Tunyinganyinga tua mu dîku

Janet udi wamba ne: “Matuku makese panyima pa lufu lua tatuanyi, bayanyi wakangambila ne: ukavua usesela mukaji mukuabu. Matuku makese pashishe, wakambula bilamba biende bionso bivua mu tshitekelu tshiende tshia bilamba, kutushiyaye meme ne bana babidi kayi mutulaye.” Janet wakapeta mudimu, kadi difutu diawu kadivua dikumbana bua kukumbaja majinga onso a ku nzubu to. Uvua kabidi mutuilangane ne ntatu mikuabu pa kumbusha lutatu lua makuta. Udi uvuluka wamba ne: “Kanyinganyinga kakole kamvua naku bua majitu mapiamapia amvua ne bua kuambula nkayanyi aa kavua kantonda bikole. Mvua ndiumvua bibi bua mumvua tshiyi mua kukumbajila bana banyi malu onso bu mudi baledi bakuabu benzela bana babu. Nansha mpindieu, ntshidi anu nditatshisha bua mudi bantu bakuabu bammona meme ne bana banyi. Badiku mua kuikala badiebeja ni mvua muenze tshionso tshivua tshikengela bua kulama dibaka dianyi anyi?”

Disambila didi diambuluisha Janet bua kukepesha tunyinganyinga tuende ne kukolesha malanda ende ne Nzambi. Udi wamba ne: “Butuku ke dîba ditambe bubi, bualu padi panshi patalala ke padi malu adi mantonde amvuila mu mutu. Pandi mbala Bible ne nsambila ke pandi mmona tulu. Mvese untu mutambe kunanga ngua Filipoyi 4:6, 7 udi wamba ne: ‘Kanusamishi mutu bua tshintu nansha tshimue, kadi mu malu onso mu disambila ne mu disengelela pamue ne disakidila, numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu ne lungenyi luenu.’ Ndi musambile matuku a bungi butuku ne mumone mudi ditalala dia Yehowa dinkoleshe.”

Yezu wakamba mêyi adi akolesha bua disambila mu Muyuki wende wa pa mukuna ne: “Tatu wenu, mmumanye binudi nabi dijinga kumpala mene kua nuenu kumulombabi.” (Matayi 6:8) Mêyi aa adi atangila tunyinganyinga tua mishindu yonso. Tudi ne bua kumulomba. Disambila ke mushindu wa kumpala udi utuambuluisha bua ‘kusemena pabuipi ne Nzambi.’ Wewe muenze nanku, ‘yeye neasemene pabuibi nebe.’​—Yakobo 4:8.

Bushuwa disambila kadiena anu dituambuluisha bua kupepela bua mutudi bapatule malu avua matutonde to. Yehowa ‘udi umvua milombu’ udi kabidi wambuluisha bonso badi bamukeba ne ditabuja dionso. (Musambu 65:2) Ke bualu kayi Yezu wakalongesha bayidi bende bua “kusambila misangu yonso kabayi balekela.” (Luka 18:1) Tudi ne bua kutungunuka ne kulomba bua Nzambi atulombole ne atuambuluishe, bashindike ne: neatufute bua ditabuja dietu. Katuena ne bua kuelakana bua dijinga didiye nadi bua kutuambuluisha ne bukole buende bua kuenza nanku. ‘Kusambila misangu yonso’ nunku kudi kuleja ne: tudi ne ditabuja dilelela.​—1 Tesalonike 5:17.

TSHIDI KUIKALA NE DITABUJA KUMVUIJA MENEMENE

Ditabuja ntshinyi menemene? Ditabuja didi dilomba ‘kufika ku dimanya’ Nzambi bu muntu mulelela. (Yone 17:3) Bua kuenza nanku bidi bilomba tshia kumpala kupeta meji a Nzambi ku diambuluisha dia Bible. Tudi bamanye ne: udi umona yonso wa kutudi ne mmusue kutuambuluisha. Kadi ditabuja dilelela kadiena dimanyina anu pa kumanya malu kampanda adi atangila Nzambi to. Didi kabidi diumvuija kudia nende bulunda bukole bua kanemu. Anu mudibi bua bulunda ne muntu, katuena mua kudia bulunda bua nunku mu mupodi wa dîsu to. Ditabuja dietu didi “ditungunuka ne kuvula” mu bule bua matuku patudi tulonga bikole malu adi amutangila, ‘tuenza malu adi amusankisha,” ne tumona mudiye utuambuluisha. (2 Kolinto 10:15; Yone 8:29) Ditabuja dia buena edi ke didi diambuluisha Janet bua kupita bimpe ne ntatu.

Janet udi wamba ne: “Kumona tshianza tshia Yehowa mu malu onso a mu nsombelu wanyi ke kudi bushuwa kungambuluishe bua kukolesha ditabuja dianyi. Misangu ya bungi tuvua tutuilangana ne malu mabi avua amueneka makole bua kupita nawu. Bu mutuvua tusambila bikole, Yehowa uvua misangu yonso utupandila njila mu mushindu umvua tshiyi ngelela meji. Pandi mmuela tuasakidila, bidi bimvuluija bungi bua malu adiye mungenzele. Utu utuambuluisha misangu yonso mu tshikondo tshiakanyine, anu pa dîba menemene.a Mmumpeteshe balunda ba bushuwa, bena Kristo balelela balume ne bakaji. Batu bangambuluisha misangu yonso ne mbalunda bimpe ba bana banyi.

“Ndi ngumvua bua tshinyi Yehowa udi wamba ne: ‘Ndi nkina dishipa dia dibaka.’ (Malaki 2:16) Bua muena dibaka udibu benzele bibi, ndiedibua mâyi ku makasa dibi ditambe. Bidimu bia bungi bikadi bipite katshia bayanyi wanshiya, kadi imue misangu ntu anu ndiumvua muikale nkayanyi, tshiyi ne mushinga. Pandi ndiumvua nanku, ntu ndienzeja bua kuenza bualu kampanda bua kuambuluisha muntu mukuabu, kuenza nunku kutu kungambuluisha panyi.” Janet udi ukepesha kanyinganyinga kende padiye utumikila mubelu wa mu Bible wa kubenga kuditola pa nkayende.b​—Nsumuinu 18:1.

Janet udi wamba ne: “Kumanya ne Yehowa udi ‘tatu wa bana ba nshiya ne mulumbuluidi wa bakaji bakamba’ kudi kunkolesha bikole menemene. Yeye kakutulekela bu muvua bayanyi muenze nansha.” (Musambu 68:5) Janet mmumanye ne: Nzambi katu ututeta “ne malu mabi” to. Kadi udi upesha bantu bonso meji ne “muoyo mujima” ne udi ufila “bukole budi bupite bua pa tshibidilu” bua kutuambuluisha bua kupita bimpe ne ntatu yetu.​—Yakobo 1:5, 13; 2 Kolinto 4:7.

Kadi tudi mua kuenza tshinyi bituikala tuditatshisha bualu muoyo wetu udi mu njiwu?