Busunguluji bukukube
“Bukokeshi buine bua diela meji nebukujingile ne bukubi, busunguluji buine nebukukube.”—NSUMUINU 2:11, NW.
1. Busunguluji budi mua kutukuba ku tshinyi?
YEHOWA mmusue bua uleje busunguluji. Bua tshinyi? Bualu mmumanye se: nebukukube ku njiwu kabukabu. Nsumuinu 2:10-19 (NW) udi utuadija pa kuamba ne: “Padi meji abuela mu mutshima webe ne dimanya dine dilua kulengelela anyima webe mene, bukokeshi buine bua diela meji nebukujingile ne bukubi, busunguluji buine nebukukube.” Nebukukube ku tshinyi? Ku malu bu mudi “njila mubi,” ku aba badi bumbuka mu tujila tululame, ne ku bantu badi basesuka mu nsombelu wabu wa pa tshibidilu.
2. Busunguluji ntshinyi, ne mbua mushindu kayi budi nangananga bena nkristo bajinga?
2 Pamu’apa neuvuluke se: busunguluji mbukokeshi bua tshieledi tshia lungenyi budi butshiambuluisha bua kusunguluja tshintu kampanda ku tshikuabu. Muntu udi ne busunguluji udi umona mashilangana a ngenyi anyi bintu ne udi ne meji makane. Bu mutudi bena nkristo, tudi nangananga tujinga busunguluji bua mu nyuma bushindamene pa dimanya dijalame dia Dîyi dia Nzambi. Patudi tulonga Mifundu, mbienze anu bu se: tudi tumbula mabue a luibaku a busunguluji bua mu nyuma. Bitudi tulonga bidi mua kutuambuluisha bua kuangata mapangadika adi asankisha Yehowa.
3. Mmunyi mutudi mua kupeta busunguluji bua mu nyuma?
3 Pavua Nzambi muebeje Solomo Mukalenge wa Izalele dibenesha divuaye musue, nsonga eu mukokeshi wakamba ne: “Udi ne bua kupa musadidi webe mutshima wa butumike bua kulumbuluisha bantu bebe, bua kusunguluja pankatshi pa tshimpe ne tshibi.” Solomo wakalomba busunguluji, ne Yehowa wakamupabu bupite bua pa tshibidilu. (1 Bakelenge 3:9, NW; 4:30) Bua kupeta busunguluji, tudi ne bua kusambila, ne tudi ne bua kulonga Dîyi dia Nzambi ku diambuluisha dia mikanda mifidi ya butoke mipetesha ku butuangaji bua “mupika wa lulamatu ne wa budimu.” (Matayo 24:45-47, NW) Ebi nebituambuluishe bua kudiundisha busunguluji bua mu nyuma mu bualabale bua tuetu kulua “bantu bakole tshishiki mu ngumvuilu,” bakumbane bua “kujingulula [anyi, kusunguluja pankatshi pa] tshidi tshimpe ne tshidi tshibi.”—1 Kolinto 14:20, NW; Ebelu 5:14.
Dikengela dia pa buadi dia busunguluji
4. Kuikala ne dîsu “dipepele” kudi kumvuija tshinyi, ne mmunyi mudiku mua kutuambuluisha?
4 Ne busunguluji buakanyine, tudi mua kuenza malu mu diumvuangana ne mêyi aa a Yezu Kristo: “Nunku, tungunukayi ne kukeba diambedi bukalenge ne buakane [bua Nzambi], ne bintu bikuabu ebi bionso [bia ku mubidi] nebanusakidilebi.” (Matayo 6:33, NW) Yezu wakamba kabidi ne: “Muendu wa mubidi webe ndisu. Disu diebe diodio dimpe [“dipepele,” NW], mubidi webe mujima udi mu butoke.” (Lukase 11:34, MMM) Dîsu mmuendu wa mu tshimfuanyi. Dîsu “dipepele” ndia muoyo umue, ditangija ku bualu bumue. Bikale ne dîsu dia nunku, tudi mua kuleja busunguluji ne kuenda katuyi tutetuka mu nyuma.
5. Mu malu a bungenda, ntshinyi tshitudi ne bua kuvuluka pa bidi bitangila tshipatshila tshia tshisumbu tshia bena nkristo?
5 Pamutu pa kulama dîsu diabu dipepele, bamue mbakondakaje nsombelu yabu ne ya bantu bakuabu pa kukokibua ku malu a bungenda. Kadi tudi ne bua kuvuluka se: tshisumbu tshia bena nkristo tshidi “dikunji ne nshindamenu wa bulelela.” (1 Timoteyi 3:15, MMM) Tshifuanangane ne makunji a nzubu, tshisumbu tshidi tshisanyika bulelela bua Nzambi, ki nkumpanyi wa malu a bungenda wa muntu nansha. Bisumbu bia Bantemu ba Yehowa ki mbitekibue bu miaba ya dilubulujila midimu, bintu, anyi bipatshila bia bungenda nansha. Tudi ne bua kudikanda bua kuipatshila malu etu nkayetu a bungenda mu Nzubu wa Bukalenge. Busunguluji budi butuambuluisha bua kumona se: Nzubu ya Bukalenge, Malonga a Mukanda a Tshisumbu, mpuilu mikese ne minene bia Bantemu ba Yehowa mmiaba ya didisangisha dia bena nkristo ne diyukidilangana dia mu nyuma. Bituikala ne bua kutumika ne malanda a mu nyuma bua kulubuluja mushindu kayi wonso wa bungenda, ebi kabiakulejaku mu mushindu kampanda dibula dia dianyisha bua malu a mushinga a mu nyuma anyi? Malanda a mu tshisumbu kaena ne bua kuangatshibua nansha kakese bua kutapilaku makasa.
6. Bua tshinyi bintu bia bungenda ne midimu kabiena ne bua kupanyibua anyi kulubulujibua mu bisangilu bia tshisumbu?
6 Bamue mbatumike ne malanda a teokrasi bua kupana manga anyi bia kulengeja nabi mubidi, bintu bia vitamine, midimu ya dituangajila bantu ku nshinga, bintu bia luibaku, malu a ngendu, programe ne bia-mudimu bia ordinatere, ne bikuabu. Kadi, bisangilu bia tshisumbu ki mmuaba wa dipanyina anyi dilubulujila bintu peshi midimu bia bungenda nansha. Tudi mua kusunguluja dîyi-diludiki edi dia mushinga bituavuluka ne: Yezu “[wak]ipata bonso mu Nzubu wa tshijila ne mikoko yabo ne ngombe; kutangalajaye mpalata ya bashintuishi, kutonkola mesa abo. Kuambaye bapanyi ba nkudimba ne: ‘Umbushayi nkudimba yenu munemu. Kanuandamunyi nzubu wa Tatu wanyi bu nzubu wa bungenda nansha.’”—Yowanese 2:15, 16, MMM.
Netuambe munyi bua diela mfranga mu mushinga?
7. Bua tshinyi bidi bikengela busunguluji ne budimu mu diela mfranga mu mushinga?
7 Bidi bikengela busunguluji ne budimu patudi tusua kuela mfranga mu mushinga kampanda udi umueneka wa njiwu. Ela meji ne: muntu kampanda mmusue kukusomba mfranga ne udi wenza malaya bu mudi aa: “Ndi nkujadikila ne: newenze mfranga.” “Kuakupanga kupeta makasa. Ebu mbualu bujadika.” Udimuke padi muntu ukupa bijadiki bia nunku. Udi mua kuikala kayi wamba malu malelela peshi muikale kayi ne bululame, bualu diela mfranga kaditu pa tshibidilu bualu bujadika. Bushuwa, bamue bantu bampiola-mukana, bakena balonda mikenji mbadinge bena mu tshisumbu. Ebi bidi bituvuluija “bantu bakena ba Nzambi” bavua badifinye mu tshisumbu tshia mu siekele wa kumpala ne ‘bandamune bulenga bukena butuakanyine bua Nzambi mu kabingila bua bienzedi bia didilekelela.’ Bavua bu mabue masongoloke a mu mâyi avua apanda ne ashipa buowedi. (Yuda 4, 12, NW) Bushuwa, tuenzela tua biibidi ntushilangane, kadi buobu pabu badi bapaula bena mu tshisumbu.
8. Ntshinyi tshidi tshienzeke mu imue mishinga ivua imueneka mifuane kupetesha makasa?
8 Nansha bena nkristo bàvuà ne lungenyi luimpe bakambila bakuabu malu pa bidi bitangila mishinga ivua imueneka mifuane kupetesha makasa, anu bua kulua kujingulula pashishe ne: buobu pamue ne aba bavua balonde tshilejilu tshiabu bakajimija mfranga ivuabu bele mu mushinga au. Bu tshipeta, bungi kampanda bua bena nkristo mbajimije masanka abu a mudimu mu tshisumbu. Patu bungenda ebu bua njiwu bua didipetela biûma lukasa buandamuka ngenzelu ya diibila, anu udi muibile ke utu udia makasa, ne misangu mivule ujimina diakamue. Mmunyi mudi busunguluji mua kuambuluisha muntu bua kuepuka nsombelu bu nunku?
9. Bua tshinyi bidi bikengela busunguluji bua kutshinka mushinga wa malaya adi atangila diela mfranga mu mushinga?
9 Busunguluji budi bumvuija kuikala ne bukokeshi bua kumvua bualu bujingakane. Bukokeshi ebu budi bukengedibua bua kutshinka malu a diela mfranga mu mushinga. Bena nkristo badi beyemenangana umue ne mukuabu, ne bamue badi mua kuela meji ne: bana babu ba mu nyuma balume ne bakaji kabena mua kubuelakana mu mishinga ya njiwu idi mua kunyanga mpetu ya bena kuitabuja nabu. Kadi muanda wa se: ngenda-mushinga kampanda mmuena nkristo kawena utujadikila ne: udi ne dimanya dipite mu malu a bungenda, peshi ne: mushinga wende neulubuluke.
10. Bua tshinyi bamue bena nkristo badi bakeba mfranga ya kusomba kudi bena kuitabuja nabu, ne ntshinyi tshidi mua kufikila diela mfranga dia mushindu’eu?
10 Bamue bena nkristo batu bakeba mfranga ya kusomba kudi bena kuitabuja nabu bualu nzubu misombeshanganyi ya mfranga miende lumu kayena nansha kakese mua kubasombesha mfranga bua mishinga yabu ya njiwu. Bavule bakadingibua pa kuela meji ne: mu diela patupu mfranga yabu, bavua mua kupeta biûma pa lukasa kakuyi dienza mudimu wa bungi anyi pamu’apa kakuyi mudimu muine nansha. Bamue mbakokibue ku diela mfranga bualu bua dikàbila didi disuikakajaku, anu bua kujimija mpetu yabu milamina mu matuku a muoyo! Muena nkristo mukuabu wakela tshitupa tshinene tshia mfranga mu mushinga, mutekemene bua kupeta bia pa lukama 25 bia mushinga anu mu mbingu ibidi patupu. Wakajimija mfranga ayi yonso pakamanyishabu ditshiomba dia mushinga au. Mu mushinga mukuabu wa njiwu, mutungunuji wa malu a nzubu ne mpangu wakasomba tshitupa tshinene tshia mfranga kudi bakuabu mu tshisumbu. Wakalaya kayi muele lungenyi makasa mapite bungi kadi wakalua kutshiomba, ne wakajimija mfranga ivuaye musombe.
Padi malu a bungenda apanga kulubuluka
11. Mmibelu kayi yakafila Paulo pa bidi bitangila lukuka ne dinanga dia mfranga?
11 Dipanga kulubuluka dia bungenda ndifikishe ku dibungama ne ku dijimija mene dia makanda a mu nyuma bua bamue bena nkristo bavua badiine ne kasuki mu mishinga eyi ya njiwu. Disamisha mutu ne diteka njiya mbifumine ku dibenga kulekela busunguluji butumika bu tshintu tshìdì tshikuba. Lukuka ndukuate bavule mu buteyi. “Lukuka [kalutedibu] mene munkatshi muenu, anu bu mudibi biakanyine bantu bansantu,” ke muakafunda Paulo. (Efeso 5:3, NW) Ne wakadimuija ne: ‘Bobo badi basue kuikala babanji badi bapona mu kutetshibua kua munda ne mu buteyi ne mu nkuka ya bungi idi mipote ne idi ibanyanga, bu yoyo mene idi înyisha bantu mu dibashipesha ne mu dibutuka. Bualu bua lukuka lua biûma [“dinanga dia mfranga,” NW] ludi muji wa malu mabi a mishindu yonso; bidi bantu bakuabu badikebela ne bakasesuishibua mu njila wa ditabuja, bakadisunsula mubidi wonso ne tunyinganyinga tua bungi.’—1 Timote 6:9, 10.
12. Pikala bena nkristo benda mushinga pamue umue ne mukuabu, ntshinyi tshidibu nangananga ne bua kuvuluka?
12 Pikala muena nkristo mukoleshe dinanga dia mfranga, udi mua kuditapa mputa mivule ya mu nyuma. Bafarizeyi bavua banangi ba mfranga, ne etshi ntshikadilu tshia bavule mu matuku aa a ku nshikidilu. (Luka 16:14; 2 Timote 3:1, 2) Bishilangane, mushindu wa nsombelu wa muena nkristo udi ne bua kuikala ‘kayi ne lukuka lua biûma.’ (Ebelu 13:5) Bushuwa, bena nkristo badi mua kuenda mushinga umue ne mukuabu anyi kutuadija bungenda pamue. Kadi bienzabu nunku, mayukidilangana ne mumvuangana bidi ne bua kulamibua bitapuluke ku malu a tshisumbu. Ne vuluka se: Nansha munkatshi mua bana betu ba mu nyuma, misangu yonso nufunde pa mikanda mumvuangana a bungenda. Tshiambuluishi mu muanda eu ke tshiena-bualu tshia “Difundayi mu mikanda!,” tshipatula mu Réveillez-vous! wa dia 8 Lumungulu 1983, dibeji dia 13 too ne dia 15.
13. Mmunyi muudi mua kutumika ne Nsumuinu 22:7 mu malu a bungenda a njiwu?
13 Nsumuinu 22:7 udi utuambila ne: “Musombi wa bintu udi mu[p]ika wa mumusombeshi.” Kabitu bia meji misangu mivule bua tuetu kuditeka anyi kuteka muanetu pa muaba wa mupika nansha. Padi muntu utulomba bua kumusombesha mfranga bua mushinga udi umueneka wa njiwu, nebikale bia meji bua kutangila bukokeshi buende bua diyifutulula. Mmumanyike mudiye wa ditekela muoyo ne wa kueyemena anyi? Bushuwa, tudi ne bua kumanya se: disombesha bu nunku didi mua kumvuija dijimija dia mfranga bualu mishinga mivule itu ipangila kulubuluka. Diumvuangana nkayadi kadiena dijadika dilubuluka dia mushinga. Ne bushuwa ki mbudimu bua muntu kutekaye mfranga ya bungi mu njiwu mu kumpanyi kampanda, mufuane walua kuyijimija yonso.
14. Bua tshinyi tudi tukengela kuleja busunguluji bituikala basombeshe muena nkristo netu udi ukuluka mu mushinga wende mfranga?
14 Tudi tukengela kuleja busunguluji bituikala basombeshe muena nkristo kampanda mfranga bua bipatshila bia bungenda ne mfranga ivua mijimine, nansha muvuaku kakuyi ngenzelu ikena milulame. Pikala dipanga kulubuluka dia mushinga kadiyi bua tshilema tshia muena kuitabuja netu uvua musombe mfranga, tudiku mua kuamba ne: tuvua badingibue anyi? Tòo, bualu tuvua bamusombeshe ku budisuile, pamu’apa tukadi batuadije kupetelapu makasa, ne kakuena bualu bukena bululame budi buenzeke. Bu muvuaku kakuyi dipanga bululame, katuena ne kabingila kashindame bua kuasa musombi tshilumbu nansha. Mbulenga kayi budi mua kuikalaku pa kufunda muena nkristo nebe muena bululame uvua ne bua kulumbulula bua dikuluka dia bungenda, bualu dienduluka mushinga dia njiwu divua dia lungenyi luimpe diakapangila?—1 Kolinto 6:1.
15. Mmalu kayi adi alomba dikonkonona biamanyishabu dikuluka dia bungenda?
15 Aba badi bamona ditshiomba mu bungenda batu imue misangu bakeba disulakana mu dimanyisha dikuluka dia bungenda. Bu mudi bena nkristo kabayi balenguludi ba malu bua dibenga kuikala ne dibanza, nansha kunyima kua bamane kubalekeela amue mabanza bilondeshile mikenji ya dikuluka dia bungenda, bamue mbadiumvue benzejibue bua kuteta bua kufuta amue mabanza mabalekeela bilondeshile mikenji ya ditshiomba pikala babasombeshi mua kuitaba dibafuta. Kadi netuambe tshinyi pikala musombi mujimije mfranga ya muanabu ne pashishe kuikalaye mu nsombelu wa bubanji? Anyi netuambe tshinyi pikala musombi mupete mfranga mikumbane bua kufuta dibanza divuaye musombe kadi upua muoyo dibanza didiye mua kuikala nadi bua kualujila muanabu mfranga yende? Apu kudi mua kuikala mpata pa bidi bitangila ngikadilu ya musombi eu bua kusadila mu tshisumbu mu mushindu mukumbanyine.—1 Timote 3:3, 8; tangila Tshibumba tshia Nsentedi, 15 Kabitende 1994, mabeji 30-31.
Netuambe tshinyi pikalaku diibila?
16. Mbidia kayi bidi mua kulondibua bituamona se: tudi badingibue mu bungenda?
16 Busunguluji budi butuambuluisha bua kujingulula se: makasa a bungenda kaatu apeteka mu diela dionso dia mfranga mu mushinga. Kadi, netuambe tshinyi pikalaku diibila? Diibila ndiumvuija bu “ditumika ku bukole ne mafi, didinga, peshi dinyanga dia bulelela ne tshipatshila tshia kusaka mukuabu bua kulekelaye tshintu tshiende kampanda tshia mushinga peshi kulekelaye bunême bua ku mikenji.” Yezu Kristo wakafila bidia bidi mua kulondibua padi muntu wela meji se: mbamudinge kudi mutendeledi nende. Bilondeshile Matayo 18:15-17, Yezu wakamba ne: ‘Biakuenzela muanenu bibi, uye biebe, umuleje bubi buende, wewe ne yeye nkayenu; bitabujaye dîyi diebe, wewe wakamuvuija muanenu kabidi. Biapidieye kumvua dîyi diebe, uye ne muntu umue anyi bantu babidi, nunku mêyi onso neajalame kudi bamonyi babidi anyi basatu. Biapidieye kumvua mêyi abo, ambila bena ekleziya [“tshisumbu,” NW] bualu ebu; biapidieye kumvua mêyi a bena ekleziya, ikale biende ku mêsu kuebe bu muntu wa bende anyi musangishi wa mulambu.’ Mufuanu wakafila Yezu pashishe udi uleja ne: mu lungenyi luende uvua ne mpekatu bu eyi idi itangila malu a mfranga, pamue ne diibila.—Matayo 18:23-35.
17, 18. Pikala muntu udi ubikidibua ne: muena nkristo mutuibe, mmunyi mudi busunguluji mua kutukuba?
17 Bushuwa, kakuakuikala kabingila ka mu Mifundu bua kulonda bidia bileja mu Matayo 18:15-17 pikalaku kakuyi tshijadiki anyi mene lungenyi lua diibila nansha. Kadi, netuambe tshinyi pikala muntu udi ubikidibua ne: muena nkristo mutuibe bushuwa? Busunguluji budi mua kutukuba ku dienza bualu bùdì mua kunyanga lumu lua tshisumbu. Paulo wakabela bena nkristo nende bua kulekelabu babenzela bibi anyi mene babiiba pamutu pa kufunda muanabu ku kabadi.—1 Kolinto 6:7.
18 Bana betu ba balume ne ba bakaji balelela ki ‘mbûle tente ne didinga ne bubi,’ bu muvua muloji Bar-Yezu. (Bienzedi 13:6-12) Nenku tutumikayi ne busunguluji padi mfranga ijimina mu malu a mushinga wa njiwu adi atangila bena kuitabuja netu. Bituikala tuela meji bua kufunda tshilumbu ku kabadi, tudi ne bua kutangila malu adi mua kutufikila tuetu bine, kufikila munga anyi banga bantu, tshisumbu, ne bena pambelu. Dipatshila bua kufutshibua didi mua kutujimijila dîba, makanda, ne bintu bikuabu. Didi mua kufikisha anu ku dinemesha bena mbulamatadi ne bena midimu mikuabu. Bia dibungama, bamue bena nkristo mbalekele midimu ya teokrasi bualu bavua badiine ne kasuki mu malu aa. Dipambuka dietu mu mushindu eu didi ne bua kusankisha Satana, kadi tudi basue kusankisha mutshima wa Yehowa. (Nsumuinu 27:11) Ku luseke lukuabu, ditaba bua kujimija didi mua kutuambuluisha bua kuepuka disamisha mutshima ne kulama dîba dia bungi buetu tuetu pamue ne bakulu. Nedituambuluishe bua kulama ditalala dia tshisumbu ne neditukumbaje bua kutungunuka ne dikeba diambedi Bukalenge.
Busunguluji ne diangata mapangadika
19. Ntshinyi tshidi busunguluji bua mu nyuma ne masambila mua kutuenzela patudi tuangata mapangadika adi alubakaja?
19 Diangata mapangadika adi atangila malu a mfranga anyi a bungenda didi mua kuikala dilubakaja bikole. Kadi busunguluji bua mu nyuma budi mua kutuambuluisha bua kukonkonona malu biakane ne kuangata mapangadika a meji. Kabidi, dieyemena Yehowa ne muoyo umue didi mua kututuadila “ditalala dia Nzambi.” (Filipoi 4:6, 7) Ditalala edi mbupole ne ditukija bidi bifumina ku malanda makole a muntu pa nkayende ne Yehowa. Bushuwa, ditalala bu nunku didi mua kutuambuluisha bua kulama nkatshinkatshi wetu patudi tutuilangana ne mapangadika makole.
20. Ntshinyi tshitudi ne bua kupangadija bua kuenza mu malu a bungenda ne a tshisumbu?
20 Tupangadijayi bua kubenga kulekela matandu a bungenda anyanga ditalala dietu anyi dia tshisumbu. Tudi tukengela kuvuluka se: tshisumbu tshia bena nkristo tshidi tshitumika bua kutuambuluisha mu nyuma, ki mbua kuambuluisha bu muaba wa bipatshila bia bungenda nansha. Malu a bungenda adi ne bua kulamibua misangu yonso matapuluke ku midimu ya tshisumbu. Tudi tukengela kutumika ne busunguluji ne budimu patudi tuditua mu malu a bungenda a njiwu. Ne tulamayi misangu yonso mmuenenu wa nkatshinkatshi wa malu bu nunku, pa kukeba diambedi bipatshila bia Bukalenge. Pikala mushinga kampanda uvua umueneka wa njiwu ùdì ukonga batendeledi netu mufike ku dipangila, tukebayi tshidi tshitambe buimpe kuenza bua bonso badi bualu ebu butangila.
21. Mmunyi mutudi mua kutumika ne busunguluji ne kuenza malu mu diumvuangana ne Filipoi 1:9-11?
21 Pamutu pa kuditatshisha bikole bua malu a mfranga ne makuabu malu a mushinga mukese, tuetu bonso tuinyike mitshima yetu ku busunguluji, tulombe buludiki bua Nzambi, ne tulame bipatshila bia Bukalenge pa muaba wa kumpala. Mu diumvuangana ne disambila dia Paulo, ‘dinanga dietu didi mua kudiunda ne dimanya dijalame ne busunguluji bua tshishiki bua tuetu kumona mua kujadika malu adi matambe mushinga ne katuyi tulenduisha bakuabu’ anyi tuetu bine. Mpindieu bu mudi Kristo Mukalenge mu nkuasa wende wa bumfumu wa mu diulu, tulejayi busunguluji bua mu nyuma mu tshitupa tshionso tshia nsombelu. Ne ‘tuujibuayiku ne dimuma dia buakane ku butuangaji bua Yezu Kristo, bua lumu ne butumbi bia Nzambi wetu,’ Mukalenge Mfumu mukulu Yehowa.—Filipoi 1:9-11, NW.
Newandamune munyi?
◻ Busunguluji ntshinyi?
◻ Bua tshinyi kudi dikengela dia pa buadi dia kuleja busunguluji mu malu a bungenda munkatshi mua bena nkristo?
◻ Mmunyi mudi busunguluji mua kutuambuluisha bitumvua se: muena kuitabuja netu mmutudinge?
◻ Busunguluji budi ne bua kuikala ne mudimu kayi mu diangata mapangadika?
[Tshimfuanyi mu dibeji 18]
Busunguluji nebutuambuluishe bua kutumika ne mubelu wa Yezu wa kutungunuka ne kukeba diambedi Bukalenge
[Bimfuanyi mu dibeji 20]
Misangu yonso nufunde mumvuangana a bungenda mu mikanda