja. Mpasata ne “baprofete” bavua banange mfranga; lukuka luabu luakankosa mikaba.

Tshilejilu, mu Luabanya 1967 bakaji bashilangane bakandelela bana basatu. Kuvua tshilele mu ekleziya tshia kuenza difesto dia dipesha muana dîna. Nenku meme kutuala milambu​—mishipa, mâyi a bimuma, ne milangi ya maala a nsukadi—​kudi mpasata bua dilongolola dia difesto adi.

Dituku dia masangisha a ekleziya, mpasata wakakula kumpala kua tshisumbu tshijima ne: “Bantu babanji ba mu ekleziya eu mbankemeshe. Mbasue kuenza difesto dia dipesha muana dîna, ne bionso bidibu bafila bidi anu maala a nsukadi ne mishipa. Kakuyi munyinyi! Kakuyi mbuji! Elayi meji tung! Kaina wakapesha Nzambi mulambu wa bimene bia bungi, kadi Nzambi kakitaba mulambu au nansha, bualu kauvua ne mashi munda muawu. Nzambi mmusue bintu bidi ne mashi munda muabi. Abele wakalua ne nyama, ne mulambu wende wakanyishibua.”

Ngumvua nanku, meme kupatuka pambelu ne tshiji tshikole. Kadi, ngakatungunuka ne kubuela mu ekleziya au. Misangu ne misangu, mvua mpitshisha dîba divule mu dienza malu a mu nsombelu ne mu dibuela mu bisangilu bia dingumba dianyi. Imue misangu mvua mbuela mu bisangilu ku Nzubu wa Bukalenge, ne ngakenzulula abonema wanyi bua Tshibumba tshia Nsentedi. Nansha nanku tshivua muanji kudiakaja bua kulua umue wa ku Bantemu ba Yehowa.

Dipangadika bua kusadila Yehowa

Dishintuluka diakamueneka buanyi meme mu 1968. Dimue dituku ngakatuadija kubala tshiena-bualu kampanda mu Tshibumba tshia Nsentedi tshivua tshiumvuija dikengeshibua dia tshikisu dia Bantemu ba Yehowa mu Malawi. Tshivua tshiakula bua nsongakaji wa bidimu 15 wakasuikilabu ku mutshi ne kumuangatabu ku bukole misangu isambombo bualu wakabenga bua kunyanga ditabuja diende. Munyengabale bikole, ngakimanyika dibala tshibejibeji, kadi meme kutungunuka ne kuela meji pa bualu ebu. Ngakajingulula ne: nsongakaji nansha umue mu ekleziya wanyi kavua mua kuleja ditabuja dia nunku. Kushòò dilolo adi, ngakambula tshibejibeji ne kubalulula kabidi dibeji adi.

Ne tshisumi tshionso ngakatuadija kulonga Bible. Bu mumvua ndiunda mu dimanya, meme kutuadija kumona mushindu uvua ekleziya utupambuisha. Anu bu muvuabi mu bikondo bia kale, bakuidi betu bavua ‘balonda malu mabi.’ (Hoshea 6:9) Bantu ba nunku bavua munkatshi mua baprofete ba mashimi bavua Yezu mudimuije bua bualu buabu! (Matayo 24:24) Tshitshivua kabidi ne ditabuja mu bikena-kumona biabu ne mu midimu yabu ya bukole. Ngakapangadija bua kukosa malanda ne ntendelelu wa mashimi ne kuambuluisha bakuabu bua kuenza bia muomumue.

Madikolela bua kundama mu Ekleziya

Pakajingulula bakulu ba ekleziya ne: mvua mupangadije bua kumbuka mu ekleziya, bakatuma bantu bua kunsengelelabu. Kabavua basue bua kujimija mpokolo munene wa lupetu nansha. Bakandaya bua kunteka bu Baba Egbe, mulami wa umue wa ku ekleziya ya Bapostolo ba Kristo mu Akure.

Ngakabenga ne kubambila bua tshinyi mvua mubenge. “Ekleziya udi utudinga,” ke mungakamba. “Badi bamba ne: bantu bimpe bonso badi baya mu diulu. Kadi ndi mubale mu Bible, ne ndi mutuishibue ne: anu bantu 144 000 ke baya mu diulu. Bakuabu bantu bakane nebasombe pa buloba bua mparadizu.”​—Matayo 5:5; Buakabuluibua 14:1, 3.

Mpasata wa ekleziya wakateta bua kusaka bakaji banyi bua bantombokele. Wakabambila bua kukandika Bantemu ba Yehowa bua kabalu ku nzubu kuetu nansha. Umue wa ku bakaji banyi wakela mulùngù mu biakudia bianyi. Babidi ba kudibu bakandimuija bua tshikena-kumona tshivuabu bapete mu ekleziya. Tshikena-kumona etshi tshivua tshileja ne: mvua ne bua kufua bu meme mumbuke mu ekleziya. Nansha nanku, ngakatungunuka ne kufila bumanyishi kudi bakaji banyi, pa kubabikila bua kuya nanyi mu bisangilu. “Nenupete balume bakuabu muine amu,” ke mungakabambila. Kadi, nansha umue wa kudibu kakaleja disankidila, ne bakatungunuka ne kukeba bua kuntekesha mu mikolo.

Ndekelu wa bionso, mu dia 2 Luishi 1970, pangakapingana kumbelu mfumina ku luendu mu tshimenga tshivua pabuipi apu, ngakasangana nzubu munda mutupu. Bakaji banyi bonso bavua banyeme ne bana.

Dilamata kudi mukaji umuepele

‘Mpindieu ndi mua kuakaja nsombelu wanyi wa mu dibaka,’ ke mungakela meji. Ngakabikila Janet, mukajanyi mukalenge-muadi bua apingane kumbelu. Wakitaba. Kadi, dîku diende diakabenga bikole lungenyi alu. Pakumvua bakaji banyi bakuabu ne: mvua mubikile Janet bua apingane kumbelu, bakaya ku nzubu kua tatuende ne kusua bua kumuluisha. Pashishe dîku diende diakambikila mu tshisangilu.

Kuvua bantu batue ku 80 bua tshisangilu atshi. Tatuende muakunyi wa Janet, uvua mfumu wa dîku, wakamba ne: “Biwasua bua kuselulula muanetu, nenku udi ne tshia kupingaja kabidi bakaji bakuabu. Kadi biwasua kulonda ntendelelu webe mupiamupia ne kushala ne mukaji umuepele, apu udi ne tshia kukeba mukaji mukuabu. Biwapingaja Janet, bakaji bebe bakuabu nebamushipe, ne katuena basue bua muanetu afue nansha.”

Panyima pa diakula bikole, dîku diakajingulula ne: mvua mupangadije bua kuikala anu ne mukaji umuepele. Ndekelu wa bionso bakatuyisha tshilunji. Tatu muakunyi wakamba ne: “Katuakukunyenga mukajebe nansha. Udi mua kuya nende.”

Mu dia 21 Lumungulu 1970, Janet ne meme tuakaselangana bilondeshile mikenji. Matuku tshitema panyima ngakatambula bu umue wa ku Bantemu ba Yehowa. Mu Tshisua-munene wa tshidimu tshimuetshimue atshi, Janet wakatambula pende.

Dipeta mabenesha a Yehowa

Bena mu ekleziya wetu wa kumpala bavua balaye ne: bu tuetu mua kulua Bantemu, tuvua ne bua kufua. Kukadi kupite bidimu bu 30. Nansha meme mufue mpindieu, nebikale bualu mvua mulue umue wa ku Bantemu ba Yehowa anyi? Bu mukajanyi mua kufua mpindieu, muntu kampanda udi mua kuamba ne: mbualu uvua mulue umue wa ku Bantemu ba Yehowa anyi?

Ndi muluangane bua kuleja bana banyi 17 njila wa bulelela. Nansha mukavua bavule ba kudibu bikale bantu bakole pangakalua Ntemu, mvua mbakankamija bua kulonga Bible ne nya nabu mu bisangilu ne mu mpuilu. Ndi ne disanka dia kuikala ne batanu ba kudibu bàdì basadila Yehowa pamue nanyi. Umue udi utumika nanyi bu mukulu mu tshisumbu. Mukuabu pende udi musadidi wa mudimu mu tshisumbu tshia pabuipi apu. Babidi ba ku bana banyi badi basadila bu bampanda-njila ba pa tshibidilu.

Pandi ntangila kunyima, ndi nkema bua bulenga bukena butuakanyine bua Yehowa mu dingambuluisha bua kulua musadidi wende. Mmunyipu mudi mêyi a Yezu malelela: “Kakuena muntu udi mumanye mua kudivuila kundi, bikala Tatu wakuntuma kai mumukoke”!​—Yone 6:44.

[Mêyi adi kuinshi]